---

Väärs 2024

D Laggaffe hänn pausiert.

Väärs 2023

Wäg em ESAF, z Prattele uf däm Fäld,
Suecht s Baselbiet, mol wieder dringend Gäld,
Mir sinn übrrascht, isch kei Rampass vor de Wahle,
Ufd Idee kho, das könnt doch d Stadt no zahle.

D Bangge sinn, efang scho zimmli tüür,
Fünf Stutz im Monet, Konto-Fierigsgebühr,
Bi dr Credit Suisse, isch das fascht scho krangg,
Denn für das Gäld, kaufsch bald die halbi Bangg.

Die ganz Wält stuunt, ab däre Sensation,
Es sig die längsti, Komposition,
As Basler het di das, nit vom Hogger ghaue,
So lang dien sich bi uns, d Trämmli amigs staue.

Är gilt as Genie, und het e Vision,
Doch für dr Twitter-Kauf, ärntet är nur Hohn,
Me weiss nit rächt, was är bezwägge wett,
Doch jetzt isch klar, ass är e Vogel het.

Ob Kim de l’Horizon, e guete Värs här git?
Mir hänn schnäll gmerggt, so eifach wird das nit,
Bim Värsli brünzle, isch uns kei Pointe kho,
Mir hänns probiert, im Sitze und im Stoh!

Mir hänn in dr Schwiiz, und das muess me loobe,
Kei so Gsellschaft, wie däne bi de Schwoobe,
So Ryychsbürger, das könnt bi uns nie gscheh,
Die sinn guet integriert, in dr SVP.

Dr Bobbele, dä isch doch gottefroh,
Het me ihn, scho friehner usegloh,
Mir wäre nit erstuunt, wurd är doch no beschliesse,
Sini räschtlig Stroof, im Dschungelcamp z verbiesse.

Die Brite hänn, viel miesse duremache,
Brexit, Mehxit, nei s isch nit zum Lache,
Und chum isch dr Gloon, in Downing Street mol gange,
Het dr näggscht, in Buckingham ahgfange.

Well Männer d Fraue, schyyns nit wänn verstoh,
Gilt neu bim Sex, nur jo heisst wirgligg jo,
Jetzt mol ehrlig, wüsse Si was gälte soll?
Bi mir dehei, heisst jojo, du kasch mr mol.

In dr UNO spiele, mir bide Grosse mit,
As mir dr Cassis schigge, das vrstooht me nit,
Um nur scho physisch, uf Augehöchi z kho,
Miesstr andr Sitzig, uf Zechespitze stoh.

Hässlig gruusig, hesch die diggi Tonne gseh,
Bim Usgseh kenne, d Lüüt kei Ahstand meh,
Wenn Si dängge, so schlimm kha das nit syy,
Frooge Si mol sone, Mistkübel am Rhy.

Im Regierigsroot, Joor für Joor brilliert,
Und dr Ständeroot, isch quasi abonniert,
Über ihri Leischtig, kha me gar nit klaage,
Hät halt mol öfter, Griezi sotte saage.

In dr Tabelle, nur knapp im Mittelfäld,
Au finanziell, fählt ne jetzt no s Gäld,
Und d Biljee, sinn nur no Ladehieter,
Bald heisst dr Club, FC Baselbieter.

Nur achtedrissig Stund, das het scho Konsequänze,
Und fiert am Schluss, no zu meh Absänze,
Den fürd Gsundheit, sigs drum gar nit guet,
Wenn dr Beamti, zwenig schloofe duet.

Väärs 2022

Skilift hänn glitte, in dr Pandemie,
Platzbeschränkig, und au kei Aprés-Ski,
Um bim näggschte Virus, könne offe zha,
Mien neu d Ski ind Gondle, und du hänggsch usedra.

Transgender queer, oder intersexuell,
Heisst si jetzt Kurt, und nümmi Isabell?
Isch si äggscht, im falsche Körper gfange?
Oder wäg dr lange Schlange, ufs Männer-WC gange?

Mir hänn mit Bitcoin, und zwor über Nacht,
Millione verdient, und ä Vermöge gmacht,
Könnte jede Daag, Lachs und Kaviar ässe,
Hätte mir das blöde, Passwort nit vergässe.

