---

Väärs 2024

Dr Zwaier faart wäg Schwingige
Vo Binnige bis Binnige
Und wäg dr kabutte Margrethebrugg
Vo Binnige noch Binnige zrugg
Au mir zwai hänn voor dr Brugg grad gkeert
Well sii isch für Vierzigtönner gspeert

D Kommareegle sin ächt schwäär
S wäär seer schöön wenn s biz liichter wäär
Jetzt het me z Baasel ungeniert
Ai ainzigi Reegle statuiert
Statt Pünggt daarfsch nuur no Komma nää
Well d Pünggt die muesch em FCB gää

Uf em Charles si perseenlig Invitation
Fliege miir an siini Coronation
An dr Kröönigsparty mit all the Jetset
Isch es really really really nett
Miir danze deert e dirty Dänzli
Do sait äär: Lägg hän die groossi – Oore

Au wenns em FCB grad nid so lauft
Hänn miir zwai uns s neyscht Liibli gkauft
Und hänn entschiide im Vollsuff
Hinde miess dr Lieblingsspiiler druff
Doch dää zbestimme isch nit banaal
Drum stoot hindedruff halt jetz Skandaal

DER DIE DAS isch im Dütsch no wichtig
E Woort bekunnt als e andri Richtig
Wenn d UBS d CS frässe duet
Driffts DIE Monschterbangg no kaibe guet
Und bi uns Skandaalnuudle – Gott sei dangg
Heissts dräffend DER Monschterbangg

Pfaarrer, Prieschter – gopferdeggel
Doomherre Erzbischoofsseggel
Pfarrfikaar und Diaköön
Die finde jungi Mensche schöön
Jä d Kirche isch stargg unter Drugg
Jetz dritt sogaar dr Chiesa zrugg

So meega giiga geil juhuu
Miir beidi hän jetz e Tattoo
E kulturell neutraals Motiiv
Kultuuraaaginig wäär primitiiv
S isch e Zürcher Bööge Kreatuur
Well d Zürcher hän jo kai Kultuur

Dr Russ dää maint es seigi guet
Wenn är d Ukraine bekriege duet
Und dr Russ dä findets extremistisch
Wenn me LGBTQI isch
Dää Irrsinn liggt woorschnyynts am Wätter
Mit Räägebööge wäär au dr Russ bitz nätter

An dr Rugby WM in Paris
Zaale miir zwai jede Billjebryys
Wenn Männer im Schlamm ummerobbe
Kaa uns zwai Hiener nyt me stobbe
Miir frooge uns numme heieiei
Worum hänn die alli nuur ai Ei

E neys Naamerächt will dr Bundesroot
E Dobbelnaame-Chaos droot
Dr Guy us dr Waadt duet gar nyt kenne
Äär duet sich Parmelin Blocher nenne
Au d Viola Amhärd wandlet sich
Am Härd zwei Wöörter ooni Strich
Dr Ignazio daarf nid obwool äär will
Well Cassis Churchill wääri zvill
D Baume-Schneider mit Strich isch nid doof
Drum haisst sii neyschtens Schneider Schoof
Em Jans hät e zwaite Voornamme glänggt
Äär hät doo an Beat Edi dänggt
D Käller-Sutter mit Bindestrich
haisst Käller-Sutter Käller-Sutter ooni Strich
Dr Röschti duet sich geg e Ändrig weere
Sunscht miesst äär neye Buechstaabe leere
nuur dr Jositsch überdribbts mol wiider leider
Heisst neu Käller-Sutter Amhärd Baume-Schneider

[Dää Väärs is uf däänisch]
De Köngin Margreth röökt wie ne Sloot
Dritt zrögg obwööl sii nööni doot
De nuje König Frederig äär is hygge
Dööt mi frömde Froue lygge
Jetz kööft äär sik in dr Swiz e Wöönig
Well do lääbe ålli Swingerköönig

Die Griene fändes no famoos
Bäum go pflanze uf jedre Stroos
Die Lingge fändes au no glatt
Ändlig Waldkultuurhauptstadt
S staut vom Wettstaiblatz zem lange Loo
Fiir gueti Luft stimmt me doch joo
Gäg dr Verkeer im grosse Ganze
Muesch d Parkblätz loo und d Stroos bepflanze
Au d Gugge griege do Albdräum
Die ganzi Freyi voll mit Bäum
Bim Määrtblatz isch kai duurekoo
Fiir gueti Luft stimmt me doch joo
Kai Clique wo d Idyllle stöört
Well me im Wald kai Pfyffe ghöört
Alli Waggis kliinisch doot
Well jeede Waage nuur no stoot
Bim Barfi duet gaar nix me goo
Fiir gueti Luft stimmt me doch joo
Jä wemme s Klima rette will
Bruuchts aigentlig gaar nid so vill
E Bäumli doo e Bäumli döört
Wo uns bim Lääbe alli stöört
Uns ischs egaal – mir sin e Bangg
Doch d Bebbi die hän richtig dänggt
D Initiative glatt versänggt
Für s Stadtklima isch das zwar haart
Doch d Fasnacht het jetz freie Faart
Trotzdäm isch dr Fruscht am Cortège grooss
Zwai Säuli klääbe uf dr Strooss

Väärs 2023

An dr Ballettschuel s isch nid nei
Hets nääben uns no andri Sei
Die hänn uns deert zem Abnää zwunge
Wie Diir gseend isch daas nid glunge
Well miir zwai uns nid zwinge leen
Sinn mir statt dinn halt digg und scheen

An dr WM isch d Schwyz nid im Schuss
Au dr Xhaka spiilt e groosse Stuss
Geege d Seerbe längt äär sich in Schritt
Geege d Portugiise längt daas nit
Näb däm Verdruss gits nuur ai Gnuss
D Schwoobe sin no friener duss

Dr Jositsch sitzt ganz unbescholte
Im Zuug nach Bäärn – via Olte
Wo me si Byyljee kontrolliert
Lägg het dää Thyp sich doo blamiert
Jä well dää alleräärmschti Maa
Het nuur e Frauetigget ghaa

Die Aaeignig die kulturell
Isch uns zwai z intelleggtuell

«Miir wai mool luege» haissts so scheen
Wenn d Rambasse uffs Ganze geen
Jetz sin sii als no am studiere
E Windraad z Muttenz z installiere
Doch denn hänn die Duuble uusegfindet
Dass es in die falschi Richtig windet

D WM z Katar schiesst iibers Ziil
Was d FIFA macht isch infantiil
Well Schütteler nid schwuul sii sotte
Hän si Räägebeege schlicht verbotte
Und dr greescht Skandaal vo däm Durnier
Drotz Bierwäärbig gits gaar kai Bier

E Schwaarzwaldgliebdi nid okee
E Franggryychiirfluug nid okee
E Bliggstandlaitig nid okee
S isch dr Berset e Skandaal per se
Aber ains Alain, miir saage diir
D Skandaalnuudle sin immer no miir

Als Sau daarfsch hüt im Tütü danze
Ob spindeldiir oder mit Ranze
Als Mensch het me jetz d Quaal der Waal
Bisch Maa Frau oder Genderneidraal
Bim Gschlächt macht jeede nei sii Ding
Sogaar d Queen isch neierdings e King

Dr Sproochkompetänz die isch am singgt
Will Grammatik büffel jedes stinggt
Dr ganz Daag Väärbe kopuliere
Im Genitiiv kapituliere
Dää Väärs dää isch nid iberdryybt
Dää het dr Tschätt-Roboter gschryybt

Ganz haimlig abgschrubt denne graubt
Hänn miir e Haizkeerper abgschtaubt
Doch s het nyt gnutzt und nyt biidrait
Drbii het dr Bundesroot doch gsait
Es spaari ganz vyyl Energii
Wemme Haizkeerper abstaubii

Moskau-Liedli:

Moskau – wenn z Russland dr Herrscher bisch
Bruuchsch e ganz laange Tisch
Sunnscht macht me di kalt
Moskau – e Groosskotz im Greessewaan
Spiilt Aug um Aug Zaan um Zaan
Äär regiert mit Gwalt
Äär ryttet seer gäärn mit naggtem Bryschtli
Doo gseet me dyttlig sii Männerfryschtli
E zgroosses Ego e zglaine Gaischt
Äär isch hool, äär isch dumm, äär isch draischt

[Refrain]
Moskau Moskau
Deerte läbbt die greeschti Sau
Putain so nennt me iin drum au
Ui ui ui ui ui ui – pfui
Moskau Moskau
Nai dr Putain het kai Stiil
Dä Thyp dää isch doch Gränzlabiil
Ui ui ui ui ui ui – pfui

Moskau – dr Putain nennt sii Aggression
Statt grieg Speziaalooperation
So veraarscht äär d Lyt
Moskau – doch luegsch iim sii Gsicht gnau aa
Het äär scho baar Ooperatione ghaa
Gnutzt hets laider nyt
Sii glaini Greessi loot iim kai Rue
Drum drait äär immer Absätzlischue
Und wenn äär schreit loost niemer mee zue
Vladimir heer jetz uff s isch langsaam gnue

[Refrain]

Väärs 2022

Miir Peerle sin in däm Joor nei
Und wäärfe uns doo hit vor d Sei
Lyychtfiessig cringe pink schrill und haiss
Fääderliecht frivool und faiss
D Ägypter halte uns fataal
Fiir Containerschiff im Suezkanaal
Well miir zwai deert bitz bäädele
Kasch denn bi uns nimm läädele

Skandaalnuudle so haisse miir
Verschleen als schampaar gäärn bitz Gschiir

LGBTQI isch in
Und wie Diir gseen sin mir zmitz dinn
Fiir Glyychbehandlig wird votiert
Und d AHV het reüssiert
Ob glai grooss digg arm oder ryych
Jä sii behandlet alli glyych
Ob Maa ob Transe oder Frau
Bald griegt kai Sau me AHV

