Frau Länzli ist seit 2012 als Schnitzelbangg in Basel unterwegs und seit 2013 Mitglied der BSG. Sie ist eine der wenigen Frauen, bei der die dreckige Wäsche in der Waschküche gründlich tief gewaschen wird, mit Versen, die sich gewaschen haben. Eine Waschfrau, welche ihren Wäschehaufen immer bei sich hat und ohne den sie nicht leben resp. auftreten könnte.

Väärs 2024

Wenn als Frau kai Krieg wotsch mit dim Alte, do s Rezäpt
Streusch gli Eschtrogen ins Omo, wo an Glaider gläbt
So wird är waich und sanft, i main das isch jo kai Deliggd
I ha jetzt grad e Pagg vom Gmisch em Putin yybre gschiggd.

S neyschti sii, das glaubt me kuum, das muess ene verzelle,
jetzt wott mi Maa ganz pletzlig in dr Nacht Schleeg mit dr Kelle.
E psychologischs Gspreech bringt ändlig Glarhait in die Sach
S passiert nach jedem Biss in d Schoggi vo däm Läderach.

Mir mien, apropos Läderach, dr Gürtel änger schnalle.
So kauf i nur no Glaider in dr Secondbrockihalle.
Bruch fast kai Stroom, mach FDH, das duet sich nit grad loone
Drum schaff i no im Beyeler Museum fir d Millioone.

Dr Zolli z Basel fiirt, är wird scho 150 Joor
Agfange hets mit Velkerschau, das isch hyt fascht nimm woor
Im Raame von re Sonderschau, das derfsch dr nit lo nee.
Kasch di letschte riiche Schwyzer, hinter Gitter gsee.

Es isch rächt gfeerlig und i main vo dert här allerhand
Die viele doofe Kepf uf Wahlplakat am Strosserand
Es länggd di ab, verpassesch d Stroos, denn landesch zmitzt im Fäld
Wenn Gligg hesch triffsch e Wolf und griegsch vom Bund drfir no Gäld.

S Weschhuus isch e Träffpunggd, wo de mergsch, wie d Lyt so tigge
d Frau Henzi schnuurt, dr Meier pennt, loot d Unterhose ligge.
Bi mir schuumt nit nur d Weschmaschine, s närvt mi richtig hesch
Dr spanisch Fuessballpresi goot mer immer an mi Wesch.

Bi uns do grootet letschtjoor unser Lääbe us de Fuege
Die Diskussion duesch Oppenheimer oder Barbie luege.
Wo mer gainigt und mit Freyd in d Stadt geen s isch dr Hit.
Sin mer gschoggd, wos in de Staine gar kai Kinos git.

De Profis us em Schiiverband, wott d FIS jetzt ney verbiete
Wachs mit giftig Fluor znää, denn fahre die wie Niete.
Als Amateer do derfsch s no nää, fir mi gar kai Probleem
I faar mit Elmex an de Schii, derfiir mit schwaarze Zeen.

D Zircher dien de Kinder ney empfeele, kasch nur klaage
Si solle iir ne Eltere nimme Papi, Mami saage
Eltredail, Betreuigsmensch, i find das isch dr Gruus
So epis bruucht dr glaini Jositsch, dert im Bundeshuus.

Dr alti Shakespaere het s scho gsait, to bee or not to bee
Es isch doch aifach ainerlai, was du eso wotsch sii
Hit derf me alls und ka me alls, egal woruf me stoot.
und wenn de wirgglig schlau bisch, wirsch vom Buur zem Bundesroot.

D Adela Smaijic suecht uf RTL wieder e Maa
E Bachelor, wo guet usseet mit ganz vyyl Charismaa
D Suech isch schwierig, do mi Tipp, s isch aine mit Fairplay
Är boxt sich guet durchs Läbe, jä dr Brian wär jetzt frey.