Risikogruppe, sinn sehr luut am schimpfe,
Sälbscht Nordkorea, kha si schnäller impfe,
Was si vergässe, bi däre ganze Gschicht,
Döt wird niemerts alt, und nur ein het Übergwicht.

Nünzää Milliarde, die Zahl isch riesig gross,
Zahlt d Roche dr Novartis, und isch se ändligg los,
Nach all de Joor, bliebt ne doch kei Gwinn,
Hänn nur knapp dr Lohn, vom Vasella wieder dinn.

In dr Türkei, ischs zum Eklat kho,
Zwei Männer hänn, ihre dr Platz wäg gno,
Als Schwoob het sie, luuthals protestiert,
Dä Stuehl heb sie am Morge, mit em Tiechli reserviert.

Wo dä Tanker, dr ganz Kanal blockiert,
Hets mi ehrlig gseit, grad bizli amüsiert,
Normalerwyys, kha das nur passiere,
Wenn mini Frau, s Auti will parkiere.

Ass d’ Schwiizer Nati, durestarte kha,
Bruchts stattem Seferovic, vorne e neue Maa,
E starke Stürmer, mit und ohni Ball,
Mir wänn dr Schwiizer Pass, füre Artur Cabral.

Bi uns im Affehuus, gohts ruppig zue und här,
E Affegschei, s’fliegt Kot und s‘isch vulgär,
Nach de Grundrecht, duet nur no s Stimmrecht fähle,
Und s wurde au die Affe, dr Eric Weber wähle.

Es isch e Sensation, an dr ETH,
Die wältwyyt ersti, Quante-Kamera,
Dank dääre ihrem, ultraschnälle Blitz,
Gseht meh sogar d’Wäggsel, uf em Sion-Trainersitz.

Wenn bi uns, s Gellerettli nümm duet kligge,
Gosch zum Uhremacher, das Ührli rasch go fligge,
Wenn si in China, nit nach Gusto tigge,
Dien die d Uig-Uhre, zrugg ins Lager schigge.

Bim Wäggsle vom Verein, het är nie Problem,
Dr medizinisch Check, bestoht är ganz bequem,
Kneu und Wade, sinn wie bim junge Reh,
Nur vom Bänggli weerme, het är bits Fuudiweh.

Dä Ego Wettstryyt, vo de Milliardäre,
Wär fliegt als erschts, über d’Atmosphäre,
D Menschheit wurds, wohl vyyl meh begriesse
Wenn ein dr Djokovic, uf dr Mond könnt schiesse.

Dr Party-Boris, hets nit so mit Moral,
Seit nit d’Wohret, und het au vyyl Skandal,
Uns isch klar, dä isch meh als kompetänt,
Und wird drum irgendwenn, Raiffyyse Präsidänt.

Väärs 2020

Är het welle Captain, vo dr Nati wärde,
Mit dem Bändeli, wär är dr Gröschti vodr Härde,
Au z Liverpool, wärs no öbis für si Arm,
Gäbs ihm ufem Bänggli, au no bitzli warm.

Bi de Säggli, kasch vyyl Plastik spaare,
Wenns mehrmols bruuchsch, duet d Umwelt besser fahre,
Wo mir hänn welle, sglyyche Güggli zweimol näh,
Het meh uns Huusverbot, im Rote Kater gäh.

Nyyd und Gyyr, mit Aazug und Krawatte,
Hälli Köpf, loot er loh beschatte,
Wieso darf ihm, kein vor d Sunne stoh,
Drvo het är, doch meh ass gnueg bikoh.

Letschti isch, Sport im Färnseh kho,
Fascht kein het dört, ins Stadion welle go,
Doch immerhin, het me zwei, drei gseh,
Meh ass bi de Hoppers, in dr Nati B.

Dr Groossi Root, het dr Notstand luut vrkündet,
Jede Furz, wird mit Klimaschutz begründet,
Mit Weermi heize, wär jo no vrständlig,
Denn im Roothuus schyynt, die heissi Luft unändlig.

Kuum ä Fettnapf, wo är sich loht entgoh,
S halbi Land, wurd ihn gärn entloh,
Nur vom Tessin, kunnt überhaupt kei Drugg,
Döt hofft me nur, er käm no lang nit zrugg.

