Die Unerheerte, Gott sei Dangg, singe non e Schnitzelbangg!

Väärs 2021

Die Unerheerte hän pausiert.

Väärs 2020

Väärs 2019

Undrem Wicky het dr FCB dr Koller
Undrem Koller schyynts am Aafang wiider toller
Nuur dr Burgener und au si Spoortscheff Streller
Sin drotz Koller nooni toller oder heller

S isch schyynts dr Hauptgrund fiir die ganze Brexit-Wiire
Die Gränze deert zwische de Ire und de Ire
Bi däm Ire-Theaater ligtis durchuus drin
Dass statt de Ire d Brite do die Irre sin

Em Groossrootsbreesidänt foots langsaam aafoo stingge
Scho wiider sone Goof im Rootssaal by de Lingge
Doch nai das Kind sitzt by de Rächte fyyn und zaart
S isch s Regierigsreetli Cramer ooni Baart

Zem Abschiid loot dr Schneider-Ammann sichs nit nää
Sait: «Doris wuurdsch mer dyyni Händy-Nummere gää?»
Sii lächlet brait und iim isch s Häärz in d Hoose gheit
Luegt iin aa und – «null-siibe-nüün het si gseit»

Aggtie und Bitcoin sin im Verglyych zem Lache
Es git ebbis bessers zem digg Koole mache
Hundert Brozänt an Wäärtzuewaggs realisiert
Miir hän in die nei Parkkaarte inveschtiert

In Gänf stoot d Politigg mit baidne Fiess am Boode
Deert isch schwindle mischle liege schwäär in Moode
Au dr Maudet Pierre git zue dass äär duet liege
Eerliger kasch Politigg hyt niene griege

In däm haisse Summer gits – was kaine wott
Wäg diefem Wasserstand im Ryy Baadeverbott
Nuur d Ackermaa die findets guet – het richtig gschalte
Bi Diefstand kaa au sii sich iiber Wasser halte

Z Franggryych mache so baar gääli Schyylee s Gleenli
Und mit Bloggaade us em Macron e Makreenli
So Weschte duet jetzt nei au d BVB yyfiere
Die sin Expäärte in dr Innerstadt bloggiere

Wenn dr Xhaka Doppelaadler zelebriert
Mergsch dr Lichtsteiner isch z Albaanie integriert
Do het dr Petkovic gekonnt interveniert
Sythäär wäärde nur no Schwalbene dräniert

D «Negro Rhygass» änderet dr Naame krass
Politisch ganz korräggt in «Negro Oggsegass»
Ganz sensiibel dien sich d «Moorekepf» umdaufe
Und neydraal als «Schampo Gugge Schwarzkopf» laufe
Au die «Gsalzene» die schryte grad zer Daat
Haisse ooni Noot «Gebrieder Aromaat»
Die «Verschiffte» und «Mc Värs» ändre ganz fyyn
Laufe fusioniert ganz suuber als «Mc Clean»
E Nammewäggsel gits au by de «Penetrante»
Die haisse nei ganz unsexuell «die keusche Dante»
Au d «Schränz-Gritte» mien sich wäg «Me Too» umgwoone
Die nenne sich jetz «Seer lut bloosendi Persoone»
Dr Faasnachts-Aarzt haisst dangg Spitaalfusionsgefaasel
syt hytte «Doggter FMH der beiden Baasel»
Nur ebber blybt vom Nammewäggsel unverseert
Gottlob – die Unerheerte blybe unerheert

Väärs 2018

Achtung dasch e Duurchsaag vo dr BVB
Mir baue doo und deert und allewyyl no mee
Die Mittler Brugg isch gspeert s ganz Netz isch unter Drugg
S Dramm Nummre Vierzää faart nei iiber d Wettstaibrugg
S Säggs und s Drei sin nei dr Nyyner s goot rugg zugg
Faare vo Aesch zem Baanhof iiber d Wettstaibrugg
Dr Ainer faart noch Rieche aaber nimme zrugg
Deert aane nimmt äär statt d Dreiroose d Wettstaibrugg
Bim Achter isch als an dr Gränze ai Gedrugg
Drum faart äär ooni Halt diräggt zer Wettstaibrugg
D Linie Fuffzää draait si Rundi ganz am Stugg
Dr ainzig Halt isch zmittse uf dr Wettstaibrugg
Ou s kunnt e Mäldig Sii miir nämme alles zrugg
Mir speere ab sofoort wäg Stau au d Wettstaibrugg

Dail vom Wältkultuurerb «Faasnacht» sin miir drei
Soone Hochgfyyl Sii das isch fiir uns ganz nei
S Niveau isch jetz wie z Ney York und in Pariis
Doo in uff jede Fall bi de Getränggebryys

Unsri Nichte duet grad Halloween entdegge
Als stummi Häx mit schreege Zeenli d Wält verschregge
Miir zygge s Handy saage: «Lueg is gfiirchig aa»
Do sait s nei Iphone: «Guete Daag Frau Ackermaa»

Dangg Klimawandel so hänn Forscher uusegfunde
Hämmer s glyyche Klima wie im Balkan unde
Kai Wunder fyylt sich rain klