---

Väärs 2024

Uns’ri Gitarrischtin bruucht vo uns ganz vyyl Suppoort.
Sie findet weder d Deen no dr richtig Uffdrittsoort.
Doch gits für sie no Hoffnig, mir glaube ganz fescht dra:
Als näggschti Bresidäntin vo dr USA.

Au mir fimf harte Fraue sueche s Abendüür.
Drum faare mir nach Ruscht, die Gääli isch am Stüür.
«Hallo», sait die vom Europa-Pargg, «schön, seid ihr fünf da.»
Und ob mir d Attraggtioone mit oder ooni Füür wänn ha.

S isch allgemain bekannt, es bruucht jetzt braiteri Better.
Denn d Mensche uff em Ärdball wäärde als wie … runder.
In Basel dänggt me wyter, es het is fünf erhaitert.
Drum het me s Rhybaad Braiti grad ums Dopplete verbraitert.

Mir fimf hänn is im Minschter in e änge Byychtstuel druggt.
Die Root liigt oobe, die Grüen liigt quer, die Blau het kuum zuggt.
Wo mir em Pfarrer biichte wänn, raschled s deert ganz schwach.
«Oh Gott!» Jetzt schmatzt dä Schoggistigg vom Läderach!

Mir fimf hän is e Hündli kauft, s wird ghätschlet und verwöönt.
S wird ummezaigt und gstriichlet, am liebschte grad no kröönt.
D Saudis hän s uns abgluegt und finde s wunderbaar.
Nur iires Hündli hinggt e bitz und es haisst Neymaar.

Uff iiri laangi Naase isch e Mariekääfer gflooge.
Är däppelet zur Stiirn und isch derno zem Aug abbooge.
Won är denn immer neecher kunnt, het sie s ganz dyytlig gsee:
Dä het jo fascht mee Pünggt – als uns’re FCBee!

CS-Mitarbaiter sinn neu by dr UBS.
Do sait dr neui Laiter: «Guete Moorge, händ kai Stress!
S ainzig, wo sich änderet: S Logo isch jetzt root.
S Guete isch, iir wisset scho, wie s Kunde bschisse goot.»

An ere graue Huusfassaade grad bym Gäärbergässli
glättere zwai Männer uffe, driibe deert e Gspässli.
An e Kunscht-Installatioon, glaube mir fimf nit.
«So hälfed doch däm Baschi Dürr jetzt äntlig uff dä Tritt!»

Dr Brian isch jetzt frei koo. Wie goots für iin äggscht witer?
Schafft er als Verdrätter oder Babysitter?
Är deerf by dr IKEA, wüsse mir vom Heeresaage,
im Meebellaager teschte, was die Meebel so verdraage.

Dr Charlie und dr Zulu butze neu am Ziircher Airport.
Sie sind sinn nit grad die hellschte und au e bitz verboort.
E Gnopfdrugg und zack zack! Me kaa se lyycht abschalte.
Im Grund gno ideaal; so kaa me Ziircher gnapp uushalte.

D Viola Amhärd het am WEF zümftig afo blöffe.
S Gsprööch mit däre von der Leyen syyg «üüsgezeichnet glöffe.»
Die Dytschi het vyyl glächled und für sich d Sekuunde zellt.
Und denn, wo d Amhärd gangen isch, en Übersetzer bstellt.

Letschte Frielig simmer im Trois Rois ganz digg go ässe.
Deert hämmer alles wäggbutzt; Kalorie zem Vergässe.
Mir faare denn uff s Bruederholz im Drämmli wiider zrugg.
Und sit däm Daag saaniere sie die alt Margrethebrugg.

Är macht is groossi Soorge, uns’re Bundesroot.
Miesst epper gscheit regiere, waiss niemer, wie das goot:
Dr Berset fliegt dervoo, är nimmt sy schigge Huet.
Für d Amhärd bruuchts en Untertitel, wenn sie schwätze duet.
Im Aggte-Käller unde lacht haimlig d Käller-Sutter.
Dr Cassis googelt Dytsch-Küürs am Bundeshuus-Computer.
Dr Parmelin nimmt Wysswyy geege dr Verlaider.
D Baume-Schneider isch … jo aifach halt d Baume-Schneider.
Am schlimmschte driffts dr Röschti, dä wiirggt wie uff Drooge.
Wel en Znacht «S Rotkäppli und dr böösi Wolf» dien blooge.
S fäält überall an Fachgräft und das in allne Schichte.
Do hilfft nur ains: Jetzt miens in Bäärn miir Baasler wiider richte!

Väärs 2023

Mir fimf sind jetzt scho länger in de Wäggseljoor.
Mir schwitze, spiire Wallige, hänn nassi Aggselhoor.
Unseri Männer nutze das gezielt zer Koschteschoonig
und stellen is als Haizstraaler zum Nulltarif in d Woonig.

Dr neui, rooti Pass isch e Sääge fir d Natioon
mit scheene Schwiizer Bäärge als Identifikatioon.
Und au die vyyle Linie erinnere is ellai
an die diggen Oodere vo uns‘re wisse Bai.

Die technischi Entwigglig isch lang no nit am Ändi.
Mir kaufe alles logger yy – ganz easy iber s Handy.
E Schnäppli do, e Schnäppli deert, s isch kuul, wenn alles lauft.
Doch aimool nit rächt gluegt – scho hesch die halbi CS kauft.

Die ältischt Schildgrott uf dr Wält het no ganz vyyl Pfuus.
Sie wiird jetzt 190 Joor und gseet no häärzig uus.
Wo mir das Schrumpfelkeepfli gseen, blyybt dä Aabligg hängge.
Jetzt miemer immer wieder an dr Albert Röschti dängge.

Aimool nääb de Meghan sitze, koschtet ai Millioon,
e gooldigs Steak in Dubai ässe, guet e halbe Loon.
E Autoschild in Ziiri macht zwaihundertdausig Fränggli.
Das zaalsch bym Biozentrum fir e Garderoobeschränggli.

Bim FCB herrscht syt zwai Joor e groosses Koo und Goo.
Kuum isch aine doo, mues er dernoo sy Blatz verloo.
Drum fände mirs no braggtisch und s wuurdi au guet laufe,
kenntsch die neue Spiilerdress mit Wäggselnummere kaufe.

Die Klima-Aggtiwischtin do macht is scho ganz schissig.
Si het en IQ zwische Innerorts und eppe Tempo drissig.
Si het sich a die Stange gläbbt und sythäär duet si glaage.
Jetzt muess si scho die ganzi Zyt bi uns dr Helge draage.

Fir s Muul zueheebe, muesch di dytschi Nati au mool loobe.
Immerhin fir zää Sekuunde schwiige so elf Schwoobe.
Es schloot is in Kataar aber zimftig uff dr Maage.
Dass die Dytsche wieder wänn en Aarmbinde draage.

Im ene Hotel in Berlin isch en Aquarium explodiert.
E luute Gnall, und dausig Fisch sinn uff dr Strooss drapiert.
Chinesischi Tourischte hän soffort reagiert
und schnäll dr ganzi Street Food ungeniert frittiert.

S neie Erbräächt isch in Graft, s isch guet fir alti Drache.
Die deerfe nei em Basler Zolli vyyl mee Gäld vermache.
De Kinder muesch jetzt weniger gää – vor allem dääne Fleegel.
Mir saage däm ganz virtuoos die nei «Brinz Harry-Reegel».