Em Ueli Muurer, fallts amigs no schwär,
Z wirgge as är, nit dr Dümmer wär,
Dr Bsuech bim Trump, für ihn die Gläägeheit,
Hät är nit am Schluss, doch no öbbis gseit.

Mit Gummistiefel, ab durch d Wassermasse,
In Venedig gsehn, Touriste das no glasse,
Nur die Tschingge, sinn wie wild am Toobe,
Dääne Zwuggel, stohts Wasser bis do oobe.

As US-Präsident, bi de Demokrate,
Gits numme Dattergreis, und senili Kandidate,
Für d Partei, isch d Froog drum ganz zentral,
Wär vo dääne läbt, äggscht no bis zur Wahl.

Dr Tom Kaulitz, vo Tokyo Hotel
Isch eigentlig, e ganz agnähme Gsell
Doch gits öbbis, do gseht är nur no Root
Wenn meh ihn frogt, wies sinere Alte goht.

D Festdääg sinn, das Joor scho super glääge,
Au in Frankrich, hänn sie Freud drwääge,
Zum dört am Stügg, zwei Wuche Ferie znää,
Hesch nur drei Dääg, Streik dra aane gäh.

Bi dääne Dame, het meh scho vrnoh,
Dien zum Lache, in Käller aabe go,
Doch unterscheidet, die au allerhand,
Die eint isch guet, die ander So-La-Land.

Mir schryybe s Joor, zweiduusig nünedrissig,
Am Flughaafe Berlin, fliege sie scho flissig,
Numme z Züri, dien si druf bestoh,
Übers Stadion, nomol abstimme z loh.
In Frankrich sin, d Gilet Jaunes denn an dr Macht,
Hänn dr Macron, um ei Kopf kürzer gmacht,
Und sini Frau, het sich e Jüngere gnoh,
Nur das Fesseheim, isch immer no am Stoh.

Es isch e Sensation, an dr ETH,
Die wältwyyt ersti, Quante-Kamera,
Dank dääre ihrem, ultraschnälle Blitz,
Gseht meh sogar d’Wäggsel, uf em Sion-Trainersitz.

Es isch kho, wies het miesse syy,
Dr alti Papst, schwätzt em neue dryy,
Klar ass dr Ratzi, s Zölibat wett loh,
Mit sim Alter, het är nüt meh drvoo.

Linggi sinn gwäält, bis zudr Pensionierig,
Nur die Rächte, hänn kein meh fürd Regierig,
Denn für das Amt, ka sich döt keine ufraffe,
Wos kei Parkplätz het, wänn die halt nit go schaffe.

Wenn bi uns, s Gellerettli nümm duet kligge,
Gosch zum Uhremacher, das Ührli rasch go fligge,
Wenn si in China, nit nach Gusto tigge,
Dien die d Uig-Uhre, zrugg ins Lager schigge.

Väärs 2019

Bim Militär, sind d Speese überzooge,
Gfeschtet, gsoffe, mitm Heli ummegflooge,
Jetzt wird gschpaart, d Frau Amherd gryyfft do yy,
Statt edle Drööpfe, gitts nur Walliser Wyy.

D Meinigsvielfalt, isch z Basel fescht bedroht,
D Zahle vo de Medie, sinn scho länger rot,
Au d TagesWuche, wott me nit as Gschängg,
Meinige hänn z Basel, nur no d Schnitzelbängg.

Unseri Värs, dien viili Gschmägger spalte,
Und könne versauti, Pointe dinn enthalte,
Us Haftigsgründ, sig drum deklariert,
D Laggaffe wärde nie, halal zertifiziert.

As Lehrer muess, es sich guet läbe loh,
Hesch viel Ferie, kasch am Vieri heime goh,
Und duets am Fritig, mit em Wuchenänd pressiere,
Losch d Schieler halt, geg öbbis demonschtriere.

E Ort vo dr Rueh, zum eifach abe koh,
Wo sich d Lüüt, nit uf d Fiess dien stoh,
Wär das z Basel suecht, däm wird das jetzt wohl gfalle,
Das isch `s neu Konzäpt, vo de Mässe-Halle.

