-> Do wiirsch Fan vo dr Giftspritzi uff Facebook

---

Väärs 2024

Wäg em Klima duen ych proklamiere:
Sott me d Fasnacht an Oschtere duurefiehre!
Am Karfryttig ney dr Moorgestraich
Am Oschtermääntig s Ändi, s wäär kai Saich
E Joorhundert-Fasnacht, weisch wie schöön?
Wenn alli Schwoobe denn am Gotthard stööhn!

«Än Negativ-Rekord!» hänn d Ziircher klagt
Wo’s dr Böögg erscht noon ere Stund verjaggt
Si waarte und waarte und waarte und waarte
Si waarte «im Kräisli» ganz gspannt, die Smaarte
Denn verdätschts dr Böögg … und waisch wieso?
Jä, dr Gschiider git halt IMMER noo…

Bi dr katholisch Kirche, deert git’s Gschtalte
Die bruuche d Händ nit nur zem Falte
Dr Papscht het gschnäll e Löösig gfunde
Und dääne d Luscht grad unterbunde;
Uff dr Bischofskonferänz git’s jetzt am Nüüni
Kaini Fuudiweggli mee zem Znüüni

Bassed uff, ihr liebe Lyt
Sind emool still, beweeget nyt
Jetzt kunnt en ultimatiive Tescht:
Heebet Eych bim Disch an dr Kante fescht
«Jä hallo – sinn doo d Bolizischte?
Do hets e Saal voll Klääber-Aggtivischte!»

Mi Bueb, dr Fridolin; han ys scho verzellt?
Het bim Chrischtkindli soon e Barbie bschtellt
Aini im pinkige Glaid, mit pinkige Schueh
Und schööne blonde Hoor derzue
Aber will är ständig fluecht und zwängt
Het’s halt nur fir e Martullo-Püppli glängt

Zer Beärdigung vom Silvio
Sinn e huffe jungi Daame khoo …
Si sinn sofoort zu sym Säärgli g‘rennt
Hänn dr Berlusconi grad erkennt
Dasch ebbis won‘ych guet begryff:
Die kenne dää jo numme styff!

Es sait ganz glaar dr Albäääärt Röschti
D SRG syg nimmi s Grööschti
Drum muess me deert d Gälder abefaahre
Und iiberaal, wo meegligg, spaare
Die erschti Massnahm vo dr SRG:
In dr Kantiine gits kai Röschti mee

Loosed zue: mir muess es glinge
Miini Väärs bitz schnäller z bringe
Dr Baizer duet mi fascht scho zwinge
Ych soll jetzt in Rekoordzyt singe
Y kha‘s verstoo, me waiss jo nit
Ebbs die Baiz doo in zwai Stund no git!

Hinter dääre Schyyn-Fassaade
Het’s e riisegroosse Schaade
Finanziell kaputt, das waiss me doch
Gwissi saage, es syg e Loch
Ych schwätz nit vom Globus bim Määrtblatz unde
Ha grad nur kai Fotti vom Dääge gfunde!

Vom Grümpeliclub bin ych Bresidänt
Im Chörli, deert bin y als Vize bresänt
Im Pilzverein daarf y Kassier syy
Im Briefmarggeclub bin y als Schryyber drbyy
Und bi jeedem Amt, s isch nit z begriesse
Han y wägem Jositsch in e zwaite Wahlgang miesse

E Ruggwärts-Salto, ganz e Struube
Vier Pirouette gfolgt von ere halbe Schruube
D Landig fäählerfrey inszeniert:
E Dreiersprung, mit-me Spagat garniert
No hälfe sy ihm uff, mit vyyl Geduld
Und beglaite dr Joe Biden ans Rednerpult

Hirnerschütterig, e verboogene Zingge
S Ässe e baar Dääg nur als Dringge
Säggs Rippe quätscht, vier Blombe duss
Unde isch mi Glai au nimm im Schuss
Wieso kauf ych au, ych dumme Joggi
Bim Läderach no Kopfnuss-Schoggi?

E digge Freier, e zimmligs Fass
E schwääri Schnalle uss dr Wääbergass
Hänn «voogelfrey» bitz z wöörtligg gnoo
Drum sinn baidi denn ins Gfängnis khoo
Me waiss doch langsam, bitte sehr?
Uff dr Margrethebrugg gits kai Schwäärverkehr!

Dr Fridolin, mi Bueb, schrybbt kai richtige Satz
Drum griegt är vom Lehrer uff e Latz
Im Rächne isch är dodaal schwach
Au sunscht het är e Schaade in sym Dach
Ych seeh d Zuekunft schwaarz, dä het kai Broot
Friehner hätt‘s glängt fir in CS-Verwaltigsroot

Unseri Schmiirläppe sinn, es isch fataal
Verzwyyflet punggto Personaal
Vom Dytsche kemme, jetzt muesch loose
E baar Bolizischte in Lääderhoose
Und ab näggschter Wuche, wells bressiert
Het me no Tschugger uss em Wallis engagiert

Väärs 2023

Dr Fridolin, mi Bueb – ych froog mi wieso?
Duet däägligg in die Langi Erle goo
Drifft är e Schätzli? Ych bin em noochegloffe
Und han en am Gaissegheeg aadroffe
Är liist deert d Bölle uff – wäh, das saag ych iihne!
Und verkauft se als Kapsle fir die ney Migros-Kaffimaschiine

Findsch s Klima doof, hoggsch uff e Boode
Und gläbsch Di fescht mit Diine … Händ
Au ych lyym mi uff d Freye Strooss
Mach kai Wangg, blyyb reegigsloos
Doo froggt e Bäärner: «Exgüsee
Sit Dir ä Spiiler vom EffCeeBee?»

