---

Väärs 2024

Vermuetligg numme alti Männer – s’isch fataal
Steen im Herbscht als US-Breesidänt zer Waal
Mir sinn gspannt, ob die, wo noch dämm Amt dien strääbe
Dr Waaltermin daatsächlig physisch no erlääbe
Wie d’Party noch de Waale wird, das isch no ghaim
Mir tippe uff phirierti Snacks im Pfläägehaim!

S’isch wiider WEF und in de Zytige stoot gross:
«Es wird spannend, Röschti wider in Davos!»
Do frooge mir als Kech uns ainzig und ellai:
Nur mit Spägg oder au no mit Spiegelai?

Dr Womanizer Alain Berset – s duet is quääle
Fraueheld und Bundesroot isch wäg – duet fääle
Nur d‘Fraue z Bärn dien jetzt vyyl Bosityyvs entdegge
Die mien sich nämmligg nymme uff de Bäum vrstegge
Und uf sim Abschiedsvideo seen mir sehr gäärn
Si allerletschte Sytesprung im Byyro z’Bärn

Staarggi Handynutzig – kaschs nid ignoriere
Duet d’Zyygigsfähigkait vo Männer reduziere
Jetzt sott me doch vo dääre Daatsach brofydiere
Und jedem Zyrcher Maa e Handy offeriere

Syt em Debakel bi dr Crédit Suisse gitt’s Grach
Und unsri Bängger griege heftig ains uffs Dach
Me hett se als Kameel und Ratte tituliert
Do hett dr Tierschutz denne scharf interveniert
Kameel und Bängger unterschaidi doch e Huffe
S’ Kamel kenn drei Daag schaffe ooni ständig z’suffe
Au dr Vrglyych mit Ratte sigi nid zem lache
Denn s’gäb schon Sache wone Ratte nid wurd mache
In de Fuudischübbe – das isch au nid nytt
Hetts jetzt au mol e freie Blatz fir andri Lytt
Drby hänn Jobverlüscht au Vordail – mir hänn’s grafft
Bim Schrybdisch ruume hänn die Bängger s’erscht Mol gschafft
Und ihri bruefligg Zuekunft hänn si bald im Griff
Als Kurierfaarer fir Koks bi «Uber Sniff»

S’ gitt okulti Ritual, wo jede kennt
Hiener uff Friedheef z’ opfere isch voll im Trend
Und will Fasnacht nur bi Scheenwätter duet glinge
Hämmir do drfyr e Opfer welle bringe
Als Dierlischitzer simmer zem Hörnli marschiert
Und hänn uff Grabstai Tofu-Plätzli arrangiert.

150 Joor – dr Zolli jubiliert
Und jede bsuecht das Dier, wo är favorisiert
Styyrbeamti bi de Geier, dasch nid schreeg
Weight Watchers dräffe sich spontan bim Nilpfäärdgheeg
Versicherigsverträter geen zue de Hyäne
Leerer und Fuultier dien gärn mitenander gääne
Frindschafte schliesse Aawält mit de Kakerlaake
So viil Ärm zem döple – Priester liebe d’Kraake
Wäärend ins Affehuus die ganz Regierig goot
Daagt am Affefelse scho dr Grossi Root

Monschterväärs

Griezi Tourischte, Bsuecher, Gescht
Mir breesentiere Ihne s’Bescht
Nämme si Blatz zer Stadtrundfaart
Vo dr bsundre Basler Art

Baustelle hänn do Traditioon
Gheere scho lang zem guete Doon
Drumm hett’s bi uns ganz generell
All 20 Meter e Baustell

Scho d’Kelte hänn sich nid geniert
Basel mit Baustelle bloggiert
Wo d’Römer do hänn welle lande
Sinn si scho z’Rieche im Stau gstande

Und hett’s emol eventuell
Amene Egge kai Baustell
Herrscht drotzdämm yberhaupt kai Not
Denn dert sin d’Ample ständig rot!

Will halt Velo duure mien
Ischs mängmool drei Sekunde grien
Doch aigendligg weiss jedes Kind
Velofaarer sinn farbeblind

Fyr d’Autofaarer hetts am Rand
Amme e Verpflägigsstand
Und sott me anders z’Äässe welle
Ka me jo Ample-Uber bstelle

D Regierig duet au offeriere
Coiffeure z’schigge zem rasiere
Und Psychiater dien zueloose
Bi Hyylgrämpf wäg’ Amplepsychoose

Und ka me 20 Meter faare
Sott me sich Fraideschrey erspaare
Will denn findet sicher grad
E Intifadademo statt

Au in d’Heechi goot nid vyyl
Dr Globus-Neubau isch s’Byspiil
Dä wird schynt’s fertig uf Termin
So wie dr Flughaafe z’Berlin

Mir wäre Richtig Zentrum gfaare
Doch dä Versuech ka me sich spaare
Will iber d’Margarethebrugg
Kamme weder hi no zrugg

Z’Basel giengs wohl dytligg schnäller
Wär do nid unsers Esthi Käller
Äs vrsuecht im grosse Ganze
Jeede Daag zwai Baimli z’pflanze

Vermässe isch drum schlussamänd
Dr Namme Baudepartemänd
Aber d’Byyroo kennte blyybe
Zem e Schloofklinik betryybe!

Si könnes drumm sicher vrstoo
Mir sind kei Meter vorwärts koo
Goht nid bi däre Strosselaag
Adiee zämme – scheene Daag!

Und bitte sinn Si sich im Glaare
Mir bruuche Strosse nid zem Faare
Und dien Si ruhig dehaim vrzelle:
«Basler sinn süchtig noch Baustelle!»

D’Baustellepandemie foot aa
Jetzt kunnt bald die ganz’ Schwyz dra
Ain vo Basel – tarnt in rot
Sitzt scho in Bärn im Bundesrot!

Die Situation kennt eskaliere
Wie sotti d’Schwyyz druff reagiere
S’ gitt nu ei Wäg us däre Not
Die Gsalzene in Bundesrot!

