---

Väärs 2024

Do letschti hani KI teschtet, das sig so super-schlau
“Schrieb mir doch e Schnitzelbangg über d’Figur vo minere Frau”
Sofort isch e Antwort cho, i ha d’Auge miesse riebe
“Hösch, i bi nit läbensmied, dä Värs chasch sälber schriebe»

Trotz Bagger uf em Gletscher, hesch no kei Renne gseh
S’Zermatt laufts nit ganz optimal, fascht wie bim FCB
Doch die hei s’Saisonziel erreicht, das Tema isch zämmegschweisst
Denn jede Spieler weiss jetz scho, wie dr aktuell Trainer heisst

Dr Schorsch tuet nit gärn schaffe, gäll, me gsehts im a
Dä streikt vor jedem Bewerbigsgspröch, er muess da halt nit ha
O bim letschte Gspröch isch er vill z’spoht, Pünktlichkeit? Egal!
Do seit dä Herr vo dr Dütsche Bahn: “Sie passen ideal”

Sex Skandal bi Rammstein, dass si schlimmi Finger
Sodom und Gomorra, mit villne z‘ junge Dinger
Jetz si si aber stroffrei bliebe, denn si hei – hejo
Zu ihrer Strofverteidigung die kath. Chilche gno

Nach em Tod vom Kaiser Franz si Dütschland Trikots gfroggt
Und nach em Tod het d’Tina Turner d’Hitparade groggt
Es dreit e neue Beatles Song uf de Platteteller
Und nach em Tod vom Berlusconi gheit dr Viagra Kurs i Chäller

Er isch e stolze Jäger, pirscht sich langsam a
Jagd i fremde Territorie, s‘hei nit all Freud dra
Er wird frech und frecher, o s Rudel het gnue gha
Wie für e Wolf wird’s Konsequenze für e Jositsch ha

Die arme Buure z’Deutschland, die si nid z’beniede
Was die miesse dure mache, wie sie miesse liede
Für alli ihri Usflüg uf Berlin und so
Hei die wägem Bahnstreik mit em Traktor miesse go

Elternteil 1 an Elternteil 2, xiesem Kind goths schlächt
Bösewichtin betriegt e Gästin, so schriebt me woke-gerecht
Öbber isch do voll im Trend, gedanklich tuet‘s eim weh
Denn genderfründlich isch nur dr Name, bi dr ES-VP

Endlich si mir Bundesrot, Merci Beat Jans
Mir hoffe s’Flüchtlingswese wird kei z’grosse Eiertanz
Eier het Baume-Schneider keini, si tuet lieber Schöfli züchte
Si het wohl gmeint im Flüchtlingswese miess me selber flüchte

127 127 12…konzentriere
127 127, ghörsch mi repetiere
So lauf i immer dure Coop, im Alter tuet’s sich lohne
Süscht vergiss i bis zum Wääge no s’Nümmerli vo de Bohne

Die Griene kämpfe mit em grosse Wähler-Schwund
Und s’Greta het zur Hamas gwächslet, fürs Klima lauft’s nit rund
Dr Putin hät e Lösig, sogar dr Tump meint: “Mann jetz spinnt er”
Gege heissi Summer hilft e nukleare Winter

Dä do isch no Single, gebildet, hübsch und schlau
I ha ne Inserätli gschalte: Sexy Schorsch sucht Frau
Gmäldet hei sich 100 Manne: Grossi, diggi, chlini
Die hei mir alli s gliche gschriebe: “Bitte nimm doch mini!”

Väärs 2023

Vo Maa im Rock bis Flexitarier, alls wird respektiert
Sogar mir Laufetaler si zBasel toleriert
Öb Moslem, Hindu, free-vegan, öb Frau, Queer oder Maa
Numme öbbis isch tabu: Dörfsch keini Rastas ha

Bi de Klima-Chläber, isch Polizei am Start
Me risst se vo de Strosse, brutal und knüppelhart
I frog wieso cha me das denn, im Rothuus nit erlebe
Dört tie si doch sit Johre scho a ihrne Sässel chläbe

Liebi Eva Herzog, euses Herz tuet weh
Verliere isch halt Scheisse, frog mol dr FCB
Genauso wie im Schutte isch kämpfe nie für d’ Chatz
Vielleicht stohts jo scho morni im Blick, dr Alain macht für di Platz