Me sait ney “Tourischtinne“ näbscht de „Tourischte“
Und „Garagischtinne“ näbscht de „Garagischte“
Näbscht em „Fään“ gits d „Fäänin“ – das macht Sinn
Näbscht „Fluugzyygdrääger“ – „Fluugzyygdräägerin“
Numme mi Raase-Robotter kha kai „Robotterin“ syy:
Dä parkiert yywandfrey in sy Garage yy!

S neye Waldeburger-Bäähnli
Het Staartbrobleem, mir kömme d Dräänli
Unzueverlässig bis an Bach
S boggt und spinnt, isch laischtigsschwach
Dä Zug erhitzt e huffe Gmieter
Uff Dytsch: e typische Baselbieter!

Mir Schwyzer – daarf me gratuliere?
Sinn Europamaischter im Koks konsumiere
Au vyyli Basler – das macht mer Mieh
Dien oft und gäärn e Linie zieh
Drum lueg y, was ych dehaim servier bime Bsiechli
Suscht snifft mer no ain dr Puuder vo de Fasnachtskiechli!

Ych stryych das uss mym Herbstmäss-Blaan:
Und gang nie meh uff e Gaischterbaahn!
Zerscht diens Di in e roschtigs Wäägeli stegge
Ass Di komischi Wääse dien verschregge
Und fir dr greeschti Schogg, de khaschs kuum fasse:
Zaige sy dir no d Prämie vo dr Granggekasse!

Am Schwingfescht z Prattele – bin ych verschrogge
Sehn y dr -minu blutt in dr Mängi hogge
Mit em Fäldstächer zoom y neecher draa
Ussert Schnauz und Huet het är nyt aa!
Vermuetligg het är gmaint, dä Zaarti
Do lauft e wieschti Swingerpaarty

Z Nacht im Bett, am halber zwai
Sticht e Tigermugge in mi Bai
Die, won e Grangget yyberdraage kha
Han ych jetzt äggscht Malaria?
Und noon’em Verwache, grad diräggt
Redi plötzzli Tsüri-Dialäkt!

Dr Tamara Funiciello (si het scho gschloofe gha)
Lyttet zoobe e Maa uff ihr Handy aa
Si nimmt ab und sait ihm Wörter, ass es gracht
«Du Luschtmolch, was stalksch mi in dr Nacht?»
Doo sait dää: «Guete Aabig, wer isch draa?
Hier Benissimo – welli Chugle wänn si haa?»

Mi glai Dochter froggt am Kuchidisch
Wie d Queen äggscht von ys gange isch?
Ych saag ere, scho fascht gediige:
Si syg elegant vom Thröönli gstiige
«Und dr ney King, wie wird dä uns verloo?»
He dr Charlie… dä flatteret dängg denn drvoo!

Voor dr Wiehnacht froggt mi liebschte Stäärn:
«Was fir e Gschänggli hättsch Du gäärn?»
Verliebt nimm ych grad iihri Hand
Lueg dief in d Auge, saag charmant:
«S greescht Gschängg han ych scho, dasch doch glaar:
… s WM-Out vo de Schwoobe in Katar!»

Dä Väärs isch gsponseret vo dr IWB:
(ganz schnäll gsunge:)
Drum muess en schnäller vo mir gee
Är bruucht verdeggel e huffe Saft
Fir d Pointe han y nimm vyyl Graft
Dr Stroom wird gspaart – ych glaub das wäärs
Sali zämme, dr näggschti Vääää…

Dä Väärs isch gsponseret vom Tiefbauamt
Doch au dä isch grad e Baustell, verdammt!
Vo de Azahl Wörter häär stimmt nooni vyyl in däm super luschtige, tolle, interessante und glatte Schnitzelbangg-Väärs
Und är versuecht zwoor wenigschtens e bitzli z ryyme
Drfir isch d Pointe dr Hammer, gottsaidangg
Numme isch die umglaitet, die singt momentaan grad en andere Bangg!

Liebe Alain: iiber de Wolgge isch s gränzeloos
Numme hesch halt bitz Päch ghaa bim Franzoos
Y kha verstoo, Du hesch e grosse Fruscht
Aber bhalt Di Fraid an dr Reiseluscht
Muesch e Tipp fir dr näggschti Ussflug ha?
Flieg mit-me wysse Balloon iiber d USA!

Väärs 2022

Error, Error – Tescht 1-2-3
Syschteem git nid dr Zuegang frey
Fäähler – noo fimf Sekunde waarte
Wird aabegfaahre – pLeAse NeYstAaRtE
Amigs duet – diend Eych nid hintersinne
Dr g‘impfti Mikrochip e bitzli spinne!

