Man flüstert ehrfürchtig von ihr, wenn man über Frau Fasnacht spricht. Doch was bewegt Frau Fasnacht? Was treibt sie selbst an, und wer sollte sich vor ihrer Zunge in Acht nehmen? Seit der Fasnacht 2024 ist sie inkognito unterwegs und hat sich entschieden, ihre Verse als Aktive bei der BSG zu singen.
Väärs 2025
Ich bi d Frau Fasnacht, jä, das gseht me mir jo aa
I fühl mi wieblig, und e Bizeli als Maa
Drumm isch mi Name gendermässig kei Option
So nennet mi halt «non-binäri Fasnachts-Fachperson mit Gebährfunktion»
Die hüttig Jugendsprooch vom mim liebe Sohne-Maa
Isch schwär z verstoo, jä doch i pass mi langsam aa
Er het mi gfrogt «Mum- dr Donald Trump, ey wie finsch?»
No han i gseit ««schüsch Alte, dä Talahon isch voll cringe!»
I bi mit mim Göttibueb an dr Mäss go Dinos luege
Ihm hets so gfalle, s haut en hüt no uss de Fuege
Am Schluss lauft är nomol bim Tyrannosaurus duure
Und frogt «isch das e Zürcher do, mit dere grosse Schnuure?»
Nochdäm i letschti z viel Spinat ha gha zum Znacht
Han i uffs WC miesse renne, denn hets kracht
Im WC sehn i dr grien-bruun Stuehlgang uss dr Hoggi
I glaub das nennt me hützudaags au Dubai-Schoggi
Dr Mustafa Atici, jä sie, dä find i glatt
Treit d Verantwortig für d Schuele in dr Stadt
Wenn är uff Schuelbsuech goht, strahlt är zu beidne Ohre
Nur goht dä Zwuggel in de Kinder schnäll verloore
Jä sie, mi Maa isch sexuell gseh klinisch tot
Für mi Sexualverlange gsehn i leider rot
In dr Verzwiiflig han i dänggt, so unterdesse
I bewirb mi glaubs als Basler Politesse
Will d Armee meh Gäld brucht, isch jo schiins d Idee
In dr Entwickligshilf go spaare, mir duets weh
Jä dass die Ärmschte lyyde mien isch allerhand
Drumm liebi Griess und alles Gueti Baselland
Väärs 2024
Ich bi d Frau Fasnacht, jä, das gseht me mir jo ah
I fühl mi wieblig, und e Bizeli als Maa
Drumm isch mi Name gendermässig kei Option
So nennet mi halt «non-binäri Fasnachts-Fachperson mit Gebährfunktion»
Dr Detlef Schmidt, e dütsche Buur, seit sinere Frau
«Die blöde Klimakläber blockiere d Stroos und mache Stau»
No seit är «los, i muess für d Buure demonstriere»
«i nimm mi Traktor und gang d Strosse go blockiere!”
Ich bi e Rammstein-Fan, und loos gärn wie die kreie
stand am Konzärt ganz gigg‘rig in dr erschte Reihe
Schön parfümiert und gstrählt, doch denne laufts beschisse
Jä, bim uff d Bühni stiege sin mir d Stützstrümpf grisse
Die Intelligänz, die künschtig, isch e groosi Gfoor
Ka d Technik schlauer als der Mensch si, isch das woor?
Dass Technik schlauer sy ka stimmt, i sags euch lieber
Bim Donald Trump do länggt jo scho e Rächeschieber
I ha die KI ussprobiert zum Värsli mache
«Mach e Witz dass d Zürcher blöd sin, ein zum Lache»
«E sone Witz goht nit» het d KI sich beklagt
Dass d Zürcher blöd sin sig kei Witz, das isch e Fakt!
Mi Maa, dä stoot uff gmachti Fraue, jä s isch woor
Mit Plastikfrässi, grosse Brüscht und blonde Hoor
Heimlig schliicht er znacht, es haut mi uss de Fuege
Ellei ins Kino, dängg de Barbiefilm go luege!
Böösi Zunge saage schiins, ich sig e Maa
Doch an däm bitterbööse Grücht isch gar nüt dra
Ich bin e ächti Frau, das duen i garantiere
Zum Bischpiel kann ich wirgglig schampar schlächt parkiere
Dr Jositsch het mi gfroggt, wills ihn so schampar quält
An was es liggt, dass me ihn wieder nit het gwäält
Är isch zwar schlau, vernetzt und blickt bi allem duure
Doch s Manko isch und blibt halt sini Zürcher Schnuure!
Dr David Dääge isch e mol go Sushi mampfe
Doch nach em Kugelfisch-Steak fohts en afo krampfe
Er kriegt e Usschlag an sim Körper, s isch brutal
Grinsend seit är «sooo viel Pünggt, dasch genial!»
Mir hän e Freud am Beat Jans, und dorum gits
Scho Huffe Beat Fänartikel, dasch kei Witz
T-shirts, Fahne, Schal und, will d Form guet duet passe
Gits vom Beat Jans jetzt neu au Hänkeltasse