Dr Schorsch vom Haafebeggi 2
Wandbild von «Magoo» beim Hafenbecken 2
Dr Schorsch vom Haafebeggi 2 isch e woori Schnitzelbangg-Legäände!
Was vermuetlig die weenigschte wisse: Dr Schorsch und syni Banggkolleege hän für d BSG gsunge. Doch zeerscht zaige mer euch non e Zämmestellig, wo dr Schorsch sunscht no syni Spuure hinterloo het:
Dr Schorsch als Spiilkaarte im Spiil
«Dummpeter» (Fasnachtszauber)
Uff dr Blagette «50 Joor Schnitzelbangg» 2001
Dr Schorsch als Baumschmugg bym «Santa Claus OnlineShop»
Dr Schorsch im «Källerstraich 2016»
vom Basler Marionette Theater
Und so kenne mer iin alli.
Väärs 2002
Ich bi dr Schorsch vom Haafebeggi II
nervös kumm ich do letscht vom Franz Carl Waeber hai
was mainsch wär ich dört inne gseh ha ummelaufe
dr Moritz Sutter will dä neui Flugzüg kaufe
e neue Schüpp will myny und es dörf nüt koschte
drumm simmer zämme gescht im Dütsche Stoff go poschte
6 Meter 40zig liigt vor ihre uffem Tisch
do froggts my : wye vyl Meter das in Euro isch
d Flaiadentend duet zum Crossair-Käpten renne
das isch e Saich do hinde duet my Kuchi brenne
dr alt Füürlöscher nimm y nit sait si no muff
ich waiss jo nit ob dä no goot, s stoot Swissair druff
dye neu y BLT-Reklame isch dye myys
nur aimoll no umstyyge Rodersdorf – Paris
das syg total verkehrt hänn sich d Franzose gweert
s haig mee Pariser z Rodersdorf als umgekehrt
Im Kaader het dr FCB so Spiiler dinn
wo me nit waiss uss welle Länder dass dye sinn
zum Byspyl vorne spiilt dr lang Kumantarakis
s ainzig mit Sicherhait wo d waisch es isch kai Waggis
Ich ha my Woonig tabeziert und find sy irr
Tabeete sinn so gail d Idee stammt au vo mir
ich ha dye düürschti aane knallt mit aigne Händ
jetz hange alles Swyssair-Akzie an de Wänd
ich stand am IV Schalter und will öbbis frooge
do het my e ganz e alte Maa am Ärmel zooge
Hay Tschortsch sait är und ich verschregg jetz kennt dä mi
und wo ni gnau lueg ischs dr Mickel Tschäggsen gsi
im neue Laitbild jetz vo unserer Armee
do wird’s uff jeede Fall zwai neuyi Reegle gee
gstriche wird dr 100 Kilometer-Marsch
drfür früsch yygfiert hänn sy jetz dr Schutt in Arsch
dr Sänder TV 3 hett laider laider gschlosse
dangg ihm ha ich bis jetz my Lääbe richtig gnosse
doch syt jetz d Frau dä Sexi Sänder nümm ka gaffe
muess ich als Räntner plötzlig wiider afoo schaffe
d Quin Mum vo Ängland isch mit hunderteins no fyt
sy will als Gschängg zum Papscht uff Rom es wääri Zyt
jetz gseh ich scho das Bild wo me denn ihre schänggt
linggs dr Stägge rächts dr Papscht wo annere hängt
sy sinn bedrungge sait e Schugger : kömme sy mit
ich hanem gsait : kunnt nit in Froog das goot jetz nit
ich ha no ebbe siibe Schämpis-Taxi-Fahrte
denn kumm y zrugg und nimm dy mit, du muesch au warte
Väärs 2001
Ich bi dr Schorsch vom Haafebeggi II
do letschti grieg y Bsuech, dr Papscht kunnt zue mir hai
und dä hett glütte, glütte – s isch e Katastroofe
är het dr Finger uff dr Glogge und hett gschloofe
dr Tscharls vo Ängland käämi nümm är sygy duure
e Daag mit Ogi , saiter: bi ich uff dr Schnuure
säggs Käsereye hämmer bsuecht zwai längte au
denn er het bi jeedere gsait: das Käs sein Milk von Kau
dr Kalimeros het e Uffgoob ganz e tolli
är isch dä neui Elifant bi uns im Zolli
är hett au sofort gsait dass är kai Kuhe verschooni
nur wye mes mache muess das waiss-er laider nooni
dr Christof Daum git syny Hoor zur Analyse