Ob Männli Wyybli kunterbunt
Miir lieben alles was so kunnt

Jä yych yych yych und yych und yych
Em Johnson däm isch Covid glyych
Jä yych yych yych und yych und yych
Em CS Scheff goots schampaar glyych
Jä yych yych yych und yych und yych
mit Empathie wiirsch halt nid ryych
Als Egosei sin yych und yych
Miir uns fascht scho sälber glyych

Vor Gligg dien miir als d Auge wee
Wenn yych mii im ne Spiegel gsee

Sii nach däm Gschyss im Parlamänt
Do frooge miir uns schlussamänd
Was denn jetz d Bättlerreegle sin
Doch hallo niemerts kennt dr Sinn
En Erkläärig het au d Baz versuecht
Iir Glygg in dr Poleemigg gsuecht
Doch Brichterstattig isch fiir d Katz
Denn kai Bättler liist die BaZ

Und wenn e Bättler d Baz benutzt
Wool numme wenn äär s Fuudi butzt

Dr Kurz isch kuurz e bitz bestiirzt
Well äär wäg Kuurznoochrichte stiirzt
Dr Sarkozy het me bestrooft
Dä isch korrupt au wenn är schlooft
Nur z Baasel het me jetz iigfiert
Dass wäär politisch nid brilliert
Nooch sinre Abwaal unschiniert
Uf Telebaasel moderiert

Mit Baschi Dürr als Wätterfrau
Luegt Telebaasel au kai Sau

Im Charlie goots hytt wirggligg schlächt
Als Aff hät äär gäärn Menscherächt
Als Danggscheenn dänggt äär jetz scho draa
Wien äär uns ebbis zrugg gää kaa
Grad sueche wuurd dää Affemaa
E Ziviildienschtstell und allem aa
Hät äär jo au scho aini gfunde
Bi dr Roche im Käller unde

Iiber d Afferächt hän miir nuur glacht
Well Sei hänn jo scho längschtens d Macht

S olympisch Komitee daas maint
Dass dr olympisch Gaischt veraint
Es stryycht drum jetz bi de Hormoon
D Gränze fiirs Testosteroon
Die Ainte intresiert das nit
Fiir andri sin Hormoon dr Hit
S isch s Maximum wenn Tryychler bisch
Wenn Glogge schwingen olympisch isch

Nuur well groossi Glogge draisch
Haisst nid dass Dus drum besser waisch

D Roche het e gross Speggdaggel gmacht
Belyychted d Diirm die ganzi Nacht
Im Roothuus miecht daas au no Sinn
Deert het s jo kaini Lyychte dinn
Dr Charlie gseet daas laider nit
Im dunggle Käller griegschs nid mit
Die Schau schyynt iim au iiberdriibe
Denn äär lyychted jo fiir siibe

All die andre grosse Menschenaffe
Dien zem Hochhuus ooben uuse gaffe

Die Dinosaurier häns nid gschafft
S het öbbis sii vor Ärde grafft
Isch äggsch e Virus tschuld doo draa
Dass sich kai Dino weere kaa
Nid Masggen oder Teschtsysteem
Nid Booster Impfig sins Probleem
Nai dr Dino het kai Chance ghaa
Well är aifach nid faxe kaa

Wenn jede scho soone Massge drait
wär y froh wenn me däm au Larve sait

Wenn z Baasel e Baum felle sotsch
Well ebbis scheens neys baue wotsch
Schiggt d Baz e Schuurnalischt mit Biss
Macht wäg däm Baum e riise Gschyss
Was dää aifach halt nid verstoot
Warum me halt mol Bäum umloot
Het dämm scho mol ebber verzellt
Us waas me Zytige häärstellt

Vyyl Bäum loo felle het au d Käller
Die isch laider au nit häller

E Mensch im Baschtröggli – goot nit
Safaariunifoorm – goot nit
Au dr Europapaark het gleert
Dass soo Rassismus sich nid gheert
Drumm hänn si z Ruscht glatt reagiert
Politisch koräggt korrigiert
Kasch ooni Skruupel wiider goo
Nuur Schwoobe hets halt immer noo

Au wenns politisch nid koräggt isch
Waartisch deert bis de schwaarz bisch

S isch klaar wenn me dr Biden kennt
Dass me iin Sleepy Joe au nennt
Doch s isch soo dass au Vordail het
Dass äär e bitzli staggelet
Fiir d Schwyz isch es jo durchuus guet
Wenn äär sich d Woort zrächtleege duet
Und sich vyyl Zyt bim Reede loot
Well s so dr Muurer au verstoot

Und wenn dr Muurer d Oore spitzt
Denn mainsch dass deert e Hobbit sitzt

Es stimmt jo ass dr Djokovic
Dr beschti Tennisspiiler itsch
Nuur in siim Hirni stimmt e bitsch
D Verdrootig woorschyynlig halt nitsch
Well vorme glaine Spritzistitsch
Het äär so Angscht dr Djokovic
So kunnts wenn dii nid impfe witsch
Und denn no in Austraalie bitsch

Wenns naime kai Gin Tonic gitsch
Denn suffi halt none Waggitsch