Bi Zunzge händ s en Luggs mit em Auti iberfaare.
In Buus het me gsee, wie sich zwai Miisli paare.
Die Top News us dr BaZ finde mir fimf ganz famoos.
Im Kanton Baselland, jo, deert isch immer eppis loos.

In Kataar isch es draumhaft, schwäärmt dr Infantino.
Au mir hätte gärn so nes Lääbe wie im Kino:
Koffer paggt, ins Goschdyym gstiirzt, s isch wiirgglig saagehaft.
Mer händs mit unsere Faarbe nit emool in Flieger gschafft.

D Eva Herzog hämmer droffe in ere Apotheek.
E Schloofmittel miess si haa, mir finde das rächt schreeg.
Bim Scheefli zelle dööst si wägg, do foot s Häärz afo raase.
Denn jeedes zäänti gumpt verbyy mit son ere schwaarze Naase!

Die Rosamunde Pilcher-Film erwäärme unser Gmiet.
Jungi Mensche finde sich, sinn riich und schwäär verliebt.
Au die zwai, wo hyyle – fascht wie am Abschlussball.
Doch wo mir d Brille aazien, sinn s dr Roger und Nadal.

D Räänte eerscht ab Fimfesächzig – kai Frau het s wirgglig gäärn.
Drum faare alli voller Wuet – zum Brotescht uff Bäärn.
Mir Bääse kenne dääre Voorlag eppis Guets abgwinne:
Denn deerfe mir fimf haisse Girls no ai Joor länger singe.

Väärs 2022

S Telebasel het e Griise – das kaa men nimm verstegge.
Die dien zem Quote mache, Regiirigsrööt uffwegge.
Dr Sonntalk fiert dr Baschi Dürr – Mir wänn uff kai Fall mee.
Sunscht kunnt am Änd no d Ackermaa als neui Wätterfee.

S git Lyt uff däre Wält, die kuschle gärn mit Geegeständ.
Anderi steen uff Latexstiefel oder Fiess und Händ.
Liggt s Draage vomene Goschdyym i dym Naturell
sait me däm do z Basel «fasnachtsexuell».

Fir em Federer syni On-Schue muesch by Zyte afo spaare.
Und die, wo s nit vermeege, kenne «Roger-Drämmli» faare.
Au dr Alex Wilson mecht jetzt son e Schue bykoo.
Denn lauft iim hoffentlig nit wiider e Wältrekoord dervoo.

Mir liebe Pizza, Pasta, Dolce und Prosciutto,
Spaghetti al Tartuffo und au Ossobucco.
Liebi Italiääner, s beschte Ässe, das händ iir.
Gniessed das dehaim, denn an d WM faare miir!

Im Schauschpielhuus in Ziiri – am Änd vom zwaite Aggt
git s Sex grad uff dr Biini, eb mit Glaider oder naggt.
Mir finde s faszinierend, was do kulturell entstoot,
wenn me denn in Ziiri emool in d Diefi goot.

By Verdacht uff Covid, griegsch e Staab in d Naase gschoobe
Drifft dr Arzt uff Hoolruum, kaan är sich eggstreeem uustoobe.
Är graazt und grieblet, boort und sticht und stellt kai Hirni fescht.
Däm sait me mediziinisch: Dr «Eric-Wäber-Tescht».

Am Fäärnsee hänn uns d Ninja Warriors vellig fasziniert.
Säggs Meened hän mir jeede Daag an Hindernis trainiert.
Yber Grääbe springe, es sichers Glyychgwicht gwinne,
mit Barriere ringe, durch ängi Röhre dringe,
em Wasserloch entrinne, ans anderi Ändi schwinge,
d Bai um Pföschte schlinge, bis d Ängeli gheersch singe.
Nur so kasch du in drei Minute d Freie Strooss bezwinge.

Du zaigsch mir d Fuscht, ich gib dir d Hand und denn umgekeert.
S Rituaal zem Griezi saage, isch noochhaltig gsteert.
«Hey Mann, dasch aber cool», sait unsere Neveu Casimir.
«Gäll, das isch die neui Foorm vo Scheere, Stai, Babyyr?»

Sott di emool s Verlange noch Whiskey iberkoo,
kasch jetzt glyy, zem d Lampe fülle au in d Migros goo.
Dr beschti Migroslaade isch dä am Baanhoof unde.
Deert waarte voor em Hauptyygang dääglig treui Kunde.

Mit 3G deerfsch bi uns normaal in de Baize mampfe.
Mit 2G plus deerfsch Fitness mache und in Clubs go dampfe.
1G isch dr neuschti Hit. Hey, wie isch das toll!
Und mit 0G kunnsch immerhin z Auschtraalie bis an Zoll!

Zem Schaffe nämme mir dr Bus, das isch is gar nit z vyyl.
Und d Feerie mache mir dehaim, das hilfft em Klimaziel.
Dass mir so CO2 dien spaare, isch doch seer z begriesse.
En aarme Miliardäär kaa sich derfir in Wältruum schiesse!

Als Hilff fir Covid kenne Baizer Gäld vom Bund verlange.
Au dr FCB het bschlosse, an die Quelle z hange.
E baar Millioone mee, kääm em Club denn scho no glääge.
Das längt denn gnapp fir d Handyrächnig vom Präsi David Dääge.

Elf FCB-Aagstellti – zwai dervo sinn Ärzt.
Die hän e hoochi Rächnig gstellt – dä Abgang wiird verschmärzt.
Nyyn FCB-Aagstellti machen Iberzyt.
Dä, wo das wott uuszaalt haa, frittiert jetzt halt Pommes Frites.
Acht FCB-Aagstellti fyyle sich bedrängt.
Aine het dr Dääge gsteert – am Händy – das het glängt.
Dr Blatzwaart goot go Dünger kaufe, isch kuurz unterwäggs.
Bim zruggkoo, isch sy Bätsch gsperrt, do sinns halt nur no säggs.
Säggs FCB-Aagstellti sinn langsam irritiert.
Dä, wo lyycht em Burgener glyycht, dä het men abserviert.
Fimf FCB-Aagstellti hän d Kurve kritisiert.
Noch em näggschte Haimspiel sinn si bletzlig nur no z viert.
Vier FCB-Aagstellti – aine het e Spray.
Nochdäm är «Degen raus!» gschmiert het, sinn s halt nur no drei.
Drei FCB-Aagstellti dien z Indie Düümli draie.
Dr Ceccaroni loot me deert zem Lääderbäll zuenaie.
Zwai FCB-Aagstellti hänn em Dääge e Händy gschänggt.
Ain dervo het laider in dr Akku-Laader glängt.
Mit aim FCB-Aagstellte findet d GV statt.
Dr ainzig, wo no iibrig isch, haisst Karli Odermatt.

Väärs 2020

Z Room im Vatikaan wäärde d Kardinääl ganz spitz,
wenn d Schwyyzergaarde duurelauft in iirne Brachtsoutfits.
Drum draage uns’ri Aidgenosse, jetzt miend iir aaneloose,
statt uff em Kopf dr Yysehelm nur no in dr Hoose.

Syt iber zwanzig Joor dien mir scho uff dr Biini stoo.
Jetzt hämmer is vom Schutte inspiriere loo.
Goot e Ryym dir z schnäll und isch d Pointe nit ganz glaar.
Denn riefsch ab sofoort noch em Väärs – aifach noch em VAR!

Z Lieschtel hängt e Schwiizerfaane an dr Wysse Flue.
Jä, z Lieschtel hängt e Schwiizerfaane. S het kaine mee sy Ruee.
Jä, z Lieschtel hängt e Schwiizerfaane. Ay, isch das e Gschiss!
S isch nur en Orientierigshilff – speziell fir d Patrouille Suisse.