Sit zwanzg Minute stand i do, studier dä kaibe Kaschte
Lies BVB-Beschriibig und denn tipp mi dur die Taschte.
Mi Frindin näbedra schüttlet dr Kopf, wott haim go pfuuse
«Hey, s kunnt nur bim Bundesroot e Zwaierticket use «

Z Lörrach in dr Iikaufsmaile isch grad Ussverkauf
Dr Kampf um all die Billigsache isch e rächte Lauf
I drugg mi überall drzwüsche, das isch Fruschtration
Denn bringt mi d Polizey an d Gränze, das isch Remigration

Im Altershaim zem zittrig Stärn hän d Bewooner ney
E Pflägroboter mit me Softwarefähler im Display
So het er bim Senioretanz grad zerst bim Cha cha cha
Bin re Draiig s Gas prompt mit dr Bräms verwäggslet gha

No däne Värs, no findi ebe, isch es doch okay
Verleen mir do dä Schuppe und sin wieder vogelfrey
Unsri Zyt isch halt verbi, s isch scheen gsi in däm Gränzli.
Mien adie saage, scheene Oobe ihre Bangg Frau Länzli

Väärs 2023

Sit längerem do han i Schmärze in de Kerperglängg
Zem Trost bikumm i Siesses vo mim Soon, es isch e Gschängg.
Doch nach em Ässe muess i mi vor Ranzepfyffe rugle.
Ha d Schoggi kurz verwäggslet mit de Kaffikompostkugle.

Mi Hund fyylt sich im falsche Kerper, maint är sig e Katz
Wil är s Bai nimm lipfe duet, ghait är uf e Latz
Statt bälle, wenn e Fremde kunnt, macht är nur «miau»
Drfir rieft jetzt, nach jedem Weschgang, d Weschmaschine «Wau»

Letschte Summer wär y fascht uff d Tiigermugge droffe.
Die jagt mi, doch si schwanggt e bitz, y glaub, das Vyych isch bsoffe.
Vo well re Pfitze die grad stammt, han y schnäll begriffe.
Dasch s Loos, wenn s nit gnue WC het am Schwingfescht zem go schiffe.

I ha mi richtig gfreyt fir sii, wo d IIladig isch koo
Mini liebschte Weschkolleege saage sich jetzt joo.
Dangg däm scheene Hochzytsfescht, fiile si sich frey
Mit infantile Wort sag yych today, i feel…….gay.

Schaffsch als Frau fir Zircher Stadt, gohts dr mit Verlaub,
Super, wil hesch ney drzue no Menstruationsurlaub.
I bi scho in dr Menopause – wurd me nit vermuete.
Ha, damit s mee Ferie git, halt jewiils Nasebluete.

Hän si wääred däm Corona au e Hindli bstellt?
Wo sich, wenn sii ainsam sin, e bits zu iine gsellt?
Es isch no haiggel, hani gmergd, das haut di us de Sogge.
Wäg em ville Umeschmuuse, griegsch grad Hundepogge.

So voll im Optimierigswaan, will i schlängger wärde.
Drzue iss ich nur frisches Zyggs, s Bescht vo Mueter Aerde.
Wenn i denn im Lade stand und iber d Usswaal stuun,
Merk i, Fricht und Gmiess, primär Meloni sin ganz bruun.

Mir Fraue dörfe ab em Summer oben ooni Bade.
Es steert mi nit, dä gierig Bligg uf mi naggd Fassade
Am Beggirand hän s saubleed gluegt, sii das isch nit glooge
I ha jo nur kurz vorem Baade, d Larve abe zooge.

Ney het me am Rhy mobili Lampe gäge Gwalt
Installiert, damit me besser seet, wo s amme knallt.
Nach mim erste Fäldversuech, ha nur no kenne zugge
Bini voll verschlaage gsi – vo mir, wäg ville Mugge.

Was bin i doch e Riisefan gsi vo däm scheene Brice.
Als Winnethou het är mir gfalle, jetz git s so ne Gschiss.
Wäg kultureller Aaeignig dien si Bledsinn schnädere.
Drbi het au dr Fischer no in sine Duvet Fädere.

Liebi Fraue händ kai Angst vor däre Menopause.
Hitzewälle, Schweissussbrüch, denn kemme halt die Flause.
Lueg d Vordail vo dim Kerper aa, au wenn er duet erschlaffe
Drfir kasch jetzt für d IWB, als Wärmestraaler schaffe.

S Wort vom Joor, e Ïberraschig, isch Strommangellaag.
Wil mir alli Strom mien spaare, stoon i jetzt am Haag.
Mi Maa isch gar nimm mit mir z friede, rieft us wie ne Hund.
D Weschmaschine macht nur ai Umdraig in dr Stund.

I ha grad wieder Fligeli für s neye Schwimmbad kauft.
Wenn scho bald im Musical statt Musik, s Wasser lauft
I frey mi druff, es passt perfäggd und schieb do au kai Phanig.
Denn ändlig wird s e mol real, mi Musical Titanic.