E Juchzer – trotz Absaag vom Joodlerfescht
Gib ych uff em Spaalebäärg zem Bescht
Glyy git’s e Grais vo Lyt deert oobe
Si klatsche, juuble – fir mi Uffdritt z’loobe
Me kha aber das Ganze au falsch verstoo:
Y ha numme e Poller zwische d‘Bai bykhoo!

Dr Prinz Andrew: vo Huus uss nit ganz bache
Will nümmi z’Verbier Ferie mache
Drfir het är sich – im Ghaime soo
Als Ersatz e Hütte im Bäärnbiet gnoo
Und erhofft drmit, es dääti gyyge:
Die glai Scheidegg go bsueche und d Jungfrau z’bestyyge!

… Sii, das Bäärnbiet macht en no närvööser:
Jetzt will är au no uff Saanemööser!

Sii, ych bi enttüscht und find das schlächt
Hänn z Basel d Affe kai Menscherächt
Zwoor het e Primaat, das han ych glääse
Dr glyych IQ wien e Stroossebääse
Das längt doch längschtens, duen ych bedängge
Zem dr FCB z bsitze oder Tryychle z schwängge!

E Hygienemasgge Typ 2 und resischtänt
Drzue e FFP-3, do bin y konsequänt
Nitril-Händschli – blau und puuderfrey
E Schutzazuug und Desinfeggtioon als Spray
Au üüber d‘Schutzbrille bin y froo
So… jetzt khan y beruhigt uff Ziiri goo!

LGBT*Q
ASF-HIU
ICN+BOK
DQ#RNA
Ych bi bim Väärs-Schryybe – s isch e Katastrophe:
Voll mit em Grind uff dr Taschtatuur yygschloofe!

Lueg, wie dä Odermatt ooben aabe gracht
Und elegant drbyy no Böögli macht
Ouw: yyghänggt – nei, är isch no doo!
Suuber het dä d Kante gnoo!
Also dä Odermatt isch sauguet zwääg
… ych main dr Karli uff em Haimewääg!

„Nei, ych will nit uss em Bettli goo
Y ha kai Luscht – blyyb lieber doo
Alli sinn blööd, gemain und fyys
Kain spiilt mit mir – dasch zimmlig myys“
Mach jetzt kai Gschyss – s wird sicher witzig;
Legg d Grawatte aa, Ueli – gang an d Bundesrootsitzig!

Noon em FCB het dr Federer e Dram bykhoo
Wytteri Basler folge, han ych vernoo:
Stygsch ins Odermatt-Drämmli, wärsch lieber gloffe
Das schyttlet so stargg, ass de mainsch sygsch bsoffe
Und au dr –minu griegt ains – do frai mi druff
Deert stygt me schyyns numme vo hinde uff!

S verwitscht mi d Frau – es isch e Quaal
In dr Wääbergass im ne Striplokaal
Si schreyt mi aa, s git Ranzeschnitte
Lägg, was het au die äggscht g‘ritte?
Ych ha doch numme in däm Fuudischuppe
Welle e Konto eröffne bi dr Raiffyyse-Gruppe!

Mer hänn d Franzoose an dr EM butzt
Und iihre Goggel killt, nid numme gschtutzt!
Dangg däm Siig, das isch jo klaar
Schloof ych sythäär wunderbaar
Ych ha d Fäädere vo däm doote Fyych, persee
Jetzt in mym Duvet vo dr…
Fischer Bettwaarefabrik Au-Wädenswil am Zürisee

2021

Syt Daage (me heert‘s im ganze Blogg)
Quietschts und stööhnts bi mir im oobere Stogg
Y kha nümm rächt schloofe und find‘s dernääbe
Die mien e Ussduur haa im Liebeslääbe
Y spann duur s’Schlysselloch und mergg: do wird nur triggst
S‘isch e Rekrut, wo im Home-Office d‘Stiifel wiggst!

Mi Frind, dr Ützgür, isch unserer Sprooch nit allzu mächtig
Drfir benutzt är Kraftussdrügg gezielt und intelligänt ganz brächtig
Bi de letschte Wahle do z‘Basel, isch ihm ain bassiert
Är het – statt Nämme – siini Mainig, uff dr Wahlzettel notiert
Mit „Ey Mann, Arschgsicht!“ het är zwoor dr gueti Doon verfäählt
Aber soo ussversehe d’Steffi Eymann und dr Eric Wääber gwäählt

Noochdraag:
Ruggwirggend het dr Ützgür reagiert
Und voorsorggligg sy Briefkaschte demontiert!

Sali Halbschueh, Tschau Halloodri, Griezi Dottel
Salutti Galööri, Guete Daag Laggaff, Bonjour Du Trottel
Sali Lumpeseggel, Hoi Fotzelkaib, Salve Joggekopf
Tschau Wääglidramper, Hey Tschumpel, Sali arme Dropf
Saletti Waichai, Welcome Du alte Hänker
Esoo duuzt mi syt neyschtem mi Credit-Suisse Bänker

Bi „The Masked Singer“ dien Prominänti verklaidet singe
Jetzt wänn‘s e Basler-Versioon im Telebasel bringe:
Dr Burgener kunnt als Plaitegaier, dr Federer als Voogel – nadyyrlig als Star
Als Marzipansäuli dr -minu – dr Thüring als Haas, das isch klaar
Als Pinocchio verklaidet looht’s d’Frau Arslan lo krache
Denn kunnt no d‘Ackermaa mit Gitarre und singt „Gute Nacht Freunde“ als Drache

Am ene Samschtigmoorge han y grausaam Gligg
Und find im Broggehuus e bsundriggs Stigg
An dr Kasse duen‘ych so richtig straahle
Do sait mer d‘Verkäufere, won‘ych s mecht zaahle:
«Toll, ass Sii sich drfir interessiere
… Aber dasch doch s‘Fläschli zem d‘Händ desinfiziere!»