S Liiseli us London kaa das aifach nit verstoo:
Iire Lieblingsänggel Harry will nimm zu iire koo.
Ganz anders dr Prinz Andrew; iin loot das vellig kalt.
Fir syy Gschmagg isch die Meghan jo ainewääg vyyl z alt.

Unsri Fryyndin, s Vreneli, gniesst gäärn es Aierliggeerli.
Das hoolt sie sich im Dyytsche fir unser Frauecheerli.
Wäg dr neie Meerwäärtstyyr hoolt sie grad e baar Galleenli.
Drum het unser Cheerli jetzt dääglig ains im Greenli.

Mir käffele im Huguenin. Denn miemer no go boschte.
Denn no schnäll zem Augenarzt. Denn Jogge geege s Roschte.
S Räntnerlääbe isch kai Schlägg, wisse jo die maischte.
Do schluggt dr Hampe Wessels läär – gly muess är eppis laischte!

Dä Uffruef vom vo Wattewyl begriesse mir fimf seer.
«Du Pfyffe, mach am Wello Liecht!» Das hilft znacht im Verkeer.
Mer hänn iin geschter strample gsee, ganz hell voor uns’rem Kaare.
Mer hänn kuurz iberlegt und en drotzdäm iberfaare.

Dr näggschti Väärs hänn mir firs Silveschterfyyrwärgg gschryybe.
Är zaigt sich solidarisch – und isch drum au kiirzer blyybe…

Mir schnäädere im Huguenin bym ene Gleesli Wyy.
Do isch es mit dr Gmietligkait uff ai Schlaag grad verbyy.
Paanisch sait dr Källner Claude, wo sunscht immer lacht:
«Jetzt han y grad en Aaruef griegt: D Rigozzi kunnt zem Znacht!»

Dr Maurer by de Saudis, e histoorische Momäänt.
S isch wichtig, bringsch als Gascht e bassend nätt Bresäänt.
Mir fimf wisste scho, was en Saudi-Brinz gäärn het.
Wie wär s denn mit ere Saagi und e neis Kofferset?

Dr Parmelin und d ETH befinde sich im Striit.
Im Wasser haigs – behauptet är – kai suurs Peschtiziid.
Är kennti das bewyyse, wenn är daas wirgglig miess.
Denn vergliche mit sym Wysswyy seig das Wasser jo ganz siess.

Är begaischteret rund um d Wält, dä alti Tennisbappe.
Und jetzt vermarggded unsere Rodscher au no neui Schlappe.
Es haisst, mit dääne spielt me Tennis wie im Paradies.
Und nach em Training schmegge d Fiess au sicher wie «Swiss Cheese».

Fimf Banaanesplit mit Schlagraam, so wie s jeedi Gniesser maag.
Doch am Änd kunnt d Rächnig und do drifft is fascht dr Schlaag.
Das koschtet duusig Stutz, sait dr Källner elegant.
Die Banaane hängt sunscht immer als Kunschtwärgg an dr Wand.

D Boeing Flugzyyg steen jetzt scho en Ewigkait am Boode.
Als ainzigs isch s Entwicklerteam bi dääne uusegflooge.
Die Ingenieure schaffe jetzt – daas wird euch jetzt gfalle
als Brandschutzspeziaalischte in dr Joggelihalle.

Im Herbscht sinn mir am Mässeblatz, e baar rasaanti Runde gfaare.
Au am Barfi hänn mir is s draie, au nit kenne erspaare.
Denn so geege Mitternacht, noch iber duusig Runde.
Hänn mir denn in Rieche non e freie Parggblatz gfunde.

S Trudi, die aalti Pfunzle, steent: «D Hifte macht nimm mit!»
Doch muess sie länger schaffe, dermit s e Ränte git.
«Das isch doch nit so schlimm!», aint sie glasse und mit Rue.
Bis sie voor iirem Byyroo stoot, isch das scho längschtens zue.

Zem Schwiizer Sportler wiird dr Stucki Christiaan.
S Fuudi vom 2019 goot an Kim Kardashian.
Dr Göla oben oone wird zem neie Mister Buddha.
Und d Beggere vom Joor isch d Simonetta Sommaruga.

Väärs 2019

Mit Kinder an ere Kasse z stoo, isch woorlig kai Vergniege.
Die Goofe ruume d Ständer ab und alles, was sie griege.
Und kunnsch du an e Migroskasse – e Schregg-Szenaario.
Macht s «Miep», schleen sie s Glaas yy, zem an d Wichtel aane z koo.

Was bis jetzt no niemerts waiss, hän d Chineese uusegfunde.
Sie fliege dr Mond vo hinden aa und wänn deert s Land erkunde.
Doch iberall hets Liigestiel – s isch niene uff dr Kaarte
vo Schwoobe, wo mit Diechli uff dr Sunnenuffgang waarte.

Sit Joore kämpfe mir um unseri Frauerächt!
Mir sinn als Bundesreet und Piloote gar nit schlächt.
Wirtschaft, Leer und Foorschig, uns Fraue duet s guet laufe.
Jetzt deerfe mir bym FCB scho Leesli go verkaufe.

Ich bi die glaini Emma und haa scho zwai Milchzeen.
Ich kan e bitzli grabble, aber laufe macht Brobleem.
Mami Papi schaffe, und Zyt halt nit vergoot.
Drum gang ich nei in Kinderhort «Basel Groosse Root».

Mir spitze unseri Oore bym Znacht am Wältkongräss.
Dr Bin Salman zaigt em Erdogan dr Umgang mit dr Bräss.
Dr Putin und dr Xi Jinping erglääre freii Waale.
Dr Trump sait, wie me Fraue Schwyygegäld duet zaale.
Do wirft sich d Merkel in Boschtuur und sait ganz unverhoole.
Sie haigi denn als glaine Gnopf dehaim e Sugus gstoole.

Dr Alex Wilson seggled iber d Tartaanbaan und lacht:
«Gopfedeggel, han y fascht in myn Hoose gmacht!»
«Hey Alex, bisch du nur so schnäll vom vyyle Doping schlugge?»
«Hey, nai, gopfedeggel, myni Leggins dien so drugge!»

Unseri Nichte Jessica will aifach nit verhiete.
Jetzt duet sie scho mit siebzää Joor s dritte Kind ussbriete.
Schuld seig iires Handy, es isch halt ganz dumm gange.
Im ene Funggloch, het sie gmaint, kennt me nit empfange.

Bym Käffele im Huegenin hänn mir fimf Bääse gfunde:
S wäär doch nätt, mer wääre mit ere Ai-Watsch-Uur verbunde.
Die Technigg isch fantastisch, me kaa ganz vyyl entdegge:
Zem Byspiil au, wo alli Tesla-Schugger-Auti stegge.

Mir fimf sinn seer erfreut iber unser Bundesgricht
Im Replay-Modus Färnsee luege, isch e gueti Gschicht.
Au firs Telebaasel – duet dä Entschaid vyyl bringe.
Me kaa denn s ganze Brogramm bis zer Wäärbig iberspringe.

S Handy schällt, jä nai, scho wiider e Granggegasse.
D Mailbox iberfüllt mit Späm, s isch wiirgglig nit zem Gspasse.
An dr Dyyre glopfts, zwai Missionaare wänn is gsee.
Si bringe uns die frooi Botschaft vo dr FDP.