Dr Vorhang schliesst sich fir e Joor, das isch dr letschti Aggd
Mir zien jetzt e Huus witer und sin Zämme «voll» im Taggd.
Zyt isch laider au verbi, s isch scheen gsi in däm Gränzli.
Sag adie und uf bald emol, yyre Bangg Frau Länzli.

Väärs 2022

Sin Sii sicher, dass Sii das au sin, grad wo Sii sin?
Will wenn Sii das net sin, so wie Sii sin, machts wenig Sinn
Fir mii isch s philosophisch wichtig, drum blib ich no draa
Und tritt do als Frau Länzli uff, und sicher net als Maa.

Bim Wettbewärb vom Fust, do hani dänggd, wow isch das gspunne.
Hani doch dr 1. Priis, e Wäschmaschine gwunne
I ha se gfüllt und s Gnepfli druggd, woni denn grad flip.
Will uf dr Aazaig stoot: Es tut mir laid, mir fehlt der Chip.

In Rafz do kasch di, sisch kai Witz, so schogg igfriere loo
Und nach zem Bispill hundert Joor, als Mensch neu uferstoo
Das isch fir mi e cooli Sach, i glaub das mach i au
Doch wenn das no vill Zircher mache, wär s dr Supergau.

Do letschti in dr Migros an dr Kasse, bi konfuus
Frisst eine sini Sache abem Band, es isch dr Gruus
I halt mi do net zrugg und pagg en, är isch zimmlig baff
Het gmaint, dass sig e Grundrächt, doch fir mii blibt das en Aff.

Als grosse Baschi Dürrfan, do beobacht ich vergniegt,
Wie är das mit Regiere und dr Wösch so anegriegt
Jetzt als Privatmaa macht ers guet, das isch au gar kai Gfasel
wäscht er si dräggig Wösch ganz frisch im Talk vom Telebasel

Millione vo Chinese, sit Olympia, wän jetzt au
So uf de Schii go umeflitze, s fählt halt no s Know-how
Doch bi de Wontonnuudelsuppe frooge si sich glii.
Wie macht me us so glaine Stäbli, wirglig gueti Schii?

In dr letschte Zyt, i waiss no jetzt nit gnau worum
Nimmt mi Maa so Abstand vo mr, i finds zimmlig dumm
Vor allem in dr Stadt blibt är, wenn ich in d Läde goo
Wie ne Bättler, die 5 Meter vor em Iigang stoo

Wäge z wenig Altpapier gits jetzt die glaini Baz
Das z läse goht jo nur mit Lupe, sunst isch das fir d Katz
Au d Schwyzer Jäger brüchte das, no gäbti das kai Drama
Die schiesse nämmlig statt uf Wild, uf Ross und glaini Lama

Scho immer het mi das mit däne Poledancestange graizt
Wo me mit em Kopf nach unde, gar mit Raize gaizt.
I ha mer aini online bstellt und bi den rächt frustriert,
wo die wäg iirer Längi, dä Suezkanal bloggiert.

Bassts no? Jo das hani mi au gfrogt nach so vill Joor
Kai Värsli dräggsle, Sii do kunnt mer alles Spanisch voor
Doch so, wie Sii jetzt glacht hän, muess i saage, ischs Magiie
Do bini wieder mit vill Freyd, gärn s nägst Joor au drbii

Väärs 2020

Zää Millione Päggli vo Zalando, sisch dr Waan
Wärde eifach hii und här gschiggd, so ganz oohni Plaan
D Poscht het Freyd und Aarbet, jä zu Päggli gään si Acht
Am Euroairport längt nur ains, scho wird e Ryymig gmacht.

I bi jetzt froh git s d Nacktbaiz net, dä Saich isch schnäll verbii
Sunst hätti do als Helge no ne Striptease gmacht für siii
Furzidee göön und kömme, wärde als wie frächer.
Wie die do bi dr Tramstation, versänggte Aeschebächer.

Dä armi Maa Schawinski, het kai Job me, das isch schlimm
Wenn dä nimm ka Schnuure, gits Problem mit sin re Stimm
I hät do en Idee, villicht kennt das no epis sii
E glaine Uftritt ohni Wort als Gloon bim Zirkus Knie

Zwei strammi Männer weere sich vo däre Schwyzer Garde
Sii hege amigs Pfaffebsuech in yyrerer Mansarde.
Ney hän die Prieschter eher mit me ryffe Maa e Gschlaigg,
denn all die glaine Buebe sin jetzt halt am Klimastraigg

Mi Maa het sich e Tesla kauft, das sagi unumwunde
Dä faart vo 0 uf 100 uffe, nur in drei Sekunde.
Die Gschwindigkait isch mir net ney, das isch doch gar kai Froog
S gliiche macht dr Zaiger au, dehaim uf miner Woog

Im Bundeshuus het d Amhärd stungg, sie miessi das verstoo
Ihri Gspröch am Delifoon, ka jeede mitbekoo.
Wenn sie unverschlysslet schnuurt, denn isch das kai Verroot.
Well kai Mensch uf däre Wält, Walliserdytsch verstoot.