jetz hänn sy in dämm Labor dört dye gröschti Gryyse
sy haige e Droogeparty gmacht, löön sy durbligge
s haig nit für alli glänggt, ob är mee Hoor könnt schigge
Vo dääre LSVA ha ich d Nase voll
mir isch doch folgendes bassiert do letscht am Zoll
e Zöllner lacht so blööd und sait, dä Alleskönner
Sii hän sys Kärtli yynegsteggt sii 40zig Tönner
Syt dr Wyynacht bini gottvergässe gspanne
was macht dr Papscht mittem Haider synere Tanne
dä bhaltet doch dä alti Bääse sii ich stuun
dä isch jo scho vo unde bis in d Mitti bruun
bim Big Brother lauft grad Sex unter dr Deggi
my Frau schlooft nääbe dra, do hani dänggt dye weggi
ganz giggerig sagy: lueg e moll dye tryybes bunt
do hett sy gäänt und sait: was isch, lauft Kinderstund?
Ich ha glääse, sy wänn alles Liquidiere
do ha mr gsait, so hoppla Schorsch, jetzt haissts pressiere
ich sofort ab, ich main dr Gschwinder isch dr Schnäller
jetz hany Seggwyys s beschte Tiermääl in mym Käller
Ich ha scho Freud ka, s könnt e moll in Wänge länge
dass d Östryycher uns nit vom Podääscht verdränge
ich find das druurig, das sinn doch frächi Sieche
ich wett e moll luege, wenn mir das mit ihne mieche
Stelle si sich vor, dye Äntli uffem Rhy
dye vyle gääle und ich Dubeli schwimm dört dry
grad wo my uss dämm Schwarm ganz haimlig will verdrugge
schryybt ain mit Fettstift s 113 uff my Rugge
ich sett dä Booge für d Volggszellig no ussfülle
ich due dye längschti Zyt scho s Bleystift umme drülle
d Froog, wye vyl Kinder dass y züggt ha, duet my blooge
s miecht sich doch blööd, wenn ich jetz jeedi gieng go frooge
s git Wörter, wo als irgend aine duet kreiere
dye duet me denne innere Beschtelischte fiere
s gailschte Wort, wo ich scho ghöört ha, das Joor glaub
isch vom Boris Begger und haisst” Samenraub “
Ihr wüsset dängg, dass ich jetz 50zig Joor due singe
ich füül my fit und zwäg, ich kas no immer bringe
my Frau het numme gsait, jä nu denn ka me hoffe
dehaime sygy nämmli…….. kuum no öbbis gloffe
Väärs 2000
Ich bi dr Schorsch vom Haafebeggi II
vom Wirtschaftsgipfle kunnt dr Ogi zue mir hai
wye in Davos will är mit Änglisch by mir lande
ich ka jo Änglisch, mainsch ich haig ai Wort verstande
Mi Frau hett mi syt däm Joor absolut im Griff
jää ich folgere efang uff jeede Pfiff
denn ha mr gsait – jänu s isch zwar e Troscht, e schwache
d Chineese hänn jo schliesslig au das “Jahr des Drache”
Dä truurig Muetterschafts-Versicherigs-Entschaid
wartet numme, dä Entschaid duet euch no laid
also das Nai vo euch nimmt mir dye ganzi Kraft
ich ha mi so druff gfreut, dass nur no d Muetter schafft
Bisch 100 Joor alt, kunnt dr Tschudi zue dir hai
und denn für d BaZ schiesst ain e Fotti oder zwai
nur lueg ich denn dye Fotti a, isch s mir nit klar
welle isch dr Regierigsrot und welle dr Jubilar
Syt dääre Sändig Eiger-live duet d Frau, dasch s Gaile
sich jeede Morge als zum Fänschter uss absaile
ich find s dr Hammer was sy macht, es isch dr Hit
denn uffem Retourwääg bringt sy mr d Zytyg mit
Wird d Farb vom Drämmli häll oder blybt sy dunggelgrien
mir isch das Schisseglyych wye dye das cduureziehn
d Hauptsach isch, sy bhalte s Grien uss folgendem Grund:
bi Grien hesch weenigschtens no d Hoffnig das ains kunnt
D Ussstellig Körperwelten also nit wohr, dasch eso
wo d aane luegsch dyen numme Lyyche ummestoh
und trotzdäm hani ani kennt an ihre Gliider
dasch lang mi Nochber gsi, so trifft me sich denn wiider