Die Doppeladler-Schutt-Affäre bewegt die ganz Natioon.
Do bruuchts no ganz vyyl Schritt fir e glungni Integratioon.
Dermit das z Basel glinge kaa, wär d Zyt scho langsam ryff,
ass dr Doppeladler danzt anstell vom Vogel Gryff.

Dr Trump het mit Viagra absolut nyt am Huet.
Das glärt, wieso d Melania so grimmig luege duet.
Verzichtet är uff d Pille, so wäär das nit nur gsund.
Es nutzt is au in Zuekunft, dass är bym WEF nit kunnt.

Sie, mir fimf sinn rächt fruschtriert, jetzt isch es doch bassiert:
S SRF het ungeniert dr «Aeschbi» abserviert.
Dä Maa isch eerscht grad siebzig gsi, dä nätti Schwiigersoon.
Me schiggt doch Lyt mit Zuekunft nit so aifach in Bangsioon!
Au miir fimf spyyre s Alter, was an vyylem mergge duesch.
Wenn d Muusig voor em Yyparkiere lyyslig stelle muesch.
Im Alter wirsch du logger, was jeede Teenie wett.
Derby hesch nur vergässe, was di grad so uffgreggt hett.
Mir bräzle uns gärn uff und pierce unseri Zunge.
Doch kaine pfyfft is nooche, das sinn numme unsri Lunge.
Bisch z Oobe noch dr Nüüni wach, mainsch, Gott will di bestroofe.
Wachsch denn eerscht am Säggsi uff, findsch: «Gail, ych han ussgschloofe».
Mir finde s richtig super, wenn im Coop die Junge flueche,
wil du s Minz im Däschli an dr Kasse aafangsch sueche.
Hit leen sich jungi Männer e lange Baart lo waggse.
Do lächle mir nur schnippisch und zaige uns’ri Aggsle
Im Bett ziesch waarmi Soggen aa, am Sunntig gar die schigge.
Und duesch im Bett dich draie, bliibe d Brüscht aifach ligge.
Und wäärde mir denn dattrig, saage mir euch glaar und breff:
S Alter isch kai Ussreed: «Aeschbi, zrugg ins SRF!»

Vers 2018

D Stadt Basel het im Summer die Mittleri Brugg saniert,
dermit het sii iir Kässeli ganz scheen strapaziert.
Dä Uffwand het sich drotzdäm gloont, hänn mir fimf uns so dänggt,
sunscht hätt dr Wessels sicher nur – dä Stutz de Waggis gschänggt.

Im Kindsgi hesch du gnäärvt, im Gymi hänn s di gmobbt.
D Leer hesch du nit fertig gmacht und denn erfolglos jobbt.
Frinde hesch du kaini. Du stinggsch e bitz noch Fisch.
Ai Gligg, dass du doch immerhin e Migrosbsitzer bisch.

Scho wiider isch dr Schneider-Ammann im Parlamänt yygniggt.
Noch fimf Minuute wacht är bletzlig uff – und erschriggt!
Er haigi draimt, me haigi iim bereits Orgaan entnoo,
doch Hirn und Rugggrat sind bi iim scho lengschtens nimme doo.

Im Kampf geegen IS dien d Amis reagiere
und dr Playboy Hefner in Himmel delegiere.
Fir d Mosleems isch dä Zuug, e fiese Schlaag ins Gsicht,
denn das mit de Jungfraue isch jetzt en alti Gschicht.

In Hamburg am G20-Gipfel git e Chaotepagg
de Bolizischte und Passante ganz scheen uff e Sagg.
Mir roote eich firs näggschte Joor, verhinderet dä Grach,
hoolet doch dr Constantin, dä haut die alli flach!

D Schwoobe hänn s jetzt doch no gschafft, es git die groossi GroKo.
D Merkel isch erschöpft, s wäär heggschti Zyt zem Loosloo.
Jetzt bruuchts e Maa mit Aier und Fyyngfyyl wien e Panzer.
Wie wäär d Martullo-Blocher als neie Bundeskanzler?

Im Naduurhistoorische Museum bym Apéro mit Bier
hets vom Coop so Häppli gää mit glaine Grabbeldier.
Fein isch s gsi, doch bliibts fir uns en Oobe zum Vergässe!
Mir hänn drum uss Verseehe die gaanzi Kääfer-Sammlig gfrässe.

Im Zolli will die schiggi, diggi Panzernaashoornkue
uff gar kai Fall go rammle, sondern aifach iiri Rue.
Jetzt muess sii zrugg nach Franggryych, zem franzeesisch leerne gschwind.
Jä, nutze wird das nyt, au mit Franzeesisch griegsch kai Kind.

Dr Trump, die gfeent Orangsche, het cool loo kommuniziere,
vom Ku-Klux-Klan will är sich nit so dyytlig dischtanziere.
Die Gschpängschtli mit Kabuze seige doch die Allerbeschte,
die haige so wien är, alli au e wyssi Weschte!

In Baasel gits an Halloween e Zombiewalk, ojee!
Deert kaa me Hinz und Kunz als Liiche ummeschluurfe gsee.
Au d Ackermaa Elisabeth wuurd ganz gäärn deert mithingge.
Glaider hätt sii scho, und sii miesst sich au nit schmingge.

Dr Mugabe us Zimbabwe suecht in Rom e neie Job.
Mit 93 Joor wäär är als Papscht doch sicher top!
Laider gieng das nit, ergläärt e Bischof iim am Disch.
Är soll doch wieder koo, wenn är e weeneli älter isch.

Dr neggschti Väärs singe mir im Tempo vom ene Schnägg.
Kai Angscht, das het uff jeede Fall sy Richtigkait und Zwägg.
Mir sinn zwar seer seer langsaam, aber kenne länger laufe.
Dä Drigg hänn mir is bibroocht, wo mir s iPhone sinn go kaufe.

Dr Kim Jong Un us Nordkorea isch inkognito
an Olyympisch Biathlon in Süde aabe koo.
Die Sportler sinn jo spindeldürr, daas duet iin seer verdriesse
und vor allem, dass die numme uff so Schiibli schiesse.

D Prämie vo de Granggekasse styyge, s isch brutaal!
Vo Schöönebuech bis Ammel wänn halt alli iir Spidaal.
Drum dien jetzt d Ärzt vo Lieschtel zem leerne operiere,
uff em Määrt vo Sissach nei Säuli seziere!

D Blaggedee mit däm Umschlaag isch uss unserer Sicht seer spritzig.
Doch wiider fäält e Bänggler druff, das finde mir nit witzig.
Son e Guweer wäär jo dänggt gsi, maint s Comité kuurz aabunde.
Zem Verschigge hänn si leider kai offeni Poschtschtell gfunde.

D Bress maint dr Boris Becker, dä seig doch vellig blangg.
Das Grücht, das macht dr Bobele wiirgglig dotaal grangg.
Er haig non e baar Millioone y sym Kuchischrangg.
Derzue e digg gfüllts Konto uff dr Saamebangg!

Väärs 2017

Jeedi grooss Regierig baut sich gärn e Monumänt.
Ains, wo fir si typisch isch und iibrig bliibt am Änd.
Dr Wessels maint, e Welloring, das wäär genau sy Stiil.
Dä drait sich au im Grais und fiert halt nie diräggt zem Ziil.

D Barteie besteen hit laider uss alte Bögg und graue Gryte.
Mit Kukident und Breili gseesch si ins Verdäärbe rytte.
Nur in dr CVP gheersch dr Darbelley luut lache.
Fir iin isch s e Missioon – dr Nochwuggs sälber z mache.

