---

Väärs 2024

Die Usserirdische hänn pausiert.

Väärs 2023

S Evi Herzog sitzt dehei und klöönt: «Es het mi niemer gärn!»
«Nit wirgglig z Basel und au schwyzwit halt nit gnueg für Bundesbärn»
Verzwyyflet frogt sie ihre Maa: «Jä, aber gäll, du hesch mi gärn?»
Do seit är: «Gopf, was machsch du z Basel, i ha gmeint du sigsch in Bärn»

Dr Wettlauf uf dr Mond isch gwunne und dr Machtaspruch betoont
Sit 1969 weiht e US-Flagge ufem Mond
E sone bsetzerischs Verhalte giengt no schlimmer, s isch verreggt
Wäres d Schwoobe gsi, no hätte die dört s Baadtuech anegleggt

Wäg däm Pfoschte uss em Oschte und sim Krieg, das hämmer ghört
Styyge uff dr Ärde d Koschte und au d Wuet uff ihn wie gstört
Dr Putin wurd me gärn zum Mond uff schiesse, s Dumme isch nur dra
Jä, mir im Wältruum wänn de Pfoschte usem Oschte au nit ha

Die Energiekrise, die isch jo grad im Winter sehr prekär
Die frierend Frau däheim ushalte isch für d Männer zimmlig schwär
Zum warm ha will sie immer kuschle, das vertriebt dr wyyblig Kummer
Apathisch liggt er näbedra und freut sich richtig uff dr Summer

Dä infantili Infantino, Sie, dä spinnt jo als wie meh
Stadie wott er neu benenne nach em Fuessballgott Pele
Dä Gedanke hän mir witergspunne, s giengt sogar no kecker
Bald benenne denn die Dütsche d Gfängnis nach em Boris Becker

Dr Xi Jingping dä sitzt dehei bim Znacht, si Maage duet scho knurre
Mit sinere Frau und stopft sich Fried Rice mit dä Stääbli in si Schnuure
Das wänn mir au! Drumm sin mir glandet, und vor Schmärze fascht verreggt
Die hän uns s Stääbli zur Begriessig statt ins Muul in d Naase gsteggt

Liebi Kinder, dass dr Santiglaus, schyyns über s ganze Joor
Euch bespitzlet und Notize vo euch macht, das isch nit woor!
Dass är denn trotzdäm alles weiss vo euch, isch simpel schluss am Änd
Dä kriegt die Infos grad per Mail vom Berset sym Departemänt

Wo mien mir duure? Due rasch warte… Los, jetzt kumm i wieder druss
Bim Mars muesch rächts, bim Pluto links und denn bim Jupiter graduss
Bim Mond muesch denn no bizli abe, lueg jetzt ka me düttlig gseh
Die dümmschte Gschöpf vom Universum lääbe dört am Zürisee

Gits intelligänti Lääbensforme au uff deere Ärde do?
mir hän als Teschtobjäggt e Plankton und dr Eric Wääber gno
Intelligänt isch keins vo beidne, seit s Ergäbnis, s isch biz gspunne
Aber s Plankton het bim IQ Tescht mit riese Abstand gwunne

Dr Ronaldo schuttet jetzt jo bi de Saudis, s isch frappant
Und setzt dört sini Karriere ganz galant in Wieschtesand
E sone Transfer het s au z Basel gäh, das isch kei Träumerei
Will in dr Wieschti isch jetzt au e Plätzli für dr Alex frei

Uff unsrem Heimplanet do bloggt sit viele Joore, s goot ys z wyt
E sone läschtige, schmarotzende – e schlimme Parasit
Er bisst sich fescht und suugt denn Bluet und Energie und allerhand
I glaub dasch öppe s glyyche wie bi euch dr Kanton Baselland

Letschti gsehn mir usem Ruumschiff d Queen am Himmelstor vor Gott
Seit dr Queen: „Dass ich di kennelerne dörf, das find i flott“
«Y rutsch für di e biz uff d Syte, uff mim Thron hets Platz für zwei»
Do seit d Queen «Liebe Gott, y glaub i bhalt dä Thron für mi ellei“