Wo d Bundesrööt gemainsam schwööre, hänners tscheggt
hett bim Schwuur d Frau Dreyfuess d Hand uffs Röver gleggt
denn grad wo sii dr Arm lüpfe, dängg mr halt
ischere unverhofft dr linggi Trääger knallt
Ich und my Frau, mir sinn ys dissmoll gar nit ainig
denn wägg däm Urschrey hett sy ganz e andri Mainig
ich main, dä Urschrey haig me gschriibe für im Freye
und sy maint, sy miessi rund um d Uhr jetz schreye
Seeleverwandt sinn mir vom Fuess bi zue dr Büüle
drum kann-is au dr Helmut Kohl so noochefüüle
ich gsehs an mir und waisses uff dr erschti Bligg
ohni Spändegälder wird me nie… so digg
Jä mit mym Körpermaass fahr ich nit so guet Schyy
doch letscht bassiert mr ain, dä gib ich jetz no dryy
waisch nur per Zuefall groot ich uff e Abfahrtspischte
jetz stand ich zoberscht bi de Schwyzer uff dr Lischte
Dr Haider sait zur Seggretärin: Lueg my a
gitt s irgend uff dr Wält no soo e tolle Maa
d Seggretärin süffzget lutt und sait: jo moai
do wär dr “Schorschel no vom Hoafenbeggen zwoai”
Väärs 1999
Ich bi dr Schorsch vom Haafebeggi II
ich sag zur Frau: s lauft nümm so vyl bi uns dehai
sytt-här do git sy sich jetz wirgglich schampar Mie
nur ehrlig gsait: so wye d Lewinsky wird sy nie
In d Chemisch-Rainigung bring ich dr Frau ihr Klaid
wo ich ere d Flägge zaig, het s Fräulein zue mr gsait
löön sy das Klaid mit dääne Spuure druff e so
wär waiss vilicht isch ihri Frau e moll no froh
Bim Beyeler z Rieehe uss, ich find das zimmlig gspässig
sinn syt em Christo e baar Bäum so richtig hässig
e alti Linde rieft: das löön mir ys nümm gfalle
dä zieht ys A und Ab, mir sinn doch kaini Schnalle
Ich ha mängmoll e bitzli Mieh mit myner Frau
sy sait zue mir: Mit dir ha ich das amme au
und dass dy wiider e moll gseh bi mir im Bett
kasch my Adrässe ha, sy isch im Internet
Im Spittel sait my Aenggelbueb är wird jetz acht
Grossgrufti gail, ich ha e prachts Endeggig gmacht
waisch-wye do inne sofort Sportler kasch erkenne
dye an de Schlüüch, dye fahre alli Velorenne
Ich bi dr Wooghof innere Grubbe go besichtige
dört hani öbbis gleert das schyynt mr dra no s Wichtige
e Staatsanwalt dä hettis gfiert und gsait: jetz zaigene
lutter Zälle wo scho gfüllt sinn, mit de aigene
Ich ha e Audianz, bim Papscht …… e ganz e lai
ich stell my vor als Schorsch vom Haafebeggi II
mai, hett dä Papscht e Freud, sait sofort: Schorsch das wärs
wenn denn scho do bisch, mach mr andri Ostervärs
Jetz in mym Alter das bassiert mr immer wiider
plötzlig verstyffe sich an mir au anderi Gliider
das sinn vom Arzt dye Dings do do wo so dien tryybe
ich ha-nem gsait är sell mr nit so Saich verschryybe
Ich ha e Froog wo my unter de Neegel brennt
wye goots jetz wytter mit dr EXPO und dr Fent
denn nach dr Pipi ka nur aini no dye Stell ha
aini wo Wunder wirggt und das war d Uriella
Guet nur no ain …… das wüsseter dängg nooni
ich bi e Fan, vom Giovanni Trappatoni
drumm rief ich au zum Schluss, sunscht wänner dängg no mee
ich habe fertig…… Salli zämme…….. Flasche leer
Ich ha e Vision vom Stadion vom neue
und drinn e FCB wo me sich dra könnt freue
doch in 2 Joor ich erinnere euch denn dra
fangt das ganze Eländ nämmlig wiider a
Dr Schefchirurg dr Kaiser dyen sy schön vermisse
sythär laufts z Laufe im Spital total verschisse
sogar e Opee-Schweschter rieft: das gits doch nit
dye Frau dye bruuchti dringend jetz e Kaiserschnitt.