Zem sicher syy, wott d Bolizey rund fuffzig Millioone zaale
als Maasnaam by Erschytterige in dr Alaarmzentraale.
Die Angscht isch ganz berächtigt, mer sinn doo informiert.
Wel dieff im Käller d Wöschmaschiine vom Baschi Dürr wibriert.

In Aarau und in Neuchâtel gits ney e Phenomeen.
Au in Wohle, Gänf und Winterthur hänn alli Angscht vor Gleen.
Au z Chiasso und in Wil het me Horrorgleen scho gsee.
Derby isch s d Frau Canepa gsi uff Challenge League-Tournee.

En alti Kathecheetin froogt im Reli-Unterricht:
«Wär waiss, was dr Karfriitig isch und kennt die ganzi Gschicht?»
«Dasch aifach», sait do s Anneli und glatscht in baidi Händ.
«Däm sait me hit Black Friday und s git iberall Brozänt.»

Kubo, Mbabu, Mvogo, Nuhu, Sanogo und Hoarau.
Kaa dr Andy Rihs die Naame saage, isch är jo scho froo.
Ob Siegenthaler, Bickel, Spycher – das isch ainerlai.
YB isch und blyybt uff eewig immer d Nummer zwai!

Mir wisse dur e Stuudie iber Unfäll mit em Kaare,
Dass si z Basel no vyyl schlächter als im Aargau faare.
Glaar isch, wenn mer d Aargauer frei ummebolze leen,
denn glepfts halt luut Statistigg in den andere Kanteen.

Händ iir dr Orang Utan gsee, wo im Zolli ummesitzt,
wo gniisslig in dr Naase boort und vor sich aane schwitzt.
Won är no an sy Pfyffli längt, sy Hand schmeggt sträng nach Fisch,
isch glaar, vo wäm dr Jogi Löw erzooge woorden isch.

Do e weeneli schlägge, deert e weeneli gnaisse.
Im Liige Dolce Vita gniesse und wyt ewägg go raise.
D Braue lipfe, grinse, enander fuurchtbar hasse.
So losst sich die letschti Staffle vom Bachelor zämmefasse.

Die Champions League isch gloffe, das deerf me nit verschwiige.
Bym FCB dien d Tschütteler an Laadehemmig liide.
Mer hätte do en Stiirmer, dä het no ziemlig Pfäffer.
Dr Mick Jagger schiesst no uss em Stand mit 73 e Dräffer.

Das mit de Schwaarze und Schwuule haig er gsait im Affäggt.
In Woored isch dr Trump liebenswärt und seer korräggt.
Kuum isch dä Büffel gwäält, mir kemme nimmi druus,
wirft dä doch als erschts e Schwaarze uss em wisse Huus.

D Hauptposcht an dr Freye macht glyy iiri Diire zue.
Drum zyygle mir die Poscht ins Altershaim «Zer Rue.»
Deert isch s Sortiere mit Maschiine lengschtens scho verbii.
Das macht dr Hans so näbebii als Ergotherapie.
Fir an Schalter wird dr Heinz drotz Alzhaimer erwooge.
Dä näärvt sich nämli nit, wenn d Kunde immer s Glyyche frooge.
«Au ych bi gäärn am Schalter», maint dr Peter kurz und gnapp.
«Wenn d Kunde sich beschwääre, stell ych my Heergrät ab.»
Die gääle Diskretioonslinie sinn, es isch nit glooge
vo dr Helga liebevoll mit em Rollaator zooge.
Express kaasch em Vreni gää no bis am Achti zoobe.
Die bringt sie mit em Dräppelift wie dr Blitz nach oobe.
«E Roorposcht wäar doch toll», sait dr spitzi Fritz verwääge.
Ab und zue e Roor verleege, käämt iim scho no glääge.
«E Roorposcht, das isch my Gebiet», weert sich dr schaarfi Toni.
«My Roor isch zwoor nimm wasserdicht, aber au nit ooni.»
Fir s Maargeschlägge isch d Frau Müller ganz e groosse Gwinn.
Uff die Aart macht iir Gaifere doch no zimlig Sinn.
S Rösli stämplet d Couvert ab, das Muschter wiirggt so frisch.
«Dangge», sait do s Rösli stolz. «Y machsch mit mym Gebisch!»
Und miesti d Poscht denn speeter an e Schliessig dängge,
kennt me das ganz aifach iber nadierligi Abgäng längge.

Väärs 2016

Dr Morin het e Brachtsidee und maint am Radioo:
Zem Wäärbig mache wuurd är z Mailand an die Expo goo
Deert singt är „z Basel an mym Ryy“, und lächled ganz charmant
Und wiider isch e Daag verbyy, wo alles abverlangt!

Sii, das het is scho verstuunt, bim Fäärnsee SRF
schnallt me jetz dr Gürtel änger, sait dr ooberscht Scheff
S dunggt is, ass dr Heer de Weck das guet yyschetze kaa
Är luegt das Brogramm jo us verschiidene Winggel aa

Mid em Achter schnäll uff Weil am Rhein, dasch luschtig und nit dyyr
Wenn d deert grad non en Auti kaufsch, spaarsch au no d Meerwäärtstyyr
Falls dy Frau als gäärn e Kopfduech drait, soll si das deert vermyyde
Will bletzlig d Mutti Merkel kunnt und sait „Iir deerfed blyybe!“

Was isch das fir e Gschyss gsi z Basel ums White Dinner?
Fir son e Goschdyym Blausch findsch allewyyl e Huffe Spinner
Dr Blatter hett sich nit lo see – und zwoor nit wäge de Keschte
Er findet in sym Glaiderschrangg kai ainzig wyssi Weschte

Sii, das het is scho verstuunt: D Männerwält isch baff
Wäge de vyyle blutte Selfies macht dr Playboy schlaff
Jä, wuurd bi jeedem Fuudiblatt s greescht Fuudi wyyche
Kennt me doch au in der BaZ dr Somm go uusestryyche

Als Rambass hesch mit däm Kulturvertraag scho dini Miee
Mir loi öis doch vo deenä dört nid d Hoose abäziee
S Woort Verdraag versteue mer, do si mer au nid stuur
Nur was zum Gugger heisst denn überhaupt das Wort Kultuur?

Sii, hänn Si das au vernoo: Es git jetz nei fir s Kätzli
e Halsband, wo vibriere duet, wenn s Whiskas git am Blätzli
Jetz gisch denn glyy em Ehemaa per Ehering z verstoo
Är sott denn noon em zwaite Bier so langsam haimekoo

D Finanzwält lauft hitt digitaal, dien alli Meedie brichte
Me will sogaar in näggschter Zyt uff s Baargäld ganz verzichte
Uus unsrer Sicht sinn d Folge vo däm Trend sensazionell
Dr Finanzchef Ueli Maurer git s denn numme no virtuell

Dr Bond, dä koschted Ängland e rächti Stange Gäld
Sprängt Hyyser, ganzi Stroosse, zer Rettig vo dr Wält
Au dr Wessels macht gäärn Lecher, das wissen alli Lyt
Das koschted au vyyl Gäld, numme rette duet er nyt

Die Sunnefinschternis het fascht alli fasziniert
Nur in dr USA het das niemerem imponiert
Bi iine gääbs das dääglig, maine d Amis sälbschtverliebt
Wenn d Kim Kardashian s Fuudi vor dr Sunne duureschiebt

Sii, hänn Si das au scho gheert, s Fümoar schliesst s Byyroo
Jetz hämmer uus em Rauchergrais dr woori Grund vernoo
Dr Nanni und dr Julliard, die qualme wie zwai Drache
und sotte schyynts by VW non en Abgaastescht lo mache

Dr Baschi Dürr luegt Tatort, naai! – do lytted s Deelifoon
Dr Lips isch draa und maint nur: “Chef, mir stiirme die Baschtioon!”
“Mach nyt!” maint do dr Dürr zue iim, “due nit interveniere
und soorg no derfiir, ass ain das duet fird BaZ brotokolliere!”