Väärs 2023

Gueten Oobe liebi Geschtinne und Gescht
Zer Begriessig gendere mir «at it’s bescht»
Vo unsrem Fanclub sinn mit uns zum Uffdritt doo
Au Mitgliider und Ooni-Gliiderinne koo
Wenn Schnitzelbänggler – Schreegstrich – -inne Pointe streue
Duet das Zueschauer – Unterstrich – -inne erfreue
Iir als Bsuecher – Stäärnli – -inne sitzed doo
Händ vo Servierseen und -deechtre z’dringge bikoo
Da Väärs do – dää isch wirgligg guet und rächt
Aber s‘gitt halt doch no 70 andri Gschlächt!
Fir e Begriessig wird me drumm – und das kennt schluuche
Ganz grob gschetzt e gueti Viertelstund vrbruuche
Fir d’Sexualkund in de Schuele bruuchts denn rund
Wäärend 2 Joor ebbe 16 Wuchestund
Fir uns isch eebefalls e neis Brobleem entstande
Kyrzligg sinn mir vor 6 verschiedne WC gstande
Wo mir yyne sotte? Mir sinn nit druff koo
Und hänn’s am Schluss aifach in d’Hose laufe loo!

D’Queen isch im Himmel und mir mien uns jetzt draa gweene
Am 6. Mai dien si dr Charles dr Dritti kreene
Expäärte dien bezygligg Groone jetz erwääge
Linggs und rächts e Stigg fir d’Oore uusezsääge!

Dr Grossi Root het fyr Beamti – mir hänns gnosse
D’ 38-Arbets-Stunde Wuche bschlosse
Was die Bolitigger ganz offebaar nid raffe
Jetzt mien die arme Sieche dopplet so vyyl schaffe!

Mir sinn erschyytteret, betroffe und entsetzt
Behördewillkür – unsri Grundrächt sinn verletzt!
Mir sinn die ainzige in Basel – s’isch abstruus
Ooni aigni Baustell diräggt vor em Huus!

Mir wurde liebend gärn e Maa firs Lääbe finde
Aber hytt wott sich jo kuum me aine binde
Nämmet’s easy, ooni Stress: e Tipp firs Lääbe
Suechet Klimaschytzer – die dyen seer guet glääbe!

Was isch denn numme mit de Klimaschytzer loos?
Die glääbe ihri Pfeete yberall uff d’Strooss!
Vyyl eleganter duet’s dr Alain Berset lääbe
Dä duet sich mit sim Fuudi fescht an Sässel glääbe!

Raubyyberfall in Basel – mir sin ganz nooch draa
Und lyytte unverzigglig s’117 aa
D’Yyysatzzentraale nimmt grad ab – es dieg ‘ne laid
Dr Tesla syygi am ufflaade – nid bereit
Si kennte ender koo und Laadezyt yyspaare
Denn miesste Si halt ooni Blauliecht aanefaare
Ganz nätt vo uns wäär – ooni uns do welle zwinge
Wenn mir d’Räiber schnäll in Wooghof kennte bringe
Falls mir grad uss andre Grynd im Zyytdrugg wääre
Wärs au dänggbar dääne kurz dr Wääg z’erklääre
Falls es sproochlig schwiirig wär, dr Wägg z’verzelle
Kennte mir doch au en Uber für si bstelle
Alternativ kennte die Gängschter s’Drämmli nää
Ob’s uns denn meeglig wär, Minz für e Byyljee z’gää
Mir hänn denn gsait si miesse wiirgglig nid bresiere
Das syge Klimaschytzer, die wurd’s nid geniere
Si wurde seer gärn Tesla faare – das sig s’Bescht
Und inzwiische glääbe si am Schalter fescht!

Dr Ueli Muurer wärde mir niemools vrgässe
Si legendäre Fäärnseeuffdritt –dä hett gsässe:
“Hello CNN – do you me understand?
My Name is Ueli Muurer – Chief of Switzerland
I can say nothing to the questions you do stelle
Because I can in English not a word vrzelle
I speak a secret language – you must that kapiere
That can not emol your Gheimdienscht dechiffriere!”

Monschterväärs

Mir Gsalzene sin irritiert
Dr Wildi Weschte erodiert
D’Problem vo hit – mir sin am truure
Mache us Helde Witzfyguure

In Tombstone wilde Bulvergnall
Bandite bim Banggyyberfall
Dr Sheriff fäält in däm Momänt
Är schafft nur no 60 Brozänt!

McKinsey duet sich nid geniere
Dr Wildi Weschte z’optimiere
Drum sinn vo de Glorryyche Siibe
Numme no drey yybrig blyybe

Dr Lucky Luke – mir sin entsetzt
Hett me in Ruestand vrsetzt
Är aigni sich nid – ziet vill z’schnäll
Fir e Jobsharing-Modäll

Dr Winnetou – närvligg am Änd
Said zue sim Frind Old Shatterhand:
«Mir dien – es duet mi rächt geniere
Kultuuraaeignig braggdiziere!»

Yych waiss es isch seer schwäär z’erdraage
Mir kenne au nimm Biiffel jaage
Dr Grund dä kann ich Dir erglääre
Yych due mi jetz vegan ernääre!

Und yych sag dr: Zimmligg glyy
Ryyte mir nimm durch d’Prärie
Daatsächlig hänn unseri Pfäärd
Usserscht schlächti Abgaswäärt

Vo dr Määne bis zum Schwanz
E myysi CO2-Bilanz
Drumm steen in unsrem Reservat
Elektrotrotinett baarat

Und im Rossstall – s’isch zem kotze
Dien d’Gäul vo dääne Helde motze:
«Miir schwinge fyr Eych nimme d’Huefe
Dien uns uff’s Dierschutzgsetz beruefe!»

Und drumm gschetzte Shatterhand
Isch unsri Partnerschaft am Änd
Yych mues – und bi e bitz e Beese
D’Bluetsbruederschaft mit Dir uffleese.»

Dr Shatterhand said: «Ganz genau
Yych fyyl mi neyerdings als Frau
Und somit wäär ich halt sit geschter
Sowiiso dini Bluetsschweschter»

Die Situation kennt eskaliere
Wie sotti d’Schwyz druff reagiere?
S’gitt nur ai Wäg us däre Noot
Die Gsalzene in Bundesroot!

Väärs 2022

Dr Novak Djokovic – me hett’s zur Kenntnis gnoo
Hett Lämbbe wäg me positive Thescht bikoo
Aber eins stoot bi im leider Gottes fest
Dr ainzig negativi isch si IQ-Thescht

E Drittel Frauequote wott Gott nid uff Äärde
Sunsch hätt dr Jesus jo e Maitli miesse wäärde
Und dass au Gott kai Frau isch, gseet me doodraa guet
Dass Zalando nid in Himmel liefre duet!

Wotsch mit dr SBB go raise, muesch vyyl warte
Warte, warte, warte, nyt als warte
Und kunsch denn ändligg z’Basel aa wär das jo toll
Hätsch nid wääg’ kabutte WC d’Hoose voll!