Es wird jetzt wirkligg schlimm das Joor, die Truur isch riisegross
Gib s Bänggle uf und ghei mi Gostym sofort duss uf d Strooss
Kai Väärs, kai Riim, au gar kei Bangg und gar kei Pointe stooht
Und alles nur well in däm Joor dr Hampe Wessels gooht

I ha sit letscht Joor Fluugschaam, Sii do fyylsch di richtig krangg
Elai bim Bligg in Reisefierer, merg i, dass i schwangg.
In d Luft do goni trotzdem, denn es wird mir langsam z bunt
Wenn i uf em Barfi stand, und gar kai Drämmli kunnt.

Sit zwei Mönet schaffi scho, s isch mer bald verlaidet
Uf dr Baustell vo mim Schatz, als Maa mit Bart verglaidet
Nur wäg mim grosse Härz, do grampf ich mit so super Gselle
Är het drum länger als zwei Wuche Pappiurlaub welle.

Mi Wöschmaschine spinnt e bits, i sagene das liis
Die het en Aigeläbe und isch mängmol zimmlig fiis.
Die helle Wöschdail färbt si jetzt, das isch e Fingerzaigg
Alli total violett, nur wäg däm Frauestraigg

I naag jetzt ney am Hungerduech und schuld dra isch mi Job
Bim Frauefuessball griegsch jo nüt, es isch dr reinschti Flopp
Doch mini lange Schiine und das findi wirgligg kegg
Verkaufe sich als Maitlibei rächt guet bim Sutter Begg.

Sin Sii bi däm Trend drbii? Mi Onggel E-mil au
Schribt E-mails, faart uf E-Bikes ab, und E-book machi schlau
E-Zigarette raucht är ney, das sigi kolossal
und ich sag e-motionslos, Sii das isch mir scheiss-e-gal.

Heb di fescht e Trotti kunnt, sunsch brusch no d Ambulanz
Drum han i jetzt au sälber ains und fahr mit Eleganz
Ganz logger bini unterwäggs und ligg nie ufem Ränzli
I husch jetzt ab, bis bald emol, yyre Bangg Frau Länzli

Väärs 2019

My Maa dä het grad zimmlig Mieh mit Gliichberächtigung
Nachem Job no Huushalt mache, bring yyn usem Schwung
Ich rief yym so vom Sofa uss, grad gmietlig liicht am chille.
„Gäll, muesch denn no in grosse Rooot, schnäll unser Kind go stille“

Dr Baschi Dürr het Aatraag gstellt, är bruch jetzt no mee frey
Dr Donschtig well är no drzue, wäg däre Grampferey
Dr Grund liggd uff dr Hand, isch zwiifelloos au vo Belang
Wäg sim Teslastromverbruuch, lauft d Wösch dopplet so lang.

Bi de Schwoobe gits jetzt bald, i weiss net isch das rächt
Net nur Fraue und au Männer, sogar s dritte Gschlächt.
Me rächnet jo net do drmit, dass die sich no vermeere.
Hoffentlig dien Zircher do drfoo denn net zvill leere.

Bi me Origamikurs, dasch Falte mit Papyyr
Hani gleert so Tierli z falte, s brucht e bitsli Gspyyr.
Die Sach isch wirgligg kreativ, löst s Parkbroblem vom Schatz
Si Auti het jetzt dangg däm Kurs i mim Handtäschli Platz.

Zweihundertdrissig Tonne Fleisch, es isch e Sauerey
Sin gschmugglet worde dure Zoll, ai Kilo wär nur frey.
Die hän kai Aahnig, wie mes macht, muesch offiziell dra goo
Hätt Kieh und Säu als Alpufzuug, grad iber d Gränze gnoo.

Es isch jetzt wieder trendy, losch als Frau e rächte Busch
Drum muessi nimm rasiere, weni zoobe amigs dusch
Mi Schatz maint, das isch cool und findets au no fotogeen
„Kasch alles frei lo wachse, nur net d Hoor uf dine Zeen“.