Mir hänn in unsrer Lieblingsbaiz dr Källner aanegwungge
Als Menukaarte bringt er is e 7 Kilo Schungge
Grad under dr Lasagne stoot, me mecht no deglariere,
dass es kaini Kie drinn het, wo kenne galoppiere
Dr Fisch isch fir Allergiker e verbotteni Zoone
Zwoor findsch im Fisch kai Fisch, derfiir e Huffe Sojaboone
S Broot kennt – jetz bassed uff! – e Spyyrli Määl enthalte
Derfiir isch s glunge, uus em Kääs, d Milch komplett dusse z bhalte
D Chips sinn alli biofrisch uus Häärdepfel und Dommaate
Und wenn emool eppis heerter isch, no wäär s e Handgranaate
S Elsass gilt als Uursprungsoort fir Schnägge, Fresch und Lämmli
Dr Flaischkääs kunnt elai uus Weil, und neischtens mid em Drämmli
D Serviette hänn si z Indie vo Kinderhänd lo falte
Zaanstocher schnitzt in Aasien e Chinees, e son en Alte
Als Abgang kennt me non e russische Wodka haa
Aber laider gits dä numme no mit Anaboolika
Jetz wäär e Gleesli Wysse guet, und e Schnitzel scheen baniert
Mittlerwyylen isch dr Källner aber laider bangsioniert

Väärs 2015

Erootisch het e scheeni Frau dr Geri lyycht erregt
wie kumm y an die aane? Het er sofort iberlegt.
No het er mit sym Ai-Phone schnäll e Pfyffli-Bildli gschiggt
will jeedi Frau bim Aabligg vom sim Gsicht no mee verschriggt.

Uff em Fluugblatz gitt ain Groossalaarm, e huuffe Lyt verschregge
d Fyyrweer duet die ganzi Bischte grad mit Schuum bedegge.
E Lootse vor sym Bildschirm sait mit gfasster Stimm: „Verstande!
Alles isch baraad, dr Simon Ammann ka jetz lande!“

‚Lügen haben kurze Beine‘, das Sprichwoort kennt e jeede
daas duet dr „Fall Pistorius“ au grichtlig glaar beleege.
Wenn s esoo isch, mechte mir do ganz kurz noochedopple
miesti dr Sepp Blatter uff sym Fuudi ummehopple.

Bim neye Huftglängg het dr Wessels e baar Frangge welle spaare
jetz quietscht und steent und gyyrt das Ding, graad wien en Tschätterkaare
drum wänn jetz d Äärzt, wie me so heert, nimm lang diskutiere
und das Combino- Schrottscharnier wider uusen operiere.

Im Kindsgi leere d Binggis hitte quasi iber Nacht
nääbe Franzi, Dytsch und Änglisch grad no wie me Kinder macht.
Jetz mien si nur no leere – mir sinn sicher, ass das glingt –
dass me voor em Schwätze zeerscht dr Nuggi uusenimmt.

Dr Bulle Yoga joomered, woon äär grad s Roosy deggt
im neye Huus wird s Fueter schyynts ganz raffiniert versteggt.
Do drumbeeted s Roosy zrugg: dängg doch au ans Gsellige!
Derfiir han y deert vyyl mee Blatz fir mega haissi Stellige.

“Hashtag”, s Woort vom Joor, riert dr Baschi Dürr zue Drääne
är findet s toll, ass so vyl Lyt sy “Wäschdaag” dien erwääne.
Dr Polo Hofer maint, das Woort syg en alte Huet
will är syt 50 Joor so “Haschdääg” pflääge duet.

D Stadt kiirzt d Keschten iiberaal, si muess jetz ändlig spaare
wäär Soziaalhilf griegt daarf kimpftig nimme mit sym Auti faare
mir finde s guet, will mir fymf im Gundeli dien woone
das wird scho glyy, mir fraien uns, zer autofreye Zoone.

Siiben Eff, sächzää uu, zwelf cee, sibzää ee,
nyyn gee, siibe haa, vierzää dee, acht bee.
Daas het nyt mit Algebra z due, wie Sii villicht jetz dängge
soo deents wenn z Basel Kinder spiile „Baggerschiff versängge“.

Dä Longchamp isch e Brachtschenyy bi Stimm- und Waalbrognoose
uff hundert so Brognoose geen rund nyynzig voll in d Hoose
jä Sii, das isch kai Wunder, mir sinn beschtens informiert
dää hett schyynts iiber fuffzää Joor im Muotathal studiert.

E rächte Schwyzer glopft als zoobe gäärn e flotte Jass
zwaihundert vo vier Buure wyyse macht doch jeedem Spass
das Spiil wird bald verbotte! Will – jetz mien er aber loose!
Die Buure geege d Fraueqoote ganz massiv verstoosse!

Dr Santiglaus het sy Uffdritt im Dezämber schlächt vergraftet
dr Schmutzli het kai Visum ghaa – do hänn s en grad verhaftet.
Sy alten Eesel isch druffaabe spuurlos grad verschwunde
me hett en denn bi Carna Grischa speeter wider gfunde.
Em ene Maa mit langem Baart kasch laider hitte nimme draue,
drum hänn en ebbe zwanzig Schugger preventyyv verhaue.
Dää bruun Sagg, hänn d Schrooter dänggt, dä kennti gfäärlig syy
no hänn s en gsprängt und voorsichtshalber no versänggt im Ryy.
Als Stroof hänn si em Santiglaus e Haanekamm frisiert
und iin uff Ziiri zem Verheer zem Schawinski deportiert.
D Bolyzey isch schuurig stolz, berait zue neye Daate
s näggscht Joor wänn si an dr Gränzen uff s Grischtkindli waarte.

Väärs 2014

Uus Versee isch unsere Labtop samt dr Wesch in Tumbler groote
wie dr Labtop noochäär uusgsee het, wämmer lieber nit verroote
uff em e Floomäärt het s ain gsee und sich begaischteret derfiir
jetz stoot dä Schrott als Kunschtwäärgg hinderem Pult vom Baschi Dürr.

Dr Polo Hofer het fir d Boscht e scheeni Maargge gmoolt
unseri Binggis finde s gail und hänn grad dausig ghoolt.
Sie schläggen an dääne Maargge, in Gruppen und ellai
will alles wo vom Polo kunnt, macht doch sicher high.

Die Druurfyyr in Syydafrika het d Mentsche dieff beriert
au dää mit dr Gebäärdesprooch het uns no imponiert
dä kennt in Basel de Tourischte doch ergläären uff die Aart
wie me vom Clarablatz im Auti rasch zem Määrtblatz iiberefaart.

D Frau Müller woont im Altershaim und loot sich gäärn verweene
s ainzig wo si driiber glaggt, sinn alli Daag d Sireene
dr Doggter dänggt an Tinitus, en ussergweenlig feschte
s isch em Baschi Dürr sy Schrillalaarm, wo d Grufti ständig teschte.