Zum Thema uriniere wämmer no vrzelle:
Im neie Waggelzug sotsch d’Bysswaar gweerwääg stelle
Doch dass es das nid bruucht das hämmer schnäll begriffe
Will wenn de s’Bier verschittisch, muesch gar nid go schiffe

Mir hänn vom BAG e Telefax bikoo
Und hänn vom Gsangsverbot fir Bänggler Kenntnis gnoo
Unsri Deechtere hänn gfrogt: «Hänn die e Gnaggs?
Und was um Gottes Wille isch e Telefax?»

«Social Distancing» – das isch s’Patäntrezäpt
Mir hänn ai Meter, zwai und ainehalb erläbbt
Fir Basel / Ziiri sinn mir schnäll uf d’Leesig koo
Und wurde s’gärn bi 90 Kilomeeter loo

Monschterväärs 1

Zum die scheeni Fasnacht ooni COVID z’gniesse
Hämmer uns fir’s Boostere aamälde miesse
Und zum dä Schuss z’bikoo, nid moorn – vyyl besser hytte
Hämmer sofort bi dr Impfhotline aaglytte

E nätti Frauestimm nimmt ab – mir wänn grad starte
Doch s’isch e Doonband wo uns danggt – mir solle warte.

Denn heert me Musik, denn e Stimm – ganz rueig, nid ghetzt:
«Unsri Laitige sinn laider alli bsetzt»

Inzwische sinn scho eppe 10 Mynuute duure
Und mir sinn effegdiv scho zimligg uff dr Schnuure

Denn kunnt die scho bekannti Stimm – s’isch zum verlaide:
«Als näggschtes mien Sie jetzt d’Bedienigssprooch entschaide:

Drugge si 1 für Mandarin – 2 für Kirgisisch
3 für Sanskrit oder 4 für Portugiesisch
5 für Norwägisch und 6 fir alli Finne»
Mir loose zue und frooge uns, ob die denn spinne

Und jetz beschlyycht uns Angscht, die duet uns zimmligg gwääle
Am Schluss kennt uns fir Dytsch sogar e Thaschte fääle

Denn e Hoffnigsschimmer – isch dä wool zue rächt?
Unsri Frauestimm frogt uns noch unsrem Gschlächt:
«Männer sinn mit Drugg uf 1 grad regischtriert
Thaschte 2 isch fir Transgender reserviert
Thaschte 3 wenn Si sich fiele wie ne Frau
Und 4 wenn Si sich saage: weiss es nooni gnau»

Mir sinn nervees und drugge irrtümligg e Thaschte
Schon simmer wieder bi Schritt 1 – noch am Ussraschte

E Stund isch umme und das Ganze stresst uns bees
Schwääri Augeliider – bald scho komatees

Die Impf-Hotline belaschtet uns daatsächligg fescht
Us Langewill mache mir schnäll e COVID-Thescht
Und dä Schnällthescht – es wird Eich jo nid erstuune
Isch positiv – und das versaut uns heftig d’Luune
Jetz mien mir d’ Hotline wäggsle, es isch zum verflueche!
Und geen d’Nummre vo dr Theschthotline go sueche

Mir wääle sofort d’Thescht-Hotline – e Stimm goot draa:
«Si lytte usserhalb de Byyrozitte aa! »

Monschterväärs 2

Mir Gsalzene – s’isch trivial
Sinn als Bangg glyymaneidraal
Pro Fuurz dien mir im grosse Ganze
Jedesmool e Baimli pflanze

Bolitigger – die miest me zwinge
Pro Fuurzidee e Baimli z’bringe
Mit dämm Mischt wo die broleete
Bewaldisch logger 10 Blaanete!

Unsri Kinder dien skandiere
Fir s’guete Glyyma demonschtriere
Und s’Mami faart se – voll drbyy
Zur Demo mit em SUV

Goorpse d’ Säi und fuurze d’ Kie
Macht das de Glyymaschitzer Mie
Drum regiere – s’ kunnt no digger
Bald die vegane Käärnlibigger

Veganer ässe – sone Drägg
Unsrem Ässe s’Ässe wägg
In unserer Stammbeiz gitt’s nyt z’welle
Do kenne si nur s’ Taxi bstelle

Und sinn Veganer schliessligg doot
Isch glaar was uff em Graabstai stoot:
«Er hat – Ihr sollt es alle wissen
Das letzte Mal ins Gras gebissen.»

Wenn d’Meeresspiegel iberboorde
Kemme us Holland Flichtlingshoorde
Dr Voordail hämmer schnäll begriffe
Die bringe ganz viil Stoff zum kiffe

Am Nordpol spyyrt me ganz diräggt
Dä globaali Haiz-Effäggt
Wenn d’ Eskimo Banane pflanze
Friert’s de Pinguin nimm an Ranze

Dert oobe isch e some stolze
Eskimo si Iglu gschmolze
S liggd nit am Klima hett är checkd
Er hett s’Glettyyse nid usgsteggd!

Schmilzt s’ Poolaryys eso wyter
Wird’s au in dr Wieschti schyter
Denn bruucht dr Beduin in Noot
Fir si Kameel e Rettigsboot!

Die Situation kennt eskaliere
Wie sotti d’ Schwyz druff reagiere?
S’ gitt nur ai Wäg us däre Noot
Die Gsalzene in Bundesroot!

Väärs 2019

D Basler Bolizei wird elleggtrifiziert
Drum wärde Tesla-Schuggerauti importiert
Denn si basse guet und sinn nid numme schigg
Zem Baschi Dürr sinere Schwachstrombolytigg

Au d Schwyzer Schwinger hänn jetzt e Dopingskandaal
Fir e Nationalsportart nit triviaal
Drum dien sich Dopingjeeger stergger engagiere
Leen vor em Donnschtigsjass ins Reerli uriniere!

Uff em Negro Rhygass-Logo – das isch woor
Hett e Pigmentierte Gnoche in de Hoor
Dr Vorstand konteret d’Grytigg mit grosser Glass
Und nennt si Gugge kimpftig «Negro Gärbergass»!

Voorgänger dien d’Viola Amhärd inschpiriere
Am maischte duet ire d’ Ruth Dreyfuess imponiere
S’isch nid d’Erfaarig, die bolytischi – nai laider
Si hänn dr glyychi Gschmagg in Sache Schue und Glaider!

D’ Chinese fliege mit’re Sonde hindre Moond
Zem uusefinde, ob dert ebber läbbd und woont
Und uff em erschte Bildli, lueged emool aa
Gseet me im Byyroo sitze: s’Bethli Ackermaa!