My Urolog het gsait Frau Länzli, lueg sii sin Stairyych
Nur wäg de glaine Stai im Buuch, was soll den dä Verglyych?
Jä, ryych si isch im Alter, denn net wirgligg mi besträbe
Im Altershaim in Laufe, nimmt me dir wäg däm gar s Läbe.

Wäg däne Anglizisme hani scho e bits dr Blues
I feel me net so sunny, s haut mi drum grad us de Shoes
Doch bi Dail Politiker, e weeneli zem Lache
Tönts cooler, dä isch crazy – als dä isch doch net ganz bache.

Probier e mol e Kilo abznäh, gäll das isch no schwär
Bisch mängmol rächt am hungere, dr Maage isch au läär
Damit i ändlig Gwicht verlier dringg ich au gar nimm Goggi
Doch s Schwierigste bi däm Problem, isch s ässe vo ka S(c)hoggi.

Halal, das heisst erlaubt, drum derfi Toblerone ässe
Das stoht jetzt neu dert druff, stosst aber net uf Interässe.
Erlaubt isch das wo gfallt, es isch egal, was do passiert
Drumm het dä Pfaff vo Riehe au die Buebefiess massiert.

Jä nei, wie bini gschoggd gsi an dr letschte Modeschau
Do lauft dört sone Wäse, dängg no, isch das ächt e Frau?
Die het drei Brüscht gha, genmutiert, sii das isch net dr Börner
Das kunnt, we me die Milch dringgd, vo so Kieh ganz ohni Hörner.

En aignes Gschäft, das wär mi Traum und hätti allzugärn
Jetzt isch die Chance ändlig do, i frey mi wie ne Stärn
Im Friehlig isches denn sowit, das wird au iine gfalle
Die riise Länzli Wöscherei, in lääre Mubahalle.

Bis zletscht han ich jetzt gsunge, s goht dr Muba au esoo
Dr Unterschiid isch nur, ich wird denn snägst Joor wieder koo
Zyt isch leider au verbii, s isch scheen gsy in däm Gränzli.
Saag aadie, und uff bald emool, yyre Bangg Frau Länzli.

Väärs 2018

Jä gueten Oobe liebi Lyt, jetzt bini wiider doo
Nach me Joor uf Scheenhaitsfarme, zaig i mi eso.
D Ärzt hän gsugt und gnait am Gsicht, e richtigs Umegstocher.
so gliich i doch jetzt sicher nimm dr Frau Martullo Blocher.

Guet ussseh isch als Weschfrau wichtig, das us guetem Grund
We me sich verjingered, no blibsch au länger gsund.
Mit Charisma und Intelläggd, do bisch vill mee presänt
Mi Mail isch wäg mit däne Tipps, an US-Präsidänt.

S Baue z Basel nimmt kai Änd, und das isch wirgligg s Schlimme.
Nur wäg dr Sperrig vo dr Brugg, do han i miesse schwimme
Wo n i so am Schwadre bi, schreit näbedra en Alte
Dä het mi wäg de neie Lippe fir e Schluuchboot ghalte.

I suech fir mi e ryyche Maa, e Promi wär no gail.
E bombe Uusgsee, durchtreniert, e knaggigs Hinterdail.
So aine, wo me guet verstoot, das wäri no dr Hit.
Sii mergge scho, dr Boris Becker wird das sicher nit.

Jede darf hyt nach sim Gusto, dunggt mi scho no richtig.
Wäg däm sin die Outings grad im Fuessball, zimlig wichtig
Ych als Frau stand au uf Männer, hauptsach ganz speziell.
Dorum isch mi Huffe Wesch, si seens omo-sexuell.

Me too…das rieft e mängi Frau, mir fyyle uns nimm frey
Was dä Harvey Weinstein macht, isch schlicht e Sauerey
Ich fordere drum fir dä Wicht, was alli Fraue mien.
E effentligi Metzgete, so wie sis d Sissach dien.

Si hän doch sicher au scho gheert vo Paradise-Bapiir
Die hän schins epis z tue mit BSchisserey und Zastergier
I ha kai Aanig vo so Gschäft, so goht s mer amigs oft
Bi uns dehaim, do kennt me nur s Bapiir vo Hakle soft.

Sotti do bi uns emol s Verbott fir d Burka koo
Denn root ich allne mit däm Gwand, zu dene Saudis z goo
Dert derfsch als Frau jetzt Auti fahre und das isch dr Hit
Mit 180 dure Blitzer und erkennsch si nit.