Fürs Ozeanium, bruuchts e Komitee,
As Wärbe-Ikone, wurde mir s’ Adela gseh,
Dä Bau entspricht, voll yyrer Person,
Hohl und voll Wasser, dicht dank Silikon.

D Cheffe vo dr Poscht, sin z Vietnam aako,
Mit em Flugi, statt em Poschtauto,
Kei Probleem seit d Poscht, und das isch nit mol glooge,
Es siige schliesslig alli, mit B-Poscht aabegflooge.

Brangelina, Bennifer und au Tamynique,
Wort-Spielereye, finde d Medie chiq,
D Helene Fischer, het drum reagiert,
Bevor sich dr Name, Silber-Fischli etabliert.

Worum het d’ Leitstell, dä Bus so fahre loh,
Mir mien scho saage, mir könne das verstoh,
Denn im Vergliich, zum Cheff sim Fierigs-Stil,
Het sogar dä Pneu, no dütlig meh Profil.

Sie heb sich Gedangge, zu ihrem Ruggtritt gmacht,
Amtsmied bini nit, seid Sie drzue und lacht,
Doch merksch ass nüm, uf dr Höchi bisch,
Wenn dr Schneider-Ammann, uf eimol schnäller isch.

Die Inder go kaufe, das finde mir nit guet,
Die hänn doch kei Ahnig, wie me schutte duet,
Und ihri Sprooch, die ka me kum verstoh,
Fascht so as hätt, me GC übernoh.

D Schugger fahre, mitm Tesla uf de Stroosse,
In soeim isch, dr Baschi fascht e Grosse,
Nur fahre darf er nit, nei das isch kei Witz,
Uf dr Fahrersiite, gits kei Kinder-Sitz.

So Bilder kennt meh, suscht vo hüüslig Gwalt,
Het ächt ihre Alte, dr Ackermaa eins knallt,
Vo däm Verdacht, het si ihn befreit,
Sig bim Gitarre spiile, d Tonleiter abegheit.

Z Basel ischs egal, ob arm bisch odr riicher,
Selbst in dr Dalbe, bisch bald e bizli glicher,
Au wird dr Daig, si fairi Chance biko,
Sich vomne E-Bike, überfahre z’ loh.

As Schwoobe-Pändler, hesch kei eifach Lääbe,
Jede Zug isch pünggtligg, e halbi Stund drnääbe,
Au ufm Perron, ischs mit dr Rueh vrbyy,
Uf wellne beide Gleis, fahrtr dissmoll yy.

Em Karl Lagerfeld, hets dr Kraage gstellt,
Und d Uriella, het ändlig s Ufo bestellt,
Was das Joor no bringt, weiss meh alwä noni,
Villicht mol erfreuligs, vom Silvio Berlusconi.

Väärs 2018

Als Jugo fahrsch, e digge BMW,
Als Türk dreisch Gold, so dass me’s guet ka gseh,
Und als Bünzli, fühlsch di riicher als die meischte,
Wenn dir in dr Migros, e Plastigsagg duesch leischte.

Quote-Politik, das isch nit ganz banal,
Ob Sproch, Region oder Genital,
Muess es im Bundesroot, d hälfti Fraue ha,
Wär für uns d‘Martullo, genau dr richtig Maa.

Bösi Zunge sage, nit ganz ohni Fruscht,
Dä Cramer sig dr Eymaa, nur mit rasierter Bruscht,
D Frau Gschwind het, do schiins drmit kei Mieh,
Dä rutscht no besser, bim übere Tisch go zieh.

Dr heissischti Tipp, schribt dr Partyguide vo Bärn,
Wenns unzwunge willsch, und Alkohol hesch gärn,
Wenn willsch wüsse, wo me heissi Wiiber trifft,
Fahrsch am beschte, mit em Yannik Buttet Lift.

Dr FCB kennt me im ganze Land,
Doch d Young Boys sinn, nid eso bekannt,
E 30jöörigi Übersicht hänn mir drum erstellt,
Und alli YB-Titel für Sie zämmezellt.

Ring Ring Ring Ring, Ring Ring Ring Ring Ring Ring,
Das isch eigentli, de Zeuge Jehovas ihr Ding,
Doch im Wallis, ambrüf und au ambri,
Könnt das genauso guet, dr Yannick Buttet si.