D‘Adela Smajic – ex-Bachelorette und Wätterfee
Hesch in däm Promi Big-Brother könne gsee
Me het si in e Ruum mit-e baar Schwoobe doo
Als Schwiizer stichsch denn halt uuse – punggto Niveau
Die kha frooh syy, isch die deert inne gstrandet
Und wäg ihrem ganze Plastigg im Körper nit in ere PET-Sammlig glandet!

D‘Schwoobe sinn nimm so in Flaisch-Manie
Die hänn e Buff deert in dr Induschtrie
Versyycht‘s Flaisch und z‘billigi Arbetskraft
Und egal ebb me grangg isch, hauptsach me schafft
Mir Bebbi sinn verdraut mit dääre Phaase:
Doo seggle die fuule Würscht scho länger iiber dr Joggeli-Raase!

125 Joor BVB – dasch jo ganz verreggt
Y ha do zwische mir und dääne Parallele entdeggt
Zem Bischbyyl sinn mir baidi grien – isch das nit geil?
Und au ych fahr oft uuse, zem go Boschte noo Weil
Doch s’gääb e Unterschiid, maint mi Frau, und dä miech mer Mieh;
Denn im Gäägesatz zem Dramm – kääm ych immer z‘frieh!

Anderi Länder, anderi Sitte – gnauer in Kyyna
Stegge’s dr zem Teschte, e Stääbli in‘s Fuudi yyna
Y dängg, ych däät‘s unagnäähm empfinde
Wenn‘s dr so ummeguusle dien deert hinde
Ab sofoort, do khasch‘s bi mir vergässe:
Wird y bim Mister Wong nie meh mit Stääbli ässe!

Y ha grad noone Mail bykhoo
Tschüssikovsky, y muess jetzt goo
Si hänn mi buecht, die uss em Kreemel
Als Lohn stelle sy mi z’Moskau uff e Scheemel
Die wänn drum hyt no, ohni Zyt z‘verliere
Em Nawalny d‘Giftspritzi präsentiere

Väärs 2020

Will me jo nit waiss, wie lang’s d’ART no git
Bin y deert aahne und nimm miini Glai grad mit
Zmitzt im Kueche – ych fiehr grad e Schwatz
Erbricht mi Spatz diräggt in sy Latz
Und wonen will go wäsche fir mis glaine Schätzli
Bietet ain 30‘000 Stutz fir‘s verkotzte Lätzli

S’isch Summer und im Drämmli sinn alli am schwitze
Do sait die alti Frau Müller, wo näb’ ihrem Maa duet sitze:
„Die BVB muess y loobe, die wird wieder toller
Die bietet de Fahrgescht e glaine Deoroller“
„Legg d‘Brille aa“ maint ihre Alt und zaigt uff ain wo stooht:
„Dä Deoroller haisst Dürr und isch Regierigsroot!“

Gedicht von Johann Stuhlgang von Flöte: “der Pilot-Idiot”
Wer fliegt durch Tag, macht Lärm und Gschyss?
Es sind die Trottel der Patrouille Suisse
Die verflogen sich und haben’s eilig
Weil sie müssen zurück in die Demenzabteilig

D‘Lieschtler hänn Fäkalie im Dringgwasser gha …
… Dä Schyssdrägg goht ys gaar nyt aa!

Jo, s‘bruucht Muet und ych ha e Schaade
Fuudiblutt im See z‘Hallwyyl go baade
Doo beriehrt doch bletzligg, das isch dr Gipfel
Iirgendebbis kaibs mi Zipfel
Zytglyych juubled ain ganz unverdrosse:
„Ych ha ändligg dä grien Kaiman gschosse!“

Vo dr Greta heersch Gschichte – guet und schlächt
Ych find, die Öko-Pippi Langstrumpf het irgendwie rächt!
Bi mir dehaime duet‘s scho funggtioniere
Will y mi Stroomverbruuch kha reduziere
Ych schalt drum immer, kurz und knapp
Sobald y d‘Greta gsee mi Färnsee ab!

Dr Federer zaahlt nit numme e Lappe
In e Schwiizer-Firma fir Laufsport-Schlappe
Dä Määrt duet ihn rächt imponiere
Drum will äär deert au inveschtiere
Und sott är an Halbschieh au Interässe haa
Wäär dr Wessels ab näggscht Joor gratis z’haa

D‘Merkel zitteret, zitteret, zitteret…
… und zitteret, zitteret, zitteret…
Was isch au numme mit dr Angi los?
Sy hoggt im Bombardier-Schüttelzug uff Davos!