Hän sii Milz und Niere no? Die Froog isch ganz legal.
Wenn nit luegsch, denn lande die – schwups im Kantonsspital
Handel mit Organ, ka me persee nit nur Verflueche
S Hirni vo däm Playboy Buttet, sin si au am Sueche.

Was wäri s Färnsee ohni Billag stelle sii sich voor
Me kennti nimm dr Aeschbi luege oder d Fuessballtoor.
Ai Vordail hätti s trotzdäm no und wurdi sich au loone
Ooni das Schawinskygschnurr, do wurd me d Oore schoone.

Z Luzärn in Megge, dure Daag, do spugg i Gift und Galle
Het doch so n e alte Bappe, d Bangg dert iberfalle.
Nämmed eich in acht vor däne kriminelle Alte
ha jo au das Angi Merkel fir e Bravi ghalte.

Voll verwirrt und schwär konfus, vom Seggle total nass
Spalebärg und Freiestrooss, au in dr Schniidergass
Am Märtplatz bini au scho gsii, es loot mer gar kai Rueh
Jetzt gopferdeggel, wo sin denn die Läde mit de Schueh.

D Boscht goot ab, isch au mi Motto, immer wenn i sing
Wenn sii fir mi Glatsche dien, so isch das Sponsooring.
I danggene do gäärn drfir, s isch scheen gsy in däm Gränzli.
Saag aadie, und uff bald emool, iire Bangg Frau Länzli

Väärs 2017

D Frau Länzli het pausiert.

Väärs 2016

Omo, Ariel und Lenor bruuch ich Total zem Wäsche
Au Vanish Oxi und Sunil stegg yych in myyni Däsche.
Nùùr fir die beschti Suuberkait bruuchts no e spyyrli mee.
Drum baad i neischtens mit em Kostum grad im Eglisee.

Apropos schwimme, sie dasch ney und muess ene verzelle.
Haan i am ne haisse Daag, im Rhy go bade welle.
Doch wenn wäg vyyle Wasserplastiggdailimolekyyl
Denn ändlig mol zem Wasser usstiggsch, bisch e Playmobyyl

An scheene Dääg am Rhy kasch di vor Mensche gar nimm rette
I kämpf mit Ellebooge fir e Disch an dr Buvette.
yych verlier dr Abedyt, kum bin i aane gsässe.
Do bstellt doch so ne Schwoob e Bier mit Wiggelfisch zem Ässe.

Die junge Christe CVP, das duet mii doch sehr steere.
Wärbe mit me Frauefuudi fir e zwaiti Reere.
Mi Hinterdail wär au nit schlächt gsi fir uf das Blakaat
Nùùr syy hän grad sFormaat umgestellt vo Brait- uf Hoochformat.

Uss Parmelin git s Parmesan, Orangsche wärde Salz
Vo Sunneenergie git s Stroom, dr Raab dää gooht, mir gfallt s.
Veränderige mache unser Lääbe eebe ryych.
Nur dä bleed Schawinsky blyybt no allewyyl dr glyych

Hallo, wäär sin sii den? Sii iir Änglisch teent jo schytter
Die Pflutte do am andre Ändi schnurt jetzt aifach wyter.
No, i have not heard about that mit em breaking beamer
And the seven sinking steps, i glaub you are e dreamer.

So vyyl Donne wysses Bulver hän si konfisziert,
Und di ganzi Droogeszeene dodrmit blamiert.
DSchuggerei macht mit däm Fund uns alli graad zu Gwinner
Und laadet „Tout Bâle“ graatis yy, zem näggschte wysse Dinner.

Bim Wäsche bin i letschti ussgrutscht voll graad uf e Rugge
Im Granggewaage hani denn vor Schmäärz nur kenne zugge.
Pletzlig rieft dr Faarer miir, well äär jo doo muess längge.
Kenne syy am Spaalebärg no d Poller go versängge?

Jä, als Verfächterin vo rainer suuberer Natuur
Wäsch i wyssi Weschdail numme no mit Saife puur.
Dr Blatter Seppli vo dr Fifa kunnt mit volle Däsche
Und sait, los Länzli kasch mer net mi Weste suuber wäsche.

In letschter Zyt, es isch e so, das stoosst uf Interässe
Würscht sölle gräbserregend si, kasch aifach nyt me frässse.
Dr Toni Brunner findet dorum vegetarisch sGreeschti
Und kocht nach syyner Pensionierig jede Daag e Reeschti.