E riise Volggsfescht und e Fyyrwäärgg in dr Nacht
In dr ganze Stadt wird danzt und und gfyyrt und glacht
Worum sin d’ Gänfer hocherfreut durch d’ Stroosse zooge?
Dr Maudet haig e ganzi Wuche lang nid glooge!

E Neyigkait – die hett uns mächtig imponiert
S Ryyschwimme wird kimpftig professionalisiert
Als OK-Chef wott me dr Streller beschtefalls
Dämm stoot jo s’Wasser scho sit Langem bis zem Hals

Bim Fescht vom FCB isch d’Frauemannschaft bees
Dass si Los verkaufe mien sig skandalees
Drum duet dr Club sich nei mit Chennai zämmerauffe
Denn kenne d’Inder frooge: «Wolle Rose kauffe?»

Monschterväärs

Duesch Subventione abkassiere
Uff fremdi Keeschte di saniere
Schmarotze isch di Lyydeschaft
Denn bruchsch en EU-Mitgliedschaft!

Dr Putin – halbblutt uf sim Gaul
Maint: «An EU isch was faul!»
Dr Erdogan styygt vo sim Schoof
Und said: «Die EU find ich doof!»

Bim höggschte EU-Kommissäär
Ischs mit Aastand nid wyt häär
Kunnt dr Luschtmolch Jean-Claude Juncker
Haues d’Fraue ab in Bungger

Dr EU-Vorsitz – das isch woor
Hänn jetzt d’Rumääne – e halbs Joor
Die erscht Reform isch so banal
Däschediebstaal wird legal!

Und das befiirwoorte d’ Bulgare
Si haige ständig Strooffverfaare
Voll Missgunscht regglamiere d’Poole:
«Die Idee isch vo uns gstoole!»

Kai bitzli intresiert das d’Lette
Will die nur Subventione wette
Rootschleeg drfiir gitts vo de Eschte
Bim Moogle sige si die Beschte

Das mit de EU-Subventioone
Duet sich fir d’ Grieche mächtig loone
Mit 40 geen si in däm Land
In woolvrdiente Ruestand!

Fir d’Italiener sinn die Grieche
E Vorbild und ächt gaili Sieche
Will fir d’Biirger vo Italie
Isch Schaffe ender e Lappaalie

D’Zypriote und d’Malteser
Stosse aa mit Schämpisgleeser
Und verkaufe iber d’Gass
Fir 50 Stutz en EU-Pass!

Greativ in dääre Gryyse
Brofitiere d’ Portugiese
«Will sälber schaffe wie die Schwede»
Said dr Spanier «ka jo jede»

Z’brav zem Bschisse, s’isch zem Gääne
Sinn im Norde obe d’Dääne
No wiiter neerdligg grampfe d’Finne
D’ Ungare finde: «Hey die spinne!»

Dangg Whisky dien d’Schotte und d’Ire
Das ganze Drama kuum me spyyre
Und d’Auge vo de Niederländer
Hänn vom Kiffe roti Ränder

Nonig begriffe hänn au d’Briitte
Was dr Brexit wird bedytte
Dr James Bond duet bald d’Auge rolle
Noch zwai Stund in dr Basskontrolle!

Im EU-Rot e Rieseszene
«Hey s’Gäld wird knapp!» motze d’Slovene
«Kai Panik» maine do druff d’Tscheche
«D’Schwoobe zaale immer d’Zeche!»

Die Situation kennt eskaliere
Wie sotti d’ Schwyz druff reagiere?
S’ gitt nur ai Wäg us däre Noot
Die Gsalzene in Bundesroot!

Väärs 2018

D Islamischte dringe vor, so kas nit goo
Si verändre unsri Gsellschaft noodisnoo
Mit de erschte Fyyrtig geen sie jetzt an Staart:
Es sin Gründönersdaag und Grischti Hammelfaart!

D’Schotte stimme ab, wänn UK nid verloo
Spanie sait: „Ir Katalane blyybet doo!“
In dr Schwyz gieng das harmonisch ooni Mais
Adie liebe Ziircher, gueti Rais!

Mit Sekundeglääber kasch mängs repariere
Araldit wurd d‘ Naase vo dr Sphinx fixiere
Dr allersterggschdi Lyym kasch z‘ Basel-Stadt erlääbe
Dangg dämm duet dr Wessels an sim Sässel glääbe!

Dr Constantin duet dr Fringer aabeschloo
Wenn me dr Fringer kennt, denn kaa me das verstoo
Aber vermuetlig wurds no me Vergniege mache
Wurd dr Constantin sich sälber aini bache!

No Billag droot – s‘ Receycling wird lanciert
Dr Hüppi isch scho nach St. Galle transferiert
Dr Aeschbi wird im Pfläghaim Bingo moderiere
Und dr Schawinski duet me artgrächt komposchtiere!

D’ Mumie us dr Barfi-Kirche isch erkannt:
Mit em Boris Johnson und dr Queen verwandt
Bi däre Lääderhut mit Runzle fallt uns yy
Das kennt au s’ Omi vo dr Gigi Oehri syy!

Fremdi Richter wämmer nid bi uns im Land
Fremdi Richter wämmer nid bi uns im Land
Fremdi Richter wämmer nid bi uns im Land
Fremdi Richter wämmer nid bi uns im Land
Die Widerhoolig hett nyt ztue mit Gnusch im Kopf
Dr Cassis druggt uns ständig uff e Reset-Gnopf!

Monschterväärs

Ummeschwaafle, wenig schaffe
Frauefuudi nochegaffe
D‘ Lambbe fille – immer gäärn!
So lauft’s im Bundeshuus in Bäärn

Sexskandal im Pharlamänt
Demokratie isch bald am Änd
Dert dräffe linggs-grieni Emanze
Uff alti Lustmelch mit ‘me Ranze

Und im Verpfläägigs-Automat
Liigd‘s Viagra schon baraad
Wenn die Entwigglig wytergoot
Hämmer bald e Ständer-Root!

Im Bundeshus tobt är jetzt au
Dr Urkampf zwische Maa und Frau
Zwische de baide Schützegrääbe
Duet dr Martullo-Blocher lääbe

Bi Brobleem – rain sexuell
Gitt’s jetzt e Berotigsstell
Als Chef bewirbt sich – s’isch e Knüller
Mit Bild vom Schritt dr Geri Müller

Was? Wie? Wenn? Vor allem, woo?
Ka me sich begrabsche loo?
Wo isch mi superhaisse Checker?
Froogt d‘ Oberholzer-Leutenegger

Ebbis isch tatsächligg woor:
Aine isch dert gar kai Gfoor
Er hett e munzig glaine Böbbel
Mir reede do vom Roger Köppel

Harmlos: Dr greescht Bubi vo alle
Er haisst Christian Wasserfalle
In 10 Joor wird är fescht verschregge
Und erschti Hoor im Schritt entdegge!