Hytzedaags koschte d’Fuessballer Millioone
Und me froggt sich, ebb sich das duet loohne?
Au die ganze Transfeer khan y nit verstoo
Stell dr voor, s’wäär in unserem Läbe au esoo:
z.B. verlängeret d’Fr. Sarasin noon e Joor mit iihrem Alte
Und d’Fr. Meyer will dr ussgleehnti Syttesprung bhalte
Dr Hr. Huubesak isch uff em Määrt beliebt bi vyyle
Är kha drum ohni Fäähler, mit zwai Bäll, glyychzyttig spiile
Nit beliebt drfiir isch dr Hr. Vögeli im Bett
Dä verschiesst si Penalty – bevoor s’Spiel agfange het
Und dr Hr. Mangold isch ableesefrey, syt letschter Nacht
Dä het e Handspiel im falsche Stroofruum gmacht
Numme als Sportchef hesch‘s nid aifach, daas isch fir dr Hr. Streller verzwiggt
Doo wirdsch heggschtens vo dr Chefetaage gf…orderet

Z‘Nacht am Ains – ych bi verschrogge
Duet en Yybrächer näb‘ mim Bettli hogge
„Please help me Sir“, heer ych ihn huuche
Är haig alles gnoo, was är wuurd bruuche
Numme fändi är und das syg „shit“
Als Ängländer wieder emool dr Ussdritt nit

D‘Greta stooht voor de Lyt bim WEF
Verzieht d’Schnuure, luegt uff s’Blatt und maint ganz breff:
„Drey Liter Milch, zwai Tuube Zahnpaschta, 450g Gniocchi
E Pfund Køttbullar, säggs Aier, e Daafele Schoggi
E Päggli Wasa fir s’Smørrebrød … ou verreggt
Jetzt het mer mi Babbi dr falschi Zeedel gsteggt!“

Väärs 2019

Letscht Friehlig – y ha gmaint, ych spinn
Hogge im Zug fascht nur Kardinääl und Pfaffe dinn
Die hänn verzellt, si kääme vo nooch und färn
Und pilgere mit Glaubensgnosse bis uff Bärn
Es syg halt scho e bitzeli d’Luscht wo se alli wuurd styyre
Wenn e huffe „Young Boys“ e grossi Party fyyre

E Pfanne „Typ WOK“ fir uff e Grind, als Schutz
Wäg em Bodycheck e Bruschtpanzer fir hundert Stutz
En Aierschutz uss Stahl – wichtig: zimmligg digg!
E Zahnschutz-Set fir e Roundhouse-Kick
Denn no Medis, Salbi und Pflaschter – e Huffe
So… jetzt gang y in Ussgang ain go suffe!

Hirnerschütterig, e verboogene Zingge
S’Ässe e baar Dääg nur als Dringge
Säggs Rippe quätscht, vier Blombe duss
Do unde isch mi Glai au nimm im Schuss
Vom Ussgang kumm y hai – dodaal verletzt
S’het mi mit-me Elektro-Trotti uff d’Schnuure gschlezzt

Z’Russland in ere WM-Nacht
Het dr Xhaka doo das Zaiche gmacht
Ych ha mi gfroggt: was zaigt dä in d’Kamera?
Doo bletzligg han’ych d’Antwoort gha:
Dä griesst numme si Frau, wo isch dehaime bliibe:
“Y bring dr Always Ultra mit Flügel – doo sinn’s grad aabegschriibe“

D’Schwoobe hänn welle Wältmaischter wäärde
D’Schwoobe hänn welle Wältmaischter wäärde
D’Schwoobe hänn welle Wältmaischter wäärde
Schyyns s’beschte Team uff dääre Äärde?!
D’Schwoobe hänn welle Wältmaischter wäärde
… Uff was wartet ihr? Das isch scho d’Pointe!

20 Joor Viagra – au ych mecht no gratuliere
Ändligg e Grund, emool aini ussz’probiere
Y ha die blau Pille mit eme Schlugg Schämpis gnoo
E Momäntli speeter – he, jetzt lueg au doo!
Het’s fir s’Jubiläum exaggt, nach dryssig Minute zää
Au vo mir no Standing Ovation gää!

Zem Schluss mache d’Schwoobe no so gschnäll
Uss däm Hutzelwyybli Merkel – Germanys näggscht Topmodäll
Si drait jetzt Designer-Hooseaazyyg vom Joop und Dior
Anstatt die Ossi Deux-Pieces uss de 60er Joor
Und eleganti Schueh mit Absatz, wo se greesser mache
Anstatt die alte DDR-Schlappe, die flache
Und syydigi Foulards in lila oder gääl
Statt die verblaichte, karierte Polyeschter-Schääl
Und e Push-Up-BH sell ab sofort iihri Ooberwytti lo wirgge
Anstatt die Feinripp-Lotzi-Wösch uss em Erzgebirge
So, jetzt basst fascht alles – die ney Gaarderoobe und dr bresänti Buuse
… Numme dr Kopf luegt halt immer no oobe’n uuse!

Kirzlig han’y, will’s mit Tamedia besser lauft
Wieder emool e Basler Zyttig fir drey Stutz kauft
Nach em Fyyroobe han’y denn solidaarisch dänggt
Und se amene Clochard am untere Rhywääg gschänggt
No segglet dä mir nooch, y ha gmaint, dä will sich bedangge:
„Was, Du liisisch d’BaZ? Du arme Siech! Lueg, do hesch drey Frangge!“

Am BLACK FRIDAY, bim Stammdisch, mit Bier und Wyy
Frog ych in d’Rundi, was das fir e Hype sell syy
Do maint dr Charlie: “Dä Friday macht jeede froo,
Do git’s zwai fir ains – drum wird jetzt no aine gnoo!”
D’Bestätigung grieg y speeter vo miinere Frau dehai:
Fir mi Vollsuff git’s drey Gläbber – an Stell vo zwai!