Väärs 1998
Ich bi dr Schorsch vom Haafebeggi II
gnau dört wo s brennt, hogge zwai Buebe uff e me Stai
ain luegt uff d Uhr und sait zum andre, machsch e Wett
dass d Füürwehr hütte unter elf Minute het
Noch dämm Mobbing und de Lämbe könnt dissmoole
im Schild sy Kopf am Boode umme rolle
und wenner kai Tschopp me griegt, das könnet ihr ihm saage
no kaaner s näggscht Joor bi mir ko Helge traage
Mi schnabbt do letscht e soone Baigger-Bolizischt
ych ha no dänggt: was mach ych jetz, das isch e Mischt
schnäll ha ny fründligg zue nem gsait zem d Wälle z glette
dii kenn y gäll, du kunsch diräggt ab dr Blaggedde
E Frau verdient e Viertel weeniger als e Maa
do bi doch ych nit Schuld und trotzdäm kumm y dra
denn als ussglych filzt mit jetze als my Schätzli
bevors im Däller ligt e Viertel vo mym Blätzli
Syt Nagano waiss ych jetze wye und was
drum rauch ych zwüsche yhne als au Gras
und das ych e ganz e feyni Grüttermischig ha
hool ych das Gras in Laufe bi dr Ricola
Mir schryybt s Gsundhaitsamt ych könnt vor Freud ussflibbe
numme d Chinahiehner haige d Vogelgrippe
wenn s nur dye Hiehner hänn – d Bedängge sinn vom Disch
well ych jo waiss, das myni nit vo China isch
Dr Piccard het mit sym Ballon e bitzli Mieh
scho syt em Start will dä Kaib nit richtig zieh
ych kämt an jeedem Frytyg scho für weeniger Gäld
mit mym Ballon wohrschynlig um dye halbi Wält
Syt em Kongräss vom Herzl due ych mit mir ringe
denn my Entschluss: ych due nüt über Jude bringe
doch syt dr Wiehnacht bi ny suur, jetz isch ain dra
3 Fläsche Rothschild hindrenand hän Zapfe gha
Hesch gwüsst mit Rizinus duet d Weyermaa sich dobbe
bim WM-Lauf do het sy dänggt: y kah nümm stobbe
denn wenn ych jetz in d Hoose schyss, das wurd mi “eggchle”
jä drumm Gring ache u de seggchle… seggchle… seggchle
My Arzt het gsait: är glaubt es dät sich loone
wenn ych yverstande syg dät är my kloone
ych ha nem gsait: jä mache sy daas, wenn sie könne
e zwaite so wye ych, dä dät ych Mynre gönne
Väärs 1997
Ich bi d Schorsch vom Haafebeggi II
e jeede Zämmeschluss fahrt mir efang in d Bai
drumm s allerschlimmschte wo mr jetz no könnt bassiere
ich dr Schorsch miesst mit dr Striggete fusioniere.
Nachere Party sait my Frau: Y will nur hoffe
Du losch hütt s Auti stoh du bisch jo wiider bsoffe
und denn als Dessert sait sy no wo mir hai schländere
dii set me wye dr Mais gentechnisch au verändere.
Hesch au so Bammel wenn de wotsch e Schegg y lööse
ych hanen scho denn letscht bassiert mr denn e bööse
in voller Stärggi her dä hindrem Schalter bällt
wotsch dä Betrag in Raubgold oder Judegäld.