En IS-Frau suecht z Ziri Glaider in dr Baanhoofstroos
E scheene Girtel fir yyr Outfit wäär scho no famoos.
Im Guccilaade zaiigt me yyre ganz en Exklusive
Doch d Frau winggd ab, syy bruchi eenter ganz en Explosive.

I mach jetzt dicht, dr Laade zue und due syy do verloo
I danggene fir s Glatsche – dass yych ha deerfe koo.
Gnue dräggig Wèsch isch gwäsche jetz, s isch scheen gsy in däm Gränzli.
Saag aadie, und uff bald emool, yyre Bangg Frau Länzli

Väärs 2015

Mis neischte Hobby isch sit letscht Joohr sicher d Gärtnerei.
Die vyyle Sòòrte vo Dòmmaate sin dr letschti Schrei.
Damit si richtig root dien wärde, sii das isch dr Knüller
Zaig i dääne mitem Handy s Bild vom Geri Müller

Z Basel in de Altershaim gits huffewiis Protäscht
Mit Rolatoore kämpfe si und wänn gar nimm ins Näscht.
Dr neui Pfläger sigi schlimm, stoht uff Plakat und Kläber
Lieber no dr Berlusconi als dä Eric Wäber.

Sit Wuche schlugg i scho mit Fraid und das isch gar kai Hohn,
Jede Daag e glaini Doosis mit Teschtoschteroon.
Brischt verschwinde, dStimm wird tiefer, Hoorexplosion.
Jetzt fählt nur no e glaini Wurscht fir d Eurovision.

I spyyr do scho sit längerem, sii do kènnti wette.
Richtig Maage-Darm-Bròbleem wäg dääne Jod-Tablette.
Ich strahl zwar nimm, doch hani jetzt imänse Schmäärz bim Drugge.
I glaub, die hän dä Sprängstoff gno, us unsre alte Brugge.

Wäri d Schwiz e Monarchie, denn wär dr Roger Keenig
Zwei Prinze schänggd uns d Mirca sini Frau, das isch nid wenig.
D Geburt vo Zwilling zMonaco erläbsch uf jedem Sänder
Hänn die beide Dame ächt dr gliichi Soomespänder?

Basel waggst in Untergrund, i glaub das isch au s Beschte.
Nach Norde sin mer eh bloggiert, nach Oschte und nach Weschte.
Unteriirdisch loot sich denn, no mängs realisiere.
Basel ka ganz haimlig, so mit Lieschtel fusioniere.

Dr Eric Juillard vom Tattoo, do muess är gar net liege.
Het letscht Joor so ne Flugi tiefer iber d Lyt lo fliege
Es git kai Grund und dorum dueni das doch nit goutiere
Me kènnti doch au anderscht sini WC kontrolliere.

Mi Maa het letschti ganz erotisch Bildli vo mir gschosse
I ha das mit dr Raizwesch aigentlig no richtig gnosse.
D Verkaiffere im Lade langsam hässig meint banaal,
I gsee scho rächt, sii sin dr allerneischti Flaischskandal

Hallo, jä guete Morge, isch das Billag, bini richtig?
I ha n e Froog, isch ächt mi Schatz au voll gebiirepflichtig?
I ha scho gheert, sii wänn jo jetzt vo jedem Gschäft Gebiire.
Jä, sovill wie mi Hund do schisst, das wird denn ganz e diire.

Woni letschti vorem Rocheturm dure lauf kunnt aine,
In Vollmontuur und Helm am Kopf, speziell no wurdi maine.
Ganz fokussiert so segglet äär, als miessem Eppis glinge
I rief nur – Simi Ammann – vo däm Turm, do kasch net springe.

S Achtertram das bringt mi jetzt blitzschnäll zem Schwoob go boschte
S Auti loosch dehaim, das ka ganz still und haimlig roschte
Im Kaufrùsch dangg em Euro, do erliggsch grad jedem Wunsch,
Bis de merksch, dass vollbelade nimm ins Trämmli kunnsch.

Tagelang do bini uf mim Dach scho patrouilliert
D OSZE het gmeint ich sigi no rächt talentiert
Mit Kämpferstiifel, Handgranate, kriegerische Sache.
Gang i jetzt em Auderset si Sexbox go bewache.