D‘Juso demonschtriert, in voller Körperpracht,
Mit brennende BHs gege d‘Männer-Macht,
Sit däre Aktion, frog i mi als Maa,
Obs do unte je, wieder waggse ka.

Wie dä Iman, bim Predige offebart,
Dänggt dä nit wiiter, as si Salafiste-Bart,
Wenn är mit em Untergang, vo dr Schwiiz prahlt,
Wär jo kein meh do, wo ihm d’Sozialhilf zahlt.

In Sissach hänn sie, ganzi Säuli gschlachtet,
Öffentlig usgno, verwurstet und betrachtet,
Dä schlimmi Abligg, kann ich kuum ertrage,
Mir liegt das Juso-Bild no immer uff em Maage.

Nordkorea schickt jetzt doch e Biathlet,
Dr Kim Jong Un sich selber per Dekret,
Uf e Medaille duet är au hoffe,
Im Training deheim, het är no jede troffe.

Mir hänn ghört, as dr Kurz zum Doggter goht,
Öbbis an de Ohre, es wär nonig zspoot,
Si Glyychgwicht machi ihm e biz Problem,
Links schwankt er kuum, s‘isch numme rächts extrem.

Dr Vater het stark abstehendi Ohre,
Si Brueder mit Drissig die meischte Hoor verloore,
Und au bim Harry, mir wänn ihn do nid kränke,
Wärs wohl nid falsch, über Verhietig nochezdängge.

Väärs 2017

S Heidi isch stolz und au ganz ufgreggt
Het fascht gwunne und sich kei Schritt bewegt
Wieso si guet sig, do meine mr ganz cool
Jä, zum zittere isch si auno z‘fuul.

Dr Trump luegt bi Olympia flissig mit
Ob‘s bim Stabhochsprung e lange Alauf gitt
Das will är wüsse, do loht är sich nid lumpe
Wie hoch könne die Mexikaner gumpe?

D Nati-Liibli het‘s alli vrschlisse
Nur em Shaqiri sin‘s, hänn si nit verrisse
Denn bi aller Liebi zu dr Zweikampfnööchi
Me hebt sich nid zrugg uf dr Pfyyflihööchi.

Bidr BVB, wird ganz flissig gschmiirt
E Million dass `s Tram uf Saint Louis use fiert
Als Gegeleischtig, dass mir das Geld dien gäh
Sotte d` Franzose, au grad dr Wessels näh.

Dr Eric Weber isch, nümm im Parlament
`S Glaibasel isch, gege Nazis resischtänt
Assozial und au renitänt
In Amerika, wirdsch so Bresidänt.

`S Schwingfescht gitts nit im Baselbiet
D Stadt springt wieder yy damits no funktioniert
Sag mol hänn mir, uf dr Stirn e Stämpel?
Wo druff stoht, Rampasse-Goobe-Tämpel?

I ha langi Hoor und seh au affig us
Bi nid dr Gschiidscht und kumm au niene druss
Aber dr Bescht, I spiil e Inschdrumänt
Alles wo`s brucht als Regierigsbresidänt

Darbellay und Löw die hänn `s glych Problem
Doch wie si`s löse, het jede si System
Wenn`s unde juckt, kratzt sich dr eint am Ei
Und dr andr liggt, halt zwüsche fremdi Bei

Die Elisabeth Schneider-Schneiter
Dere ihr Lache wird au nur no breiter
Dr Handelskammer-Thron het si sich nid loh näh
Jä si het e Gspür, wo sich Lugge dien ergäh

`S Heidi Diethelm, het Problem am Zoll
Bi ihre schwierig z’tue, dass finde mir nit toll
Doch gits als Reaktion, uf dr US-Muslim-Ban
Neu e Irreise-Sperri, für diggi Waffe-Fan

Fesseheim soll zue go, noch so vilne Joor
ändligg `s Läbe gniesse, ohni Explosione-Gfoor
Unseri Bitt an die französisch Politik
Baued dört eifach kei Samsung Batterie-Fabrik

Dank dr Medizin, bliebe mir länger jung
Und neui Hüfte, gännd uns wieder Schwung
Goht das so witer, wirds dr Federer no packe
Und mit 72 Johr, 100 Grand-Slam Titel knacke

Väärs 2016

Es isch e Spiil, vo Liecht und vo Schatte,
Vo dr Solitude, bis zur Landhof Matte,
Basel verdanggt, dr Roche so allerhand,
Jetzt au die gröschti, Sunneuhr vom Land.