Mit dr Basler Delegatioon bin ych go s’Säggsilytte bsueche
Do heer y bletzligg e Stimm zwängele und flueche
Y ha denn gsee, wien e baar Zunft-Brieder, trotz däm Klaage
Ebbis im Stächschritt zer Schytterbyygi draage
„Jetzt leend mi sofoort aabe“ schreyt das Wääse
„Ych bi d’Stadtpresidäntin Ackermaa und nit am Böögg sii Bääse!“

Deert ääne am Bärgli styygt e Räuber in’s Huus
D’Schugger wänn en fange, doch dr Tesla het kai Pfuus …

Dr Karli Lagerfäld reedet im Himmel mit Gott
Und sait: moodisch gseh isch’s doo oobe Schrott!
Kai Style, kai Glamour – lueg dä verrumpflet Ängel deert
Wie dä usseht und sich klaidet, dasch doch unerheert!
Do sait dr lieb Gott: ych kha Di verstoo
Aber dasch d’Uriella – die isch immer esoo!

Väärs 2018

Ych bi yyglaade woorde vo dr Basler Regierig
Fir en Apéro im Zolli – und aaschliessend ere Fiehrig
Denn hänns do verzellt vome sälte, komisch Lääbewääse
Und y has agluegt und gsait: also, dasch wirgglig ains vo de jääse
Si hänn mi denn aber beleehrt, ych gnaag hit no draa
Gmaint sig daas deert im Aquarium – und nit d Frau Ackermaa!

Dr Polo Hofer glopft an s‘Himmelsdoor
Do kunnt dr Petrus und liist ihm d‘Reegle voor:
Vo mir uss darfsch die ganz Zyt singe
All Stund uff dr Haarfe e Ständeli bringe
Numme ai Bitt, sunscht hänn mer dr Drägg
Inhalier mer do oobe kai Wulgge ewägg!

Im Grund gnoo dängg ych, jo s’wär glatt
Fänd das Schwingfescht in däm Prattele statt
Drey Dääg schwinge, Hooselupfe,
Glogge schwängge, Tabagg schnupfe
Und näb’ dr Muusig vom Sepp Trütsch
Schwätzt me denn z’Prattele wieder emoll Schwyzerdütsch!

Doo isch e Klaagebrief yygange an d’Firma Apple
Und zwoor vom Donald Trump, däm Deppl:
On the toilet han ych bletzligg e Seppi grisse
And ussversehe my „iPhone X“ in the Himmel gschmisse
Uff dr Heechi vom Fuudi het sich das uff s‘Display g‘keert
Und will‘s gmaint het, es sig mi Gsicht, denn vo ellai entsperrt!

Lieve Nederlands – niet de Köpfchje lo lampen
Wenn ihr niet kan bjie de WM op de Voetball drampen
Ook Speler wie Robben en Wesley Snejider
Zieht et diese Zommer in de Oldersheijm weijder
Aver alles easy, en roijk en Guuge, ihr müsst de Vordeijl seen:
Weijl ihr habt de ganze Campingplatz dann endlich voor euch alleen!

Am Stammdisch han ych letschti e bitz z’vyyl tanggt
Und bi denn geege Moorge haime gschwanggt
Deert wartet mi Drache mit em Suppedopf
Und macht mer e Büüle – diräggt uff mi Kopf
Sithäär blufft im Kindergaarte miini Glai;
Das Einhorn gääb’s wirgglig – si haig ains dehai!

An de Australian Open hesch‘s wieder gsee
Dr Federer gwinnt aimoll mee
Drotz sym Alter und das macht ihn frooh
Kha fascht kaine me dr Roger schloo
Halt – doo wuurd‘s heggschtens aine gää:
Ihr kennet ihn alli: dr Constantin!

Neij entwigglet e Ländler unseri Stadt
Hurra, jetzt wird’s so richtig glatt:
„Uus em Theater git’s bald ä Buurähoof
Dr Barfi wird zer Wäid für Chiä und Schoof“
Die letschti Hoffnig duen ych trotzdäm bhalte:
Är kha d’Fassaade vo dr Ackermaa scheener gstalte!

Ebb Afroschmutz oder Moorekopf
Coco-Jambo oder schwarze Schopf
Ebb exdreem pigmentierte Zuggerschuum
E Kalooriebombe uss em affrikanisch Ruum
Däm khasch saage wie d’willsch, de merggsch es glyy
Am Schluss wirdsch immer dr Neeger syy!

Väärs 2017

Bi Samsung-Gräät kha’s guet bassiere
Ass‘ die Siechen explodiere
Drum khasch si jetzt ganz exklusiv
Zrugg gää – will s’isch explosiv
Drotz allem han ych sinnvoll dänggt
Und ains dr Schwiigermueter gschänggt!