Dr Eymaa seet das akademisch:
Die Diskussion sig so polemisch
Är haig fascht allne noochegstellt
Als promovierte Wyyberheld

Oobe in dr Wandelhalle
Wott mänge sich aini go kralle
Nur dr Ueli Giezedanner
Macht doo nid mit – är isch e Spanner
Me said: Dr wirgligg allergröschti
Boliddisch Yyfluss haig dr Röschti
Fir d’Fetz sin das nur Männerfaxe
Will ire isch jo kaine gwachse

Dr lieb Gott said: „Petrus, ojee
Schlimm stoots um mini CVP!
Dr Yannick Buttet isch e Büffel
E Frauegrabscher und e Süffel!“

D‘ Dienstwaffe hett är miesse abgää
Die in dr Hoose kasch em nit nää
Doch im Wallis sage d’Wyyber:
„Kai Angscht, s’isch numme Glaikaliber!“

Die Situation kennt eskaliere
Wie sotti d’ Schwyz druff reagiere?
S’ gitt nur ai Wäg us däre Noot
Die Gsalzene in Bundesroot!

Väärs 2017

Väärs 2016

Vor de Waale fir dr Bundesroot, das loot sich nid negiere
Hett’s dr SVP an Fraue gfäält zem unser Land regiere
Dr Voorstand isch sich ainig, dass es neii Fraue bruucht
Drumm mälde si sich alli aa bi „Bauer ledig sucht“!

D’Angi Merkel het in Bärn dr Eeredoggter iberkoo
Wo sie nach gschlagne siibe Joor erschyynt, do meint dr Räggter froo:
“Schöön heit dir so schnäu dr Wääg do hääre gfunge us em Norde,
Wüu graad geschter simmer mit dr Ehreurkund fertig worde.”

E Nasa-Mediekonferänz het kiirzlig d’Wält beweggt
Uff em Mars haig me e primitivi Lääbensform entdeggt
Die ainzig Froog sig no: Wie kennt me die Amöbe kondaggtiere?
Unsre Vorschlaag: Dient‘s uff jede Fall mit Ziiridytsch broobiere!

Fanatischte das sin Mensche, die wänn d’Wält indoggtriniere
Extremischte das sin Fundis wo sich um d’Gsetz dien futiere
Wenn so Lyt wotsch finde, kasch dr d’Rais in noche Oschte spaare
Lueg nur d’Veeloofaarer aa wo näb‘ dir iber s’Rootlicht faare

Dr Gepetto seit: “Pinocchio mir mien dini Naase theschte.
Wie erraiche mir die maximali Lengi ächt am beschte?
Kum neecher, glaine Holzkopf, und denn flischtrisch in mis Oor:
„D’Krankekasseprämie styyge nit im näggschte Joor!”

Völkerwanderig und d‘ Bolizei duet d‘ Gränze kontrolliere
Menschemasse pilgere – die ganzi Sach kennt eskaliere
Vom andre Land verspräche si sich Woolstand, sueche s’Seelehail
Das sin im 8er unsri Wirtschaftsflichtling uff em Wääg nach Weil

Bim Hörnli-Friidhoof z‘ Rieche muess me d‘ Oefe reppariere
Bis das fertig isch mien Basler sich in Ziiri loo gremiere
Wenn denn e Bebbi mit ‘me Schnuppe stirbt und sich vom Lääbe drennt
Wird in Ziiri s’erschte Mol e Basler Böög vrbrennt!

Und sott dr Schwyzer vo dämm Joor sich uff die letschti Rais begää
Wurde d’Zircher d‘ Gremation vom Polo Hofer ibernää
So wie dä sich immer zudröönt hett – das hänn si schnäll begriffe
Kennt die ganzi Stadt sich an simm letschte Räuchli go bekiffe!

Au dr Terrorischt muess zue sich luege, sott sich gsund ernääre
Wie das hitte lauft dien d’Gsundhaits-Spezialischte uns erglääre:
„Die ainte, wo Veganer sin, die nennt me ‘Salatischte’
Und die wo gärn emol en Esel mampfe, haisse ‘Salamischte’“

Gnabb 7 Kischte Schmiirgäld – d‘ Fuessball-WM duet fascht nyt me koschte
Mir drei hänn zämmgleggd und mechte uns jetz au so aini boschte
Doch als alti Speggulante dien mir waarte, bhalte d‘ Rue
Will im Uusverkauf gäb’s schyynt’s no d‘ EM koschteloos drzue

Monschterväärs

In ere dunggle Gfängniszälle
mache d’Knackis froo e Wälle
Die maine Grund zer Stimmig z‘haa
Hit kemme d’Fifa-Bosse aa
Im Fimfstäärn – Hotel Baur au Lac
Woont e mäng‘ korrubte Sagg
Dangg dr Zircher Bolizei
Sinn dert jetzt eefters Zimmer frei
Wär kennt d‘ FIFA jetzt verwalte
Und dr Betriib uffrächt erhalte?
S isch glaar, dass das nur d‘ Butzfrau schafft
Die sitzt als ainzig‘ nid in Haft!
Vom FIFA-Kassier isch z’erfaare
Jetzt kamme richtig Speese spaare
Vorstandssitzige mit Znacht
Gitts ab jetzt in Zälle acht
En Uffschrei goot durch d’Fuesball-Wält
E WM kaufsch fir wenig Gäld
Die Dytsche hänn e WM gstoole
das kennt me sunscht nur vo de Poole
Dr Kaiser Franzl Beckebauer
Vom IQ här kai Gassehauer
Verträgli unterschriibd är gäärn
Doch vorhäär lääse liggt im fäärn
D’Schwyzer – brav und gwissehaft
Hätte sich gärn e WM bschafft
Mit Schmiirgäld miechte si gärn Drugg
Doch d’Meerwärtstyyr die wänn si zrugg!
Dr Mafiaboss sait zue sim Soon:
“Du bisch e Weichei, s’isch e Hohn!
Wird griminell, mach uns kai Schand
Als erschts wirdsch FIFA-Praktikant
Fir d‘ Blatter-Noochfolg diens di zwinge
E Stroofregischteruuszuug z’bringe
Denn ooni Vorstroof – s’isch banal
Hesch kai Chance uff e Waal
Als Noochfolg fir dr Seppi Blatter
Bewirbt sich au dr Hailig Vatter
Doch „nai“ said d’Ethikkommission
„Bi uns schafft kain fir Gottes Loon“
Us Jordanie dr Prinz Ali
Isch dr ainzigi Normali
mit im do wurd dr Fluech durchbroche
är isch beschnitte, nit bestoche
„D‘ Bolytigg sott d‘ FIFA rette!“
Dänggd s‘ Doris Leuthard sich bim glette
„Mr kennt dr Ueli Murer wääle
Dä wurd bi uns uff kai Fall fääle!“
Die Situation kennt eskaliere
Wie sotti d’ Schwyz druff reagiere?
S’ gitt nur ai Wäg us däre Noot
Die Gsalzene in Bundesroot!