Too big to fail, dr Staat dä haftet au,
Doch wär isch tschuld, bim nöggschte Super Gau,
Wenn d’Credit Suisse, uns denn emol schoggt,
weisch dört jetzt, wo dr Schwarz Peter hoggt.

Dr Blatter Sepp isch nümme Fifa Boss,
Me het ihn abegholt vo sim hoche Ross,
Si näggschte Schritt dä isch uns mee als klar,
Är gwünnt d’WM als Trainer vo Katar.

Dr Fischer Urs, dä macht si Sach nid schlächt,
Nei für e Zürcher, sogar nomeh als rächt,
Nur bim F-C-Z, hän si en nüm welle haa,
Für d’Nati B, sig är dr falschi Maa.

Schigged si zrugg, und bauet no e Muur,
Die sinn uns fremd, hänn nid die gliichi Kultur,
Millione, drugge mir Euch in d‘Hand,
Drum blibet deheim, im Kanton Basel-Land.

Saudi Arabie, und die Emirat,
Ohni ihr Öl, gäb‘s au kei Tschi-haad,
Dorum sotte mir, uff Wind und Wasser setze,
Denn könne die Scheichs, Kamel dur d’Wieschti hetze.

Bald dörfsch wiider, Bundesstüüre bläche,
doch in däm Joor, prell ich au mol d’Zäche,
Uff d‘Stüürerklärig, schrib ich voller Fruscht,
Jä liebe Ueli, uff das hän mr KÄ LUSCHT.

Dr Ueli het sich zum Finanzscheff loh ernenne,
I hoff er duet sich si Finger nid verbrenne,
Denn me muess sich, die Froog scho Mol no stelle,
Ob är ohni Finger überhaupt uf zää ka zelle.

Wohär dä Rächtsrutsch in unserer Politik?
Für uns isch klar, ´s isch eifachi Physik,
´S Voluume längt, für 13 rächti Fuzzi,
Am alte Platz, vom Toni Bortoluzzi.

D’Sibel Arslan goot jo jetzt noch Bärn,
Für ihri Wähler, kämpft si dört au gärn,
Ihri erschti Forderig, das losst sie loo verlutte,
Sig e neui Velospur, uff dr Balkanroute.

Mit UBER fahre, das finde mir no chillig,
Doch ´s Taxikartell, findet das isch z’billig,
Es schiint wohl so, die hänns no nid vernoo,
Gäld verdiensch, halt nid mit umestoo.

Wirdsch beschumpfe, agschpuggt und attaggiert,
Doch wenn di wehrsch, bisch erscht rächt dr Laggiert,
Als Basler Schugger hesch wirklig nid viel z’lache,
Und Gott bewahre, wenn de ´s Protokoll muesch mache.

Revoluzzer bsetze, e leerstehends Lokal,
D’Bolizei will nid stürme, mir finde‘s e Skandal,
E Root an Baschi uss fasnächtlicher Sicht,
Muur doch dä Lade, mit samt em Gsindel dicht.

Dr Parmelin isch jetz im Bundesroot,
Das heisst dass mit em Wyybuur e neui Zyyt aafoht,
Als beschti Armee isch si dur d’Wältgschicht gloffe,
Jetz ischs si‘s nümm, sondern nur no bsoffe.

Mit em Parmelin isch d‘SVP im Boot,
Und drey Russe ähh Wälschi im Bundesroot,
Är könni zwar nit guet Dütsch i sag herjodernoo,
Was die Siibe triibe ka eh keine verstoo.