Schalt ych dr Färnsee yy, lauft dr vo Wattewyyl
Schalt ych s Radio aa, schnuurt dr vo Wattewyyl
Gang ych ins Häbse, denn spiilt dr vo Wattewyyl
Dä wird mir langsam zvyyl – dä vo Wattewyyl
Jetzt han ych jedes Moll Schiss, jä y glaub, y spinn
Wenn y dr Yyskaschten uffmach…
…es hoggi dr Wattewyyl dinn!

Letscht Summer, an däären EM z Paris
Gits gwissi Sequänze vom Löw – und die sinn myys!
Zerscht längt er sich an s’Ai, an s’Lingge
Und fiehrt die Hand denn poschtwändend an Zingge
Bim Abklatschen am Schluss, han ych uff ai Moll – persee
Dä Schieler verstande, wo si Hand nit will geeh!

Die neie Stiehl uff de Stroosse find ych glatt
Sithäär gang ych gäärn in d Innerstadt
Mi Zwätschge brobiert vyyli Glaider und Schueh
Ych hogg voruss – mitme Bier – und gniess mi Rueh
S’Ainizig wo steert – ych muess voller Quaale
Uffstoo und iire das Zyyg go zaahle!

D’ Super League, die isch doch quatsch
Wirgglig Toodlangwiilig – jeede Match
Anstatt 90 Minutte z fääne
Duet me 90 Minutte gääne
Uff dr andere Sytte, dängg ych mir immer:
E halb Stund Telebasel – das wär vyyl schlimmer!

Dr Mike Shiva; y glaub, vyyl sinn do gaar nit muff
Heert mit sim Hokuspokus uff
Jetzt het dä Bonsai-Indiaaner e neiji Idee
Und mecht bim SRF, dä Samschtigs-Jass iibernee
Mit Kaarte haig är jo Erfaarig, maint dr Shiva stuur
Und frai sich uff e Schieber – mit em Schuuflebuur!

Bi däm Pokemon-Spiil settsch jo Monschter sueche
Aber y find irgendwie kaini und bi nur am flueche
Ych bi denn in dr ganze Stadt ummegrennt
Numme mi Handy het aifach kai Monschter erkennt
Stunde speeter han y vo däänen aber Dausigi droffe
Jä… ych Duubel bi bis uff Ziiri gloffe!

Y ha dr no welle gratuliere, liebi Martina
Fir die silbrigi Medallie an dr Olympia
Jetzt khasch di ändligg wieder mit de Grosse mässe
Das mit em Kokain – hänn mir längschtens vergässe
Aber ebbis stelli fescht und druff bestohn’y
Richtig schnuure khasch halt immer noni!

Ebb dr Trump duet polarisiere
Duet mi iiberhaupt nit interessiere
Vo siiner Politigg han ych kai Aahnig
Au vo sim Uffdritt nit und vo siiner Plaanig
S isch mer egal, ebb äär e bitz anderscht dänggt
Aber si Gwaffeer – dä gheert sofort ghänggt!

Stohsch Du uff ganz haissi Sache?
Und duesch au gärn dräggigs mache?
Spitze Di Sauereyen aa?
Dryybschs gäärn vor dr Kamera?
Uff was wartisch, fyyl di frei
Bewirb Di bi dr Basler Bolizey!

Mi Doggter haisst jetzt Morin Guy
Das mit em regieren isch verbyy
Drum duet äär wieder Kliänte stille
Mit Drepfli, Wässerli – aber joo kai Pille
Also: verlehrnt het dää jo si Aarbet nit
… will’s im Roothuus rächt vyyl Granggi git!

Mi Groossbabbe hänn’s letschti in dr PUK iigschlosse
Dä het so richtig dr Voogel abgschosse!
Daagelang isch dä in dr Wältgschicht ummegirrt
Und gfunde worden isch är z Davoos – vellig verwirrt
Derbyy het dä Armi numme dä Wääg absolviert
Will är e Poschtstell suecht – wo no exischtiert!

Letschti kumm ych friehner hei
do liggt mi Frau – im Bett … ellai
D Hoor verstrubblet, im Evaglaid,
“Bisch scho doo?” het si zue mer gsait
Wo isch är, han ych welle wisse,
Und ha dr Glaiderschrangg uffgrisse
Dert griesst mi dr Pöschtler, jetzt muesch loose,
Splitternaggt – also oohni Hoose
Lägg, bin ych froh, das wäär e Quaal
Y ha gmaint, dä Wattewyyl syg iiberaall!

Väärs 2016

D Frau Clinton will ins Wysse Huus
Ihre Alte wird gsait ha: «Du kunnsch druss
Bim Näärve bisch erschreggend guet
s Dummschnuure hesch jo au im Bluet
Und s wichtigscht, jo, s liggt uff dr Hand
Vergiss die Idee mit em Praktikant !»

… Dr Billy het Angscht, s wird sini Alti e Lueder
Es haig drum glaub d Lewinsky e Brueder

Nur Saich im Kopf hänn die Männli doo
Und bim schnuure kha se au kain verschtoh
Die Minions han y letschti im Färnseh gsee
Ab dääne Monschter hett’s mer fascht ain gee
Doo lueg ych genauer uff das glaine Gschwür
Ou – Tschuldigung Herr Baschi Dürr !