Väärs 2015

Noch 6 Milliarde Kilomeeter Flug hett d‘ Sonde sich blatziert
Doch d‘ Rosetta hett uff däm Komet denn zimmlig scheps pharggiert
D‘ ESA hett vrlute loo: Das Pharggbrobleem hett me gsee koo
Drum haig me fir die Sonde au bewusst e Frauenamme gnoo

S gitt beesi Gricht in unsrem Land: Dr Fuessball machi dumm
Doch Schutte isch e Läbensschuel – mir saage Eich worum
Bi de Dääge-Brieder leersch mit Finger rächne bis uff drei
Dr Herr Busacca zaigt s’Rasiere mit em neie Freistosssprey
Bi Luzärn do lersch als näggschts mit Niiderlaage feertigzwärde
Bim FC Sion usserdäm: S gitt nur ai Gott auf dääre Äärde
Bi GC-Haimspiil kasch im Staadion s’Ainsamsyy drainiere
Uff em Brügglifäld in Aarau denn no Aggerbau studiere
Und bim FCB im Joggeli isch jede gärn drbyy
Wo aimool in sim Lääbe wetti Schwyzermaischter syy

Friener hämmer Hardrock, Big Mac und e Jointli yynezooge
Hit längt fir die blaich‘ Veganerjugend Randesaft als Drooge
Und dr Grund, worum die s‘ Helen Fischer stundelang uushalte:
Die sinn ganz aifach physisch z’schwach zem s‘ Raadio abschalte!

E WM z‘ Russland und denn z‘ Quatar isch fir d‘ Sportwält s‘ Allerbescht
Dr Suuberwäschbricht vo dr FIFA leegt das zwyyfelsooni fescht
Lut dr Ethikkommission isch Korrubbtion komplett uusszschliesse
Joo und näggscht Joor duet dr Ryy vo Rotterdamm uff Baasel fliesse!

E Drittel Frauequote wott dr liebi Gott doch nid uff Äärde
Sunsch hätt dr Hailig Gaischt oder dr Jesus wyybligg miesse wäärde
Und nadyyrlig isch au Gott kai Frau, das gseet me doodraa guet
Dass Zalando nid scho lang diräggd in Himmel liefre duet
Dr Herr Schawinski isch e Glassekämpfer, setzt sich lutstargg yy
Geege Gneebeligg, fir Redefreihait und Demokratie
Doch wenn dr Roger schwaafle heersch, denn fallt d‘ Erkenntnis gar nid schwäär
Dass e Beschränggig vo dr Reedefreihait isserscht wintschbaar wäär

Monschterväärs

S gitt nur ai Wääg us dääre Noot:
Die Gsalzene in Bundesroot!
Drei Mussgedier statt siebe Zwäärgli
Denn wäär das Land glyy iibrem Bäärgli

Zem d’Nordweschtschwyz vorwärts dryybe
Dien mir Gsetz mit Pointe schryybe
Per Noträcht ooni Landroots-Gfaasel
Gäbs Fasnacht numme no in Baasel!

Mir wurde uns kai bitz geniere
S‘ Banggegsetz grad revidiere
Vrbiete Schnitzelbängg ganz fyys
Und gwinne soo dr Zyyschtigsbryys

Und bim ÖV iber d‘ Gränze
Gäbs no ebbis glains z‘ ergänze
Zem Sozialkeschte iispaare
Derf d‘ Linie 8 nur uusefaare

Au fir unsri Autobaane
Wurde mir neyi Regle blaane
Wenn Usfaarte in Zyri ände
Derfsch ab sofort strofloos wände!

Denn lemmer neii Schilder stanze
„Tempo 30 uff Schisprungschanze“
Dr Simon Amman, ‘s wär so schlicht
Miesst nimme brämse mit em Gsicht

Au ooni uns – jetzt miend iir loose
Goot bolytisch mängs in d‘ Hoose
So sin em Griene Gerry Müller
Sini Selfies ächt e Gnüller
Äär sitzt im Stadtrootssaal in Baade
D‘ Hoose dunde bis zer Waade
Und hebd sii iPhone – uns wird’s schlächt
Vor si kimmerligs Gemächt

In Baasel isch bi Grien und Root
D‘ Erotik bald scho klinisch doot
Dasch d‘ Konsequänz – mir miens bedoone
Vo z‘ viil vrkeersberuigde Zoone!

In Zug duet Grien sich nid scheniere
Mit SVP wild z‘ kopuliere
Drum steert sich Grien dert nimm so seer
Am Individualverkeer!

Mir diens jetzt nomool boschtuliere
D‘ Schwyz muess ändligg reagiere
S gitt nur ai Wääg us dääre Noot:
Die Gsalzene in Bundesroot!

Väärs 2014

Dr BVB-Diräggter hett me gschasst und das beriert uns seer
Drbyy hett äär en doch nur wertligg gnoo – dr effentlig Verkeer
Und drzue dien sini Blüddlibilder voll ins Schwarze braiche
Denn wo zwai Schiine zämmekemme – said dr Drämmler – hetts e Waiche

Musterbyspiil fir e Frauequote hänn uns imponiert
Drumm hämmer s‘ Moulin Rouge mit grossem Yysatz inschpiziert
Drotz Euphorie fir scheeni Frauebai duet uns Bsorgnis quääle
Will niechtern gsee jetz all die Dame hintrem Härd dien fääle

Bi Basel – Schalke gsesch wie d‘ Greenpeace Lytt e Helge dien entfalte
Wäärend d‘ Fans sich närve flibbe im Tertianum alli Alte
Voll Fraid said s‘ Zaanloos-Röösli denn zem Rumpfelhuffe-Megge:
„Mit däre Technigg kenntsch Di Brunggstigg uff zwai Santimeeter stregge!“