Ich bi uff Züri letschte Summer ain go schnabbe
a gleggt wie jetz ……….. au mit dääre Kabbe
do quatscht my aine a sait: Gail was ych do miech
kumm mit an Raverparty du ussgflippte Siech.
Mit Wien verhandlet jetze als dr Boodemaa
am andre Daag isch denn dr Leuebärger dra
jetz isch im Bundeshuus bständig Wien am Droot
jä die sinn nümm sicher welle isch jetz Bundesroot.
Am Samschtig mach ych mit dr Frau als Kommisione
jä ych pagg alles y, y due my do nit schoone
do sait my Frau y main dye het jo das au gseh
Kauf nit so dottlig y bisch nit dr F C B.
Scho zwai Daag spööter y has fascht nit verdaut
kunnt soone Knupp und d Pointe isch versaut
wenn dye sich ainig sinn no kaany numme hoffe
dä gits zum halbe Pryys sy Datum isch abgloffe.
Jesses nai dä Haas y will jo jetz nüt saage
jetzt duet dye Fläsche no e Doggtertitel traage
y waiss s dien hütte vyyl so Titel ummeschwiire
är könnt jo wirgglig aine ha, für waichi Biire.
My Coppä z Rom ihr kennet jo sy Namme
sait plötzlig jetz ….. dass mir vom Aff abstamme
wo ych das glääse ha do hany sofort dänggt
jetzt hettem irgend soone Debb e Spiegel gschänggt.
Bevor y in Ussgang gang, gang ych my no go strääle
do duet mr d Frau no nachem Abschiids-Schmutz befääle
ab jetzt duesch mr stündlig übere Märtplatz wandere
und winggsch in Stadtkanal no bisch nit binere andere.
Väärs 1996
Ich bi dr Schorsch vom Haafebeggi II
und my gröschts Probleem das hoggt jetz dängg dehai
denn d Frau hetts Stimmrächt jetz syt 25 Joor
und yych ha höggschtens no e Stimm im Männerchor
Waisch alli Clique wo’s Fantom der Oper spiile
dien ganz bewusst uff ihr niidrigs Bütsche schiile
dass dye das Sujet nämme bin yych mir im klaare
was mainsch wye vyyl die mittere halbe Larve spaare
Am Bruggefescht do haany numme welle
uss alte Brätter e Würschtlibuude stelle
und was bassiert – yych find das schampar myys
yych Dubel grampf und Basel griegt dr Waggerpryys
dr Schnyder Karli macht nomoole e Karieere
bi ihm ka jede yber d Baizer sich beschwere
y has au gmacht und möcht my härzlig no bedangge
dagg ihm koscht Zibelewaje s Stügg nur 18 Frangge
Yych sag zur Frau: jetz Heergottnoonemoole
jetz hann sy z Basel e alti Gyyge gstoole
due nit so hinterlischtig sait sy – muesch nit hoffe
y has scho gmerggt z Nacht losch jetz äxtra d Huusdür offe
Ich fahr do letschti Tram und kumm in e Kontrolle
natürlig fahr y wiider schwarz wie jedes molle
y zahl dä Fuffzger wie dr Blitz und mach kai Lärm
jä nur vor lutter Angscht dä bricht mer baidi ärm
Will dr Schef vom EMD nit s Gsicht verliere
no miesste minimum zwai Sache jetz bassiere:
dr Nyffenegger muess e Zällkur go mache
und dr Ogi miesst im Villiger aini bache
dr Maiggel Tschäggsen het scho alles ka
e Aff, e Bueb, e Frau, jetz will-er dängg e Maa
jetz biny ganz nervös es duet my schampar blooge
yych glaub yych sag em nai wenn är my kunnt go frooge
dr Papscht het gsait, es syg sy feschte Wille
s git kai Kondom kai Antibabypille
do syg-er stuur do wurdy nit abgwiche
und vo syym Menüplan wird jede Vogel gstriche
My het e Audiänz uff Rom zum Babba gfiehrt
und dört im Dom do isch mr folgendes passiert
vor ihm do rutsch y uss bi voll uff d Schnuure gheyt
wo yych so do liig hett är my zum Bischof gweiht