Uf dr Gschänggli – Suechi für mi Teenie-Nichte
Bi n’i ihri Facebook- und d’Insta-Posts go sichte
Schnell isch mir klar was si no brucht, muess gar nümm witter dängge
Und tue ihre öbbis zum Alegge und e Duden schängge

E Bekannte us England het mir brichtet, ihm sig Schlimms passiert
“My mother has just passed away”, do ha n‘em kondoliert
Das mit dr Muetter gieng jo no, er meint das isch nit s’Toughe
Er miessi jetzt mit 74 plötzlich afo schaffe

Will dr Schorsch jetz älter wird und nümm a alles dänggt
Ha n’i ihm e topmoderns, Seniore-Navi gschänggt
Das tuet ihm nit nur d‘Streggi Schritt für Schritt verzelle
Sondern o was er am Ziel eigentlich het welle

Letschti seit mi Sohn zu mir: “Paps, ig wird jetz ‘rich’
I wird e Social Media Star, krieg jedi hübschi …Frau!”
“Jetz mach mol halblang”, säg i schroff, “du chliine Hobby-Stenzer
Numme will du Grippe hesch bisch no lang kei Influenzer”

15 Wahlgäng, ei Tumult, jä d’Amis si am Spinne
Korräggt seit me däm hüt Banana-Republik-aner / Inne
Bim Biden fingt me Gheimpapier, doch dä wird nit mol rot
Er freut sich, dass er wieder weiss, wo si Garage stoht

Im Trämli ghöri wie zwe Jungs heftig diskutiere
Hey Alte, Mann, dä Putin weisch, tuet alles sabotiere
Was haltisch du vo Nordstream 2 und allem was isch gscheh?
Do seit dr Anger: “weiss i nit‘, has 1 jo gar nit gseh

Dr Ronaldo jo dr Schutter, isch doch ganz e Arme
Kei würdevolls-Karriere-Änd, nur d’Saudis hei Erbarme
Alli meine s’Geld het gloggt, doch öbbis reizt ihn meh
Er wett doch so ne sexy, Messi-Negligé

FIFAntino-Liedli:

Er fühlt sich katarisch, er fühlt sich so cool
Er fühlt sich behindert und glichzitig schwul
Als Frau fühlt er sich aber, trotz allem nit
Wills die jo in Katar und dr Fifa nit git

Wär schriebt so ne Red vo allne Geischter verloh?
Das isch dr FIFAntino

Dä Humor i dr FIFA, jä dä fing i dr Hit
Dr Gianni seit ernsthaft:”Korruption gits do nit”
Gits doch e Problem trifft dr Staatsawalt i
Doch nach denä Träffe, hei all Amnesie

Dr Lauber isch gange und wer isch no do
Das isch dr FIFAntino

Im 18i z’Russland bim Putin dehei
O im 22 z’Katar, regiert ein ällei
Im 26 wirds nach Amerika go
Und wenn alles guet lauft isch dr Trump wieder do

All sini Fründe, Diktatore und Co.
Das isch dr FIFAntino

Bim Interview wo euser Fernseh tuet sände
Zeigt er Bild vo sine Fuessball – Legende
Für ihn cha me druffe die – zwe Gröschte gseh
E Selfie vom Gianni mit em Sarg vom Pele

Grössewahn het e neue Name übercho
Das isch dr FIFAntino

Kurz vor dr WM het er ä n’Idee
E Waffestillstang, würd er gärn gseh
Drey Wuche Pause, es tuet niemer meh schiesse
So chönnt d’Ukraine, die WM o gniesse

Wer verzellt so ne Stuss, das chönnt vom Donald cho
Das isch dr FIFAntino

Sponsore, Streaming, alles FIFA-gerecht
Jede wird usgsuugt, es wird eim fascht schlächt
Es gieng nur ums Geld, dass sigi e Hohn
Als Walliser macht er’s doch für Gottes Lohn

Wär het vom Scheich e chlini Villa übercho
Das isch dr FIFAntino

Doch üfgepasst Gianni, s’letscht Stundie het gschlagu
Dr Tschugger vom Wollis ja der will der ane Chragu
Er wird di verhaftu, ja da kennt är key Gnad
Und het für di Nachfolg scho n’e Leesig parat

Er kennt ey Kolleg vo schinem Schwager vom Vater
S’isch dr Enkel vom Blatter