I muess jetz laider d Fingge glopfe , fertig mit Tirade
I danggene fir s Glatsche – I pass in kai Schublaade
Gnue dräggig Wèsch isch gwäsche jetz, s isch scheen gsy in däm Gränzli.
Saag aadie, und uff bald emool, yyre Bangg Frau Länzli

Väärs 2014

Die neyschti Margge vo dr Boscht die isch vom Polo Hofer.
Wenn die läggsch, denn wirsch ganz high und no e bitzli doofer.
Nach fimfezwanzig Marggebööge isch s mer denn basiert.
Do hani au das bleede Gschnurr vom Bachelor kapiert.

Will dr Baschi Dürr am Frytig doch nit kaa go wäsche,
mach yych das jetz und find no mängs in siine Hosedäsche.
E Schrillalarm, e Läggerli, sogar e-n-Akkuschruuber
Fimfezwanzig Maargebööge, Baschi, gäll, bliib suuber

Dr dütsche Bundeskanzlerin do hange d Bagge-n-abe
Weder d Coiffeurrächnig no dr gross politisch Grabe
Kai Schmäärz am Zaan, kai sturme Kòpf ziet s Muul grad richtig Ranze
In die Bagge iinepflanzt sinn Ami-Abhörwanze.

D Russe hän mit Sotschi sicher aifach Gressewaan.
In Ängland wänn si spaare, leege so die U-Bahn laam.
S effiziäntischt Land isch d Schwyz, das isch ganz sicher sooo.
Es länggd e glaine Bagger und dr ganz Verkeer blibt stoo.

I bi für dFrauequote, jä e Bääbstin gäb s denn au.
Sogar mim Maa si Uroloog wär plötzlig au e Frau.
Mit re guete Mischig isch s denn halt au an dr Zyt,
dass es bi de Männer ändlig sälber Buschi git.

Sii mien nit meine, s isch eso, i due doo gar nit liege,
dass sii nur will sii do hògge, Sitzigsgälder griege.
Drum sitze sii, wäärts Bublikum, solangs nur iirged goot,
will d SVP sägd haimlig scho, am Stuel vom Bundesroot.

Wenn elai und ainsam bisch, denn machsch männgmool so Sache.
No redisch mit dr aigne Wèsch, s isch gar nit soo zem Lache
Sit em Abschiid vom Mandela sinn mir uns ganz nooch.
Und rede nur no mitenand in dr Gebärdesprooch.
I dringg als gäärn e Gläsli Wasser frisch grad ab dr Rèère,
durmischt mit glaine Blastiggdaili, s duet mii gar nit stèère.
Naimedùùre miemer halt dä Blastiggbärg recycle.
Doch wenn bim Pfunde Lego kemme, findi s no-n-e Haiggle.

Ich verstand die Angscht bim Sport nit wäge däne Schwuule
Dr Hitzlspärger schuttet guet und isch doch ganz e coole.
E Schwuulequote in dr Mannschaft isch doch no bequem
So wär die Fuessballl WM au im Winter kai Bròbleem.

S Gschiirlyysi Maieli siirpflet Giggelsaich.
Ganz bräschthaft wird’s re kotzerig, im Lärvli isch sii blaich.
Wenn jeede nur soo reede könnti, wäre mir ganz frei.
Alli wurde s Gschwätz verstoo, usser d NSA.

Wenn i als im Drämli sitz, denn duet s mi richtig gruuse.
Die Junge sin händycapiert und luege nimme uuse
Und will doch kain me mit mir redet, s isch jetz hèggschti Zyt
Nimm yych als statt em Handy grad mi Glettibrättli mit.

D Alice Schwarzer het e Konto – in unsrer scheene Schwyz .
Sii hinterzieht so Schwoobestyyre – und daas nit nur e bitz.
S isch Alice – wie bim Autofaare, bi Fraue garantiert .
Dii Gäld liggd uffem Konto, laider numme falsch parkiert !

Hallo, jä guete Oobe, bruuchsch du jetz grad mini Hilf?
Hesch Bròbleem, kunnsch nit in Gang und stoosch aifach im Schilf
Was? – steene sott i, hächle au, – was? – wotsch vo miir no mee?
Du bisch ganz lätz verbunde, do isch d Laitstell – BVB.

I muess jetz laider d Fingge glopfe und sii do verloo.
I danggene fir s Glatsche – dass yych ha deerfe koo.
Gnue dräggig Wèsch isch gwäsche jetz, s isch scheen gsy in däm Gränzli.
Saag aadie, und uff bald emool, yyre Bangg Frau Länzli