Der Knallfrosch entstand im Jahr 2024 und wurde 2025 erstmals an der Basler Fasnacht gesichtet. Er ist etwas durchgeknallt und genau so nimmt er auch das eine oder andere Thema auf die Schippe.
Väärs 2025
I ha e Fotti vo miir in dr Stadt uffghänggt,
ha welle luege ebbs miir au deert aane länggt.
I wäär ganz sicher kai Exoot,
als Gnallfrosch deert im grosse Root.
In grosse Root,wäär hätt das dänggt,
hett s miir nur ganz gnabb nid glänggt.
I gib nid uff,i weiss wie s goot,
i mäld mi grad in Bundesroot.
Dr Heinz het im Rächne e Drei.
Dr Babbe macht e riise Gschrey.
Dr Heinz maint,die Rächnig stimmt genau,
exaggt wie die vo dr AHV.
Dä ESC in Basel find yych grandios.
Gniesseds Bebbi,feschtet,geen uff d Stroos
S Käller Esthi,unseri Baudepschaabe,
ka denne kaini Lecher graabe.
An dr Olympiade,do bxe zwai Fraue.
Oder sinn das zwai Männer wo sich verhaue?
E Expäärtemainig wird empfoole,
die ka yych grad bym Nemo hoole.
Wenn ebbis nimmsch wo dir nid gheere duet,
no sait me,das isch gstoole, das isch gaar nid guet.
Jezz gits no Lyt, miir wiird graschlächt,
die finde, dä Putin, dä macht alles rächt.
My Noochbere, die losst s lo grache,
duet jeede daag e Gliggsspiil mache.
Si luegt uff d Aazaig all halb Stund,
eb au s richtig Drämmli kunnt.
E Brief verschigge mit dr Duube isch passee,
Dampfmaschine duets nimm gee.
Dinosaurier seesch au kaini mee,
nur dr Röschti wott no AKW.
Letschti han i my Holzressli verschänggt,
ha derby nid beeses dänggt.
Jezz duet das Ressli mit e me Holzkopf druff renne,
im Appizäll wo si dr Böög dien verbrenne.
Uff dr Autibaan, mit viil Grache,
landet e Flieger mit dreyhundert Sache.
Deert stoot dä Vogel und duet waarte,
em Bund fäält s Gäld zem wiider staarte.
Mit em Schakiri schuttet bym FCB e alte,
jezz mien si luege, das si dä kenne bhalte.
E andere fänd e zruggkoo au no glatt,
wie wäärs mit em Karli Odermatt?!
Mit finfesächzig losch di by uns bangsioniere.
Mit finfesibzig goosch mit em Rolator go flaniere.
Bisch achzig und ganz lyycht demänt,
no wiirsch by de Yänkis Bresidänt.
Uff s griene Gras machts Hundeli,
e bruuns grosses Pfundeli.
Z Arabie seet das so e Joggi
und erfindet d Dubaischoggi.
Es baut, es staibt, s duet rattere,
wie kumm yych jezz uf Prattele?
I glaub, i gang vo jezz a z Fuess.
An d BVB e liebe Gruess.
Die neyi Musical Schwimmhalle,
die wird famoos, doch wiirsch dr Gaischt vom Huus nid loos.
S Phantom of de Opera
het blezzlig e Badheesli a.
D Baume Schneider, unser SP Schoof,
wandlet duur s Bundeshuus im Schloof.
I wott bym dräume jo nid steere,
s wäär nätt, me wuurd mool ebbis heere.
Es schneielet es beielet,es hett e huffe Schnee.
Vergässe was me jezz do macht,jä das hett d BVB.
Ganz iiberrascht vergoot ne s Lache.
Jezz mien si no e Duurchsaag mache:
“Do isch d Laitstell vo dr BVB.
Es schneit,es hat ein bizzli Schnee.
Wir entschuldigen uns für die prekäre Laag.
Für uns ischt heut ein schlechter Tag.
Sie müssen iire Strecke nun halt laufen.
Aber bitte,vorhäär noch ein Billjee kaufen!”