D‘ Baaagraaferytter nämme uns mit neie Gsetzli draa
Wär am Verkeer dailnimmt muess au am haitre Daag si Liecht a haa
Bi de Zyrcher macht me drum mit Buessegälder satti Gwinn
Will die bekanntlig permanänt unterbeliechtet sinn

Die Herre Sarkozy und Hollande sinn zwai giggerigi Zwärge
In dr Bolytigg vrsetze si drgege kaini Bärge
Si wandere vo Rogg zue Rogg und dien sich verlustiere
Mit Bluetarmuet im Hirni loot sich’s ebbe schlächt regiere
Mit däm Brofyyl, do hätte si – und das ganz ooni Häxerei
Karrierechance bi dr Zyrcher Sittepolizei

Bis jetzt hänn d‘ Brite in Ägypte Gold und Mumie gstoole
Chelsea goot jetzt neii Wääg und duet d‘ Ägypter läbig hoole
Als ainzig‘ Änderig fir näggschti Saison – mir dien’s konstatiere
Wird dr FC Chelsea mit em Salah gege uns vrliere

D‘ Oprah Winfrey wird sit Moonede scho gruppetherabierd
E Verkaifferin in Zyyri hett se yyskalt abservierd
Dä sogenannd Skandal duet mänge Ehemaa uskoschte
Will’s doch no Lääde gitt wo nid so aifach Handdäsche kasch boschte

Monschterväärs

Spitzel, Schniffler, Intrigante
Himmeldruurigi Vagante
D‘ Amis die sin jetze gwasi
Die wiirdig Noochfolg vo dr Stasi

Dr Bush hett uns arg strapaziert
Mit sinre Dummhait malträtiert
Doch no mee als das gaistig Lama
Närvt jetzt dr gueti Herr Obama

Dr Barack maint zue dr Michelle:
„Kumm ins Bett mit dim Faargstell
I see grad do bim Berlusconi
Stellige, die kenni noni!“

Sini Agänte seen und loose:
D‘ Frau Merkel in de Underhoose
Pro Maa bruuchts drumm – das isch nid glooge
E Care-Team vo 2 Psychologe

Dr Ghaimdienstchef said zem Obama:
„Los, Barack, es isch e Drama
Mir heere gar nyt me us Poole
Die hänn dert alli Wanze gstoole!“

Und am Christopher Street Day
Heersch em Topagänt si Gschrei:
„D‘ Kameras dien ‘s nid ushalte
Sofort s‘ Weermebild abschalte!“

In Griecheland und in Italie
Isch s‘ Iberwache kai Lapalie
Beweegigsmälder, s’isch e Hoon
Sinn dert e Fäälinveschtizioon!“

Noch Duusige vo Abheerstunde
Rieft ain: „I ha e Ghaimins gfunde
Kai Schwyzer gitt’s freiwillig bryys
S‘ Rezäpt vom Abbezäller Chees!“

Sii gseen: Au d‘ Schwyz isch infiltriert
Drum wird per Nooträcht jetzt diktiert:
„Zem das stoppe muess e jeede
Ab sofoort Walliserdytsch reede!

Die Situation kennt eskaliere
Wie sotti d’ Schwyz druff reagiere?
S’ gitt nur ai Wäg us däre Noot
Die Gsalzene in Bundesroot!

Väärs 2013

Dä Summer het me z’Oerlikon e Huus nach Oschte gschoobe
Das isch ändlig mol e Laischtig vo de Ziircher wo d’kasch loobe
Jetz wo sie Iebig hän, do kennte sie – mir wurde das sehr schetze
S’neggscht Mool die ganzi Stadt grad bis noch Eeschtryych wäg versetze

Die Bandi het nur Lämpe, doorum het’s uns irritiert,
Dass d’EU dr Nobälbryys fir dr Friede abgarniert
Drum miesst me – wurd me sone schreegi Logik wyterfiere –
Für dr Chemie-Nobälbryys ändlig dr Lance Armstrong nominiere

Unsri Fraue kemme immer z’spoot, si butze nimme rächt
S’WC dräggig, s’Bier isch warm, vom Ässe wird’s uns schlächt
Und dä myysi Service koschtet uns am Ändi immer mee
unsri Ehe sinn halt wie ‘ne Zugfaart mit dr SBB

Frytig, eerschte Februar – dr Daag zem sich konstituiere
Doch d’Regierig z’Basel muess no warte, das duet iiritiere
Eerscht am Määntig goot’s denn los – au wenn me’s lieber anderscht wett
Will dr Baschi Dürr am Frytig immer Butz- und Wäschdaag het

Dr Wöschi Baschi wäscht si Wösch e jede Frytig Morge
mit Schurz und Wischmobb wott dä Ma fyr d’Sicherhait in Basel sorge
Däm Männli Maischter Proper z’sage, do spricht nyt drfiir
E haissi Glatze hett äär zwar, doch sini Gstalt die isch vyyl z’Dürr

An dr GV vo de Sioux im Indianerreservat
Said dr Haiptling “Fetter Elch” zem Haiptling “kleiner Kopfsalat”:
„Los, so laid’s mr duet, I muess Di päggle und drzue aafauche
Will sit die Fumoir schliesse ka me kuum me Friedenspfyffe rauche!“

Dr FC Sion hett mee Trainer gha als Fans uff syne Räng
au mit Alggohool verstoosch nit de St. Galler iri Gsäng
zem d’Yynaame verdopple duet me d’GC Spieler zwinge
ab jetz an d’Haimspiel je e aigne Zueschauer mitzbringe
Vom Schutte hänn die z’Lausanne unde gar kai blasse Dunscht
Bim FC Thun doo isch dr Raase effektiv die ainzig Kunscht
Bi Servette isch s’Bedryybigsamt dr allertreuschti Gascht
YB wird “gäng” Maischter, doch wie immer numme fascht
Luzern und Ziiri geen uff d’Närve, bis zem bittre Änd
Zwaiezwanzig linggi Fiess, und je e gsteerte Bresidänt
So wie die Pflutte schutte und die Clübli sich gebärde
Muess halt dr FCB au das Joor wieder Schwyzer Maischter wärde

Luftschutzkäller, Nootrazioone, Helm mit Gruebelambbe draa
Wär an Kaländer vo de Maya glaubt, het harti Zyte ghaa
Das Theater het uns nit beriert, dr Schloof nit kenne raube
Will mir brinzibiell nur an Kaländer vom Pirelli glaube

Monschterväärs

Villicht wisse Si das noni
Wär lausig schafft hett drotzdäm Boni
Doch fir d’Abzogger wird’s schint‘s bitter
die kemme bald scho hinter Gitter

Dangg Thomas Minder, Ständeroot
Git’s nur no Wasser und harts Broot
Und all die iberzaalte Flusche
mien mit dr glyyche Saiffi dusche

Mängmool läg s’Gäld schint‘s uff dr Strooss
Manager intressiert‘s nid grooss
Die kenne sich nid drnoo bugge
Will iri volle Däsche drugge

Am Schluss blyybd ine s‘ Gligg no hold
Will iri Fallschirm sin us Gold
Millione duet’s drum jewils koschte
sich z’trenne vo somene Pfoschte

Dr SBB – Andreas Meyer
Isch zem Byspiil sone Geier
Verstopfti WC – s’isch e Hoon
bringe pro Joor gnapp e Myllion

Mit gschwellter Bruscht ganz zvoorderscht stoot er
Dr Swisscom Bigboss Carsten Schloter
Verlocht Milliarde bi de Tschingge
und glopft derfir nit emool d’Fingge

Bim neggschte Värs do wird’s uns iibel
Dä handlet drum vom Oswald Grübel
Mir hänn in griegt – da’sch d‘ Pointe draa
Als Stroof fir dr Joe Ackermaa

Und im scheene Wollerau
Wartet ain‘ uf d‘ AHV
Es wintscht sich dert dr Ospel Marcel
Fir d‘ Geehilf e vrgoldets Faargstell

Dr Philipp Hildebrand hett glacht
Sich grad dr Bonus sälber gmacht
Hett zletscht das Gäld nid welle bhalte
Är haig scho s‘ Gschängg mit sinre Alte

A propos so Frauegschichte
Mir mien vom Berlusconi brichte
Deert griege Frau diggi Boni
Fyr jede Uffdritt oobe ooni!

Drzue maint dr Herr Berlusconi:
„Ich wär au komblett oobe ooni
Drumm bruch ich sempre alli Boni
Fir mini Hoortransplantationi!“

Die Situation kennt eskaliere
Wie sotti d‘ Schwyz druff reagiere?
S‘ gitt nur ai Wäg us däre Noot
Die Gsalzene in Bundesroot!

Väärs 2012

Am Minschterblatz said im Theaater vo de Marionette
Dr Kaschperli zem Grethli:”Unsri Biini isch no z’rette
S’ Ensemble wir vergreesseret – das frait mi seer mi Schatz
Als neie Holzkopf schafft ab morn bi uns dr Moritz vo dr BaZ!”

Dr Ueli Maurer hett dr Kampfjet “Grippen” bi de Schwede bstellt
Drbyy bringt Waar vo dert nur Äärger – jede Baschtler hätts vrzellt
Mit aim Imbusschlussel muesch di zerscht durch 100 Schachtle quääle
Und zletscht duet senn no garantiert die wichtigscht Schruube fääle!

Im Fümoir vo de Sioux im Indianerreservat
Said dr Haiütling “Fetter Elch” zem Haiptling “kleiner Kopfsalat”
“Die Sach mit däne Fumoir schyynt mr gspässig als Idee
Bi dämm durenand vo Rauchsignal kasch s’aigne Wort nimm gsee!”

Dr Nobälbryys fyr dr Friide hänn drei Fraue abgarniert
Und mir hoffe, das Joor wärde unsri Schätzli nominiert
So blange mir hetzt jede Daag, es wurd fir si entschide
Wil wenn die Drei noch Oslo raise hämmer ändlig mol dr Friide!

Unseri Noochbere die butzt sit mänge Joor im Groosse Root
Die heert so vyyl, dass si uns allewyyl e Vaers vorschlot
Sit neischtem lääne mir das ab und si duet nur no butze
Im Banggberyych ischs halt riskant, Insiderwisse z’nutze

Das sich dr “ewig Wichtigputz” – das isch die “liebi Blauderdäsche”
Und dää do mit em Helge nenne mir ganz aifach “grossi Fl$sche”
Mir sinn iibergwichtig, limitiert und wänn uns nid aastränge
Als Bresidänt in Nordkorea duet das allewyl no länge!

Mir Gsalzene haen langsam gnueg vom Laebe in de Baize
Manager im Sportberyych – dä Job dä duet uns raize
E Glanzidee die hämmer scho und bringe s’Gschäft zem laufe
Mir sueche e Tschetschen, dää sott dr FC Ziiri kaufe

Monschterväärs

Wie duet sich s’EU-Läbe loone
Statt schaffe holt me Subventioone
Bürokratie isch d’Religion
Mit 45 in Pension

Bim schaffe zwai Stund uff de Bai
Scho kemme d’grieche doodmied hai
Doch trotz Erscheüfig machts kai Mie
No bitzli Etyyre z’hinterzie

Und im Olymp dert wyt obe
Regiert dr EURO vo de Schwobe
Vo Athen bis Saloniki
Gitts nur no Suurgrut statt Tsatsiki

Fyr andri isch das e Lapalie
“Dolce far niente” in Italie
Die sinn – dasderf me konstatiere
Sogar z’fuul zem demonstriere

Doch s’Angi maint zem Berlusconi
“Muesch nid maine Eich verschoon i
Statt “Bunga Bunga” wie e Ferkel
Haissts jetzt kuschle mit dr Merkel`”

Unsri Mainig luutet so:
D’EU isch kurz vor em K.O.!
Sogar derart degeneriert
Dass d’Türkei s’Byydrittsgsuech sistiert

So duet uf d’Zuekunft vo de Lette
Gar kai Buechmacher me wette
Nid besser goots de Zypriote
1:1000 isch dert Quote

Vergässe kasch au d’Portugiese
Die sueche ständig nach Devise
Und die bättelnde Rumääne
Wämmer gar nit erscht erwääne

“Take it easy” maint dr Schott
“Wär nid zaalt goot nid banggrott
Viel besser suecht me sich e Spänder
Bekifft gnueg wäre d’Niederländer!”

De Slowake und Bulgaare
Miest me Gäld leene zem spaare
Und das nämt me vo de Pole
Die hänns drum bi de Tscheche gstole

D’Tscheche geen zue de Sloweene
Die dien sichs vo de Finne leene
Am Schluss sinn d’Luxeburger ryych
Das haisst “EU-Finanzusglyych”

DieSituation kennt eskaliere
Wie sotti d’Schwyz druff reagiere?
S’ gitt nur ai Wäg us däre Not
Die Gsalzene in Bundesrot!