Dr Hampe Wessels, sitzt am Spale-Bärg,
Uf de Kneui, so gross wiene Zwärg
Liebi Lüt, jetzt kriege si kei Schogg
Für‘s Innestadt-Konzäpt bruchts do halt e Pflogg

Väärs 2015

Am Herrli-Bärg do herrscht Messi-Alarm
Dr Blocher kriegt e Vormund oh dä Aarm
Meh seit är wurd sunscht nur vergammle
E glaar Indiz wenn Zytige duesch sammle

Het är die ächtsch welle bhalte,
Dass dr Ueli kaa neui Flieger falte?

Ebola, Ukrayyne, nooche Oste
’S vergoht kai Daag wo nid duet Läbe koschte
Doch bi uns y kaa s nit ganz begryffe
Regt sich nur em Gerry sini Pfyyfe

Was de Lüt die grösschti Freud duet mache
Sinn halt meischtens die ganz kleine Sache

Mir hänn jetzt e braiter Fäärnsee
Ass me kaa dä Thurnherr besser gsee
Jetz macht dää Schnuuri none Jeerli lenger
E Jeerli z’vyyl für jede Fuessball-Kenner

E Digge und viel Gfasel,
do luegi lieber dr Minu uf TeleBasel

’S Baselbiet kunnt nimm zur Rue
D’Basler Zyytig will kei grieni Kueh
Sie seit die passt uns nit, halt Stopp
Sie wär scho wägg hätte mir nur Ecopop

Dä Räber macht uns kei vergniege,
Wie s iPhone6 losst är sich lyycht verbiege

Männer halte gar nyt vo Kunscht
Bier und Fuessball steen in iirer Gunscht
Doch das änderi sich jetzt meh und meh
Syt an dr Art au blutti Brüscht kaasch gse

Friidlig mit em Kartondäller sinn an d’Art mir gange
Jetz kenne mir au em Baschi syni Yysestange

Es rumort ganz gwaltig im Landroot
D’Presidäntin in Ergläärigsnoot
Y ha bschisse aber nit vyl mee
Als dr Durchschnitt vo dr S-V-P

Doch isch dr Wahltag wieder verby
gilt predigsch Wasser und trinksch Wyy

De glai Maa de het nyt gsee drvoo
In d‘Ynnerstadt hänn s en nit yynegloo
Drbyy wurds dr Wält vyl besser goo
Hätt me die dinne nümmi uuse gloo

Dr Kerry isch durch d’Wäbergass flaniert
Und het drby si Johnny präsentiert
Är ka d’Uffregig nit verstoo
’S het doch ghaisse – Laade abeloo

Dr 8er isch jetzt international
Ohni Zoll uff Dytschland ganz normal
Doch au wyyter s’isch kai Häxerei
Vom Claraplatz diräggt in d’Türkei

Im Tram nach Weil herrscht Dichtestress
Und dr Charme vom Oriänt-Express

Z’Basel soll dr Abfall unter d’Ärde
Kaine weiss wie das soll umgsetzt wärde
D’Seniore sinn scho ganz besorgt
Wärde mir ächtsch grad mit entsorgt?

Im Baselbiet kunnts nit zem Super-Gau
Schryybt d’Regierig uff Moskau
Hesch gseh mir dien nid fusioniere
Wladimir muesch doch nid yymaschiere

D’Bangge sinn gsi so sicher wie dr Staat
Hesch Geld biko an jedem Banggomat
Hüt kriegsch kei Zins s’isch zum verzage
Willsch Geld gseh, muesch e Bangg verklaage

Uff em Schiff syygs zem Sex ko
Am näggschte Daag weiss si nüt drvo
In Zug isch s‘politisch Niveau
Definitiv im Dschungelcamp ako

Hieber Hieber Hieber Hieber Hieber
Hieber Hieber Hieber Hieber Hieber
Hieber Hieber Hieber Hieber Hieber
Noch em Mindestkurs, kaufi dert no lieber.

Wer findet Ungarn sig voll dr Hit
Wer Ressli mag und Rinder nid
Wers nid steert wenn Termin ablaufe
Kaa gärn bi Carna Grischa kaufe.