Händ ihrs neie Gsicht vom Cordalis gsee ?
Do dänggt me nur: Akropolis Adee …
Also ych bi verschrogge ab däm Maa
Y ha zerscht gmaint – är haig e Unfall gha
Mit däm Gäld wo är sich het umbaut und entfettet
Hätt dä si Griecheland scho längschtens grettet !

… Loosed uff e Cordalis, dasch e Tolle
Liebi Grieche: Costa was es wolle

Wo dr Wessels uffwacht noch dr Operatioon
Verlangt är zerscht e Doggter fir d Situatioon
«Herr Dokter chöntet Sii mir sege,
Ob ich mi bald chan schmeerzefrei bewege»
Ihri Glängg sind guet, si kenne wieder lache
Aber geege Dialäggt mien mer dringend no ebbis mache !

Dr FC Züri, dä isch fir dr Abstiig berait
Ohje, wie dien mir au die Aarme laid ….

Es raast s Sonderkommando und d Bolizey
Duur d Stadt – es herrscht e riise Gschrey
Si sperre d Gegend ab, herrje
Dr Wessels het e Bombe gsee
Nochere Stund maint e Expärt: «Ych grieg dr Koller
Herr Wessels, das isch doch nur ain vo Ihrne Poller !»

D Blocher-Dochter regiert jetzt au in Bäärn
Dr Babbe Christoph gseet das gäärn
Die Frau bikunnt jetzt aifach alles was si will
Und si will immer no mee, s ischere nonig z‘vyyl
Nur ebbis, jo ych ha kai Mieh
Miss Schweiz – das wird si sicher nie !

… Und will si sich mit de Gschiidschte duet mässe
Kasch si als Bachelorette au grad vergässe

Ych gang zem Arzt, s wird unbequeem
Herr Doggter, ych ha e Daarmbrobleem
Nit emoll e Ziibelewaihe
Bringt mi Buuch esoo zem blaihe
Ych haig, beruigt mi dr Doggter Seeler
Numme s VW-Syndrom mit-me Abgaasfeehler !

… Zum Gligg sind si kho, sait mer dä Maa
Suscht hätte si wohrschiinlig e Shitstorm gha

Mi hett dä Rochedurm fasziniert
Drum bin y uff dr heggschti Stogg spaziert
Kuum oobe ahkho han y s Gschyss
Mir isch schlächt und ych bi kriidewyss
Nai – nit d Heechi macht mer Ranzewee
Ych ha halt nur grad Ziiri gsee !

… Und grieg ych no Grindwee, dass es mi fascht duet verbääse
Denn han ych sicher s Ortsschild vo Weil grad glääse

Das Gschyss doo um dä Marco Streller
Wenn är nimm spiile will, hejo denn sell er
E super Vorbild und sunscht au e Nätte
Villicht wird si Sohn in d Fuessstapfe drätte
Sett, Marco, di Bueb mol Profi sii miesse;
Denn lehrn ihm bitte nit s Penaltyschiesse !

… Zaigsch ihm aber emoll di Zungeschlaag
Griegt är vom 3+ sofort e Bachelor-Verdraag

Ych lieb die tolle BLICK-Promi-Gschichte
Die dien so vyyl iiber d Bellers brichte
So attraggtiv, so erfolgryych, so wundervoll
So jungblyybe, so scheen, sone Sexsymbool
Y stuun immer wieder und frog mi allem ah;
Was isch das näbem Walter nur fir e komische Maa ?

… De Bellers iihri Diebe hänn weenigschtens Niveau !
Si hänn alles gnoo …ussert d Irina und ihr Buech … das hänn si lo stoo

Jä Sii, dä Herr Guy Parmelin
Isch fir dr Bundesroot bestimmt e Gwinn
Als Räbbuur het dä, s muess so sii
Jederzyt e guete Wyy drbyy
Villicht sett me ihn denn no beleehre:
Gang joo nie bim Ogi go Änglisch lehre !

… «Liebe Guy, Dir leer y zeerscht
Was uff Änglisch heisst, dass FREUDE HERRSCHT»

Me het de Fraue gsait, noch dääne Gwalte
Wie me im Dytsche sich sott rächt verhalte
Falls di aine will sexuell bedränge
Wuurd e Abstand von-ere Armlängi länge
In dr Praxis kaa’s e Schwoob nit schlächt:
Dr Arm wird stiff – speziell dr Rächt !

Zeerscht wird dr Blatter suspendiert
Und als Dangg denn pensioniert
Drum hoff ych fir dä alti Maa
Dass er sich scheen erhoole kaa
Abglääge im Griene, inre FIFAltersiidlig
e FIFAlts Buurehuus, das wäär doch nyydlig
An jedem Fänschter e FIFArbige Bluemekaschte
d Veegel wo pfiffe – wäg vo FIFAltlaschte
E FIFAchgrächte Wyykäller fir s Vergässe vom Desaschter
E FIFApothek – vollgschtopft mit Pflaschter
Dr fein Gschmagg vo FIFArn, Heu und Gülle
D Kuehglogge im Ohr, FIFAntastisch d Idülle
E Balkönli mitere Ussicht uff e FIFAmoose Sunneuntergang
Diräggt uff d’Bärge und de FIFAlpe entlang
Ych winsch ihm vorallem ganz vyyyyyl Rueh
… Und naaglet um himmelswille sini Huusdiire zue !