Im Ziggzagg faart e Frau in Ziiri znacht ellai duur d Stroosse
e Schugger wo si stoppt sait kuurz: „Jä jetz mien si halt bloose!“
Do sait die Schaabe: „Noo so gäärn! Y ha scho Schlimmers gsee!
Y schaff fir e Verwaltigsroot bi dr Basler BVB!“

D Angie het uff Langlaufschyy d Alpe welle rogge
si paddlet langsam d Loipen ab, dä haissi dralli Mogge
uff aimool kippt si um im Schnee, s het laider nit so gfäggt
vermuetlig het au sii die Polo Hofer-Maargge gschläggt.

Mir wisse wäär vo Iine Alimänte zaale muess
und au wäär wäägem Raase gstrooft wird mit ere hooche Buess
mir kenne die wo gärn im Buff haimlig ummeschlieche
voruusgsetzt dass Si d Rächnig via d COOP-Bangg dien beglieche.

D Emine sait zem Petkovic: „Dy Waal beduur y
als Nati-Trainer gseen ych nämmlig nur my liebe Muri!
Dää ka lääse, rächne, schwätzen und das alles ‘Zacki Zacki’
und wenn das gar nit neetig isch, denn hätt ych no dr Haki!“

Bi dr Volksabstimmig zer Yywanderig stimme mänggi joo
uus Angscht, d Ussländer wurde sunscht unseri Stelle bikoo.
Vyyl Jungi sueche drgääge im Nai ir Hail
en Ussländer macht my Aarbed? Das isch doch mega gail!

„Was isch „Broschdiduzioon“? Froggt s Vreeneli sy Mamme.
Die sait: „s gitt Fraue wo dien Schmitzlen und no Gäld derfiir verlange“.
„Dasch mega gail!“ Sait s Vreenli, „ab sofort griegt, dasch glaar
d Dante Beet vo mir kai Schmutz me – under zwanzig Stutz in baar!“

Dr Streller schreyt zem Schiri: „Du bisch jo nit ganz dicht!“
Dr Blick polemisiert die Gschicht – dr Pipi kunnt vor Gricht.
Dr Schiri hyylt: „Dä Spruch isch fyys und stimmt nit zletschtamänd
y bi doch in mym Alter sicher nit inkontinänt“.

Im Fäärnsee zaige si e Räntner, wo senyyl isch und nur fluecht
är schwätzt wien e Buur wo leedig isch und aini suecht
vo däm schreege Typ griegsch fascht en Allergie
do meergge mir: dasch jo dr Film vom Blocher syner Biographie.

D Oprah Winfrey kunnt uus Hollywood, in Ziiri isch s bassiert
bym Kommissieenlen an dr Bahnhofstrooss wird si schigganiert
si maint wäägen irer Huutfarb wurd d Verkaiffere nit waarm
drbyy isch das ganz generell dr typisch Ziircher Charme.
Dr BVB Verwaltigsroot drifft sich zuen ere Sitzig
dr Breesi sait woo s duuregoot, das finden alli witzig.
Dr Baumgartner loost no gar nit zue, är schwätzt no mit em Lotti:
„gib du mir dy Nummere denn bekunnsch e flotti Fotti.“
Drnoo goot s um en exklusivi VR Grupperais
daas kunnt nit ins Protokoll, sunscht git s e Riisemais.
E Rais uff Limburg, hänn sie dänggt, wäär bigoscht no gail
am Spootprogramm in sym Palascht näämt au dr Bischof dail.
Jetz foot d Sitzig richtig aa, die maischte hänn scho Hunger
dr Breesi macht e myyses Gsicht, me gseet, är het e Kummer.
S goot nämmlig bym Traktandum ains um sy liebe Soon
dä bruucht en Auti, Wyterbildig und drzue mee Loon.
Bym Traktandum zwai wird d Stimmig bletzlig hitzig
wägedäm verschiebt me s Thema uff die näggschti Sitzig.
S Thema ‚Byyliee Automaate‘ schloot em VR uf e Maage
zue däre hoch kompläxe Sach waiss kainen eppis z saage.
S Traktandum drey bedrifft am Äscheblatz e hyffig gsteerti Waiche
jetz git s e Kaffipause will ain dringend muess go saiche.
Luut Punggt vier sott d BVB ganz dringend neyi Drämmli haa
dr Grund isch dass me dääwääg nootloos wyterschmiire kaa.
Zem Schluss kunnt wie an jeeder Sitzig no dr Punggt ‘Diväärses’
dr Baumi macht e fuule Witz, är het gmaint s haisst ‘Perväärses’.
Do gseesch, was im Verwaltigsroot so alles ka bassiere
wenn die em Polo Hofer syni Maarggen inhaliere.

Väärs 2013

S nei Affehuus im Zolli isch vo Fachlyt konschtruiert
d Affe findes gail und gniesse s Lääben unscheniert
nit wyt ewägg gseesch s Geegedail – e Saich, e ganz e schlimme
dr Wooghoof isch vo Affe baut und d Fachlyt hogge dinne.

Dr Gschichts-Brofässer Mörgeli stoosst me vo sym Soggel
e Stuudie kunnt zem Schluss, är haig dr IQ vo däm Zottel
dä Verglyych muess men uus unsrer Sicht e bitz relativiere
kuum epper ka so guet wien äär sy Fryyse konserviere.

E Stuudie zaigt mit Bilder und e huffe gscheide Woort
d Basler Drämmli syygen alt und biete kai Komfort
das wisse mir scho lang – das het e ghaime Grund
dä Schrott wird als Ersatzdail bruucht, wenn dr Gripen ändlig kunnt.

Noo joorelangem Twittere het d Frau Rickli kuum me Graft
ussbrennt wird si schliesslig in e Näärveglyynig gschafft
ire Zuestand stimmt uns soorgevoll, ständig duet si toobe
nit ebbe wills kai WLAN het, nai, wäge de vyyle Schwoobe!

Dä Varone ka bim beschte Willen aifach nit begryffe,
dass men iim wäge däm Grimpelstai partout wott d Aier schlyffe
em Baschi Dürr wär son e Draama allwääg kuum bassiert
är hätt dä Stai am näggschte Butzdaag hegschtens uffboliert.

Dr Blocher inveschtiert in d BaZ – die Iberraschig sitzt
jetzt bruucht är non e Kenner, wo iin fachlig understitzt
mir Bääse dien dr näggschti Coup doo exklusiv verroote
dr -minu wird Verwaltigsroot – wäge dr Frauequoote.

En Öösi, wo mit Iiberschall ans Zyyl kunnt, das isch sälte
mir zwyyflen aber dass dä Fall als Wältrekord ka gälte
vor kuurzem isch doo z Basel nämmlig, s isch d Woored und nit glooge
ain namens Heiko Vogel dytlig schnäller gflooge.

Dr Grooss Root isch nei gwäält, uns het s nit dieff beriert
dä Zirkus hämmer hinder is, das haisst dr Mischt isch gfiert
wär bhauptet, s syyg jetz besser, dä duet offesichtlig liege
dr Mischtstogg isch dr glyych – s het nummen e baar neyi Fliege.

Är gumpt wie lätz im Grais – und waggled mid em Hinder
denn schwingt er mit den Ärm – grad wie die glaine Kinder
und kunnt är schliesslig aa im Zyyl bisch froo isch alles hail
dr Janka macht hitt aimool mee – e Faart im Gangnam Style.

Em Carlo Janka faart dr Dierschutz groob an Kaare
är haig im letschte Renne glatt drey Schnäggen iberfaare
„joo, das gib y zue“ sait är, das miess me halt verstoo
die Viicher syyge dummerwyys vo hinde z raase koo.

D EU schigganiert ys dääglig, s isch efang zem Raase
fir Millionääre syyge mir e styyrligi Oase!
En Oase simmer gäärn, das macht ys stolz und steert ys nit
s bedyted, ass es um uns umme numme Wieschti git.

S git nit nummen Ooschteraier – s git au feini Spiegelaier
s git groossi Aier, glaini Aier, haarti, waichi, Bio-Aier
s Landai isch bekannt, und au die vyyle hoolen Aier
z Basel am Tattoo git s neischtens au no Lachem-Aier!

D UBS baut Stellen ab und redimensioniert
d Frau Widmer-Schlumpf het sofort und ganz häärzlig gratuliert
mir Bääse gratulieren au – iroonisch und als Gspässli
die Bangg isch uff em Wääg duur s wältwyt lengschti Gläbbergässli.

Dr Berlusconi schreggt vor nyt me zrugg, in sym Alter duet s bressiere
är loot sich in ere Ziircher Glyynig d Fratze dabbeziere
d Rächnig fir dä Umbau schiggt er zrugg mid eme Sätzli:
„im Alpetransversaale-Deal hets sicher non e Blätzli!“

Am Songcontest soll d Heilsarmee für d Schwyz e Liedli singe
die wäärde mit däm Liedli aimool mee kai Pinggtli gwinne
mir hätten en Idee wie d Schwyz kennt punggten ooni Noot
me miesst d Statischtig aifach rächne loo in Bäärn vom Ständeroot.

Dr Alain goot uff d Faarma loos, dr Hannes het s zem Ganges driibe
dr Didier gilt zwoor als famoos, das het er aber sälber gschriibe
dr Ueli liebt dr Iiberschall, d Schweede dien ems nit veriible
d Evelyne blybt haart am Ball und het dr Staibrugg paggt am Fiidle
d Simonetta isch fir Windgraftwäärgg, s Doris lächled iberdriibe
s isch wie bim Grimm und syne Zwäärgg – Gottseidangg sinn s numme siibe!

---

Väärs 2012

E Frau duet mit vyyl Breesmeli e Duubeschaar verweene
bletzlig stiirmt vom Spiegelhoof e Ysatzgruppe d’Szeene
“Hann Si’s denn nit glääse” schreyt dr Chef ins Megafoon
“s nei Waffegsetz verbietet glibb und glaar Streymunizioon!”

Doo e weenig falte und deert e bitzli biege
hänmer alli Inbuschlissel? S isch wiirgglig kai Vergniege
Bauaalaitige fir’s Ikea-Gstell ka me no gnabb verstoo
numme: wie soll das bi Kampfflugzyyg us Skandinavie goo?

Dr zu Guttenberg hett schynts ellai e digge Schungge gschriibe
ganz eerlig: uns isch nit grad vyyl vom dinnen Inhalt bliibe
dr Titel “Vorest gescheitert” isch ainewääg e glungeni Idee
das kennt dr näggschti Waalspruch syy vo dr SVP

Im Zolli im Aquarium het uns dr Schlaag fascht driffe
mir sinn an kim Jong Un- dää vo Nordkorea – aanegloffe
drotz Telebasel, Bligg und BaZ isch die Gschicht sofort vom Disch
s isch nit dr Kim Jong Un, nur so-ne digge Kuugelfisch

D Frau Käller wird bald hundert und isch gaischtig no guet druff
numme d’Bai wänn nimm so rächt, das macht si langsam muff
Fascht jeedi Wuche gheyt si um – das koschted Schmäärz und Quaale
Jetz het si d’Granggekasse gfrogt: “ab wenn grieg y d Fallpauschaale”

Im Baselbiet hett’s iiberaal e Defibrillatoore-Set
Defibrillatoore bruuchsch, wenn ain e Häärzkaschper hett
kippt ain us de Latsche, riefsch: y muess e Defibrillator haa
Aber bis daas gaxt hesch, het dä scho sy Lyychehemmli aa

Dr Bond wird 50 Joor, das will me richtig fyyre
drum soll e neie Spion de Ganoove noochespyyre
als Bond wird dr Schneider-Ammann gwält, do kemmen ys fascht d Drääne
dä het zwoor kai Lizänz zem Kille, derfiir aini zem Gääne

Dr Zottel vo dr SVP isch arg draumatisiert
sy hänn en schwarz bespreyt und wie dr Mörgeli frisiert
und doch het är iberläbbt und graast scho wiider duss
so schnäll stärbe bi dr SVP die Meggerer nit us

D Bangg Saarasi het me verkauft – wie ieblig haisst s jetz “spaare
d safra will jo schliesslig satti Geinn yyfaare
als Luxus kemme Faarbkopie nimmen in Betracht
wenns syy muess wird vom Bildschirm halt e Foti gmacht

D Geriatrie vom Felix Platter soll uff’s Bruederholz verschwinde
die Schnappsidee kunnt – typisch – vo de Rammler z Lieschtel hinde
unsere Ghaimtipp kunnt vyyl billiger und d Laag isch ideaal
s goot nimm lang gitts Blatz zem Nulltaryyf uff em Stücki-Areaal

Miir fimf sinn duur e Gotthard gfaare – duur die ängi Reere
und drifft fascht dr Schlaag wo mir e Veloglogge heere
s stramplet epper an uns verbyy, duet diirggisch Liedli singe
d Mamme will em Hakan Yakin no schnäll sy Znyyni bringe

Im Coop hänn d Metzger am Laadedisch unmoraalisch ghandled
pouletschänggel us poole hänn si in Schwyzer Chicks verwandled
dr Coop drybt s findet d SVP, langsam wiirgglig z bunt
jä stelle Si sich voor: wenn s doo zem Familienoochzuug kunnt!

Hänn Si s scho gsee? Hänn Si s vernoo?
Mer hänn e neie Look bikoo
s git Kaffiglatsch ganz hamdverlääse
frisch serviert vo uns Rätschbääse

Dr Torsten isch- das isch nit glooge
dr Torsten isch uff Hamburg gflooge
kumm isch är deert gsi – dä Blagööri
het är langi Zyt griegt noo dr Oeri

Wär winggt deert hinde vo däm Uufer?
Es isch e gschlyymte Italo-Schnuufer
und nääbedraa e Riise-Schatte
vo synere gstrandete Fregatte

Dr Guy Morin – das sell s schyynts gää
het e Halbstund gschwätzt ganz ooni ää
syni Reede duet är schryybe loo
so het är mee Zyt fir d Apéro

Dr Steven Jobs – e Messias light
erwartet sy Dood voll Seeligkait
är het halt – s schläggt kai Gais ewägg
e Wiiderufferstehigs-App

Dr Herrmann Lei het iiber Nacht
e Bangguuszugs-Collage gmacht
das Wäärgg verdient – s isch gar nit myys
dr Xamax-Tschagajew-Fälscherbryys

Stellsch d Mappen im Zuug uff en aigene Sitz
wirsch vom kondukteur biesst – das isch kai Witz
zeerscht muess dää aber – au nit glooge
no d Mappe noon em Billijée frooge

Hänn Si s scho gsee? Hänn Si s vernoo
Mer mien e Ruundi wyter goo
falls aini nimme singe kaa
denn hoole mer d Lys Assia!