Ohni Budget het dr Staat nüt z‘lache
Darf er doch nur no s‘Nötigscht mache
Als Autifahrer sin mir us em Hüüsli
Wyyt und brait kai einzigs Schuggermüüsli

Dä Song-Contest mir findes zimmlig hart
Als Frau verkleidet gwünnt e Maa mit Bart
Doch die Wurscht muess sich nid geniere
Ändlig e Frau wo guet ka iparkiere

Syni Häcker losst är aanepfyffe
Migros nit Sony sottet ihr aagryffe
Als Diktator bruch y ihr Schoofseggel
Doch mi eigene Kaffi-Raahm-Deggel

Väärs 2014

In Ziiri do hän d Schugger Puff, im Rootliecht Milieu,
Die hän sich prächtig amüsiert, mit Dirne ohh mon dieux.
Dr Stammtisch het sich d Mainig gmacht, und maint es sig eso,
D‘Schmiir het’s mit dr Kuscheljustiz, wohl bizli z’weertlig gno.

D’Initiative zu de Ussschaffige, verstosst gege Menscherächt,
E Leesig, die wird dringend gsuecht, s’wird gstritte ganzi Nächt.
Am Änd gits denn e Kompromiss, do duet me sich nit schweer,
So mien nur zwei, drei d Schwiz verlooh – dr Räscht putzt bim Hans Fehr.

D’Bundesröötin Doris Leuthard, het e groosse Plaan,
si wott dr Verkehr verlagere, au uff dr Autibahn.
Jetzt wärde überall Boxe baut, me wundert sich doch sehr,
Si seit in Züri het das gnützt, bim verlagere vom Verkehr.

Dr Mandela und dr Berlusconi, das tönt jetzt villicht dämlig,
Sinn beidi wenn me gnauer luegt, sich doch no zimmlig ähnlig.
Dr Mandela z’erscht im Gfängnis, denn zum Präsident bestumme,
Fascht s’gliiche isch bim Silvio, nur macht är‘s anders umme.

Die Leitstell, die isch uss dr Spuur, die vo dr BVB,
Hän Grössewahn und immer Lämpe mit dr BLT.
Au d Pornobilder vom Diräggter, göhn ys gege dr Strich,
Es isch wie bim Margarethe au, die kömme nid zum Stich.

Dr Florian Schneider singt so schön, in Liestel ’s Rotstab-Lied,
Zum eigeständig untergoo, dä singt und wird nit mied.
Sotts Lieschtel bald no schlächter go, das duet ys wirgglig weh,
No wirsch ihn z Basel uff dr Gass als Bättler singe gseh.

Dr Pfleger schiebt dr Patient, vom eint ins ander Zimmer,
Uf de Gäng do kunnts zu Staus, jä d Laag wird immer schlimmer.
Das het nüt mit’m Wessels z’tue, s’ wär aber d Folg dervoo,
Hättsch ’s neu Spital loh baue vo, Herzog und de Meron.

Wellness, Drinks und blutti Hutt, e Insle voller Fraue,
Dr Bachelor foot ah stottere, und ka sim Glück nit traue.
Uns wär’s rächt wenn’s Fernseh bald, dä Carlos würdi näh,
Nur dörft me denn däm Brügelbueb kei Rückfluug-Tigget gää.

Meh Fraue in dr Chefetage, gege d’Macht vom böse Maa,
dass d‘ Quote alles besser macht, do glaube mer nid dra.
Au sit Fraue stimme könne, und das muess meh gseh,
isch’s um unseri Politik, jo nit viel besser gscheh.

Dr Vatikan, dä gilt als stuur, doch wird är langsam logger,
sogar als Papst do dörfsch zrugg trätte, das haut ys fascht vom Hogger.
Bim Ratzinger isch’s e gueti Sach, und e mängge dänggts,
Friehner hesch uf Gott no gwartet, bis er seit jetzt länggts.

Ob Merkel, Hollande oder Muurer, s’sin alli observiert,
Nochezlääse dank em Snowden, für die wo’s interessiert.
dass d Politiker korrupti sinn, das weiss doch jede Depp,
Nur wär die näggschti WM gwünnt, weiss nur dr Blatter Sepp.

Liebi Fraue, liebi Männer, vo Basel und Umgäbig,
Es tuet uns schrecklig schrecklig leid, mir hoffe uf Vergäbig.
Wenn mir jetzt ohni Pointe göhn, no diend doch nit rumoore,
Mir hänn – ab dene Conti-Värs – dr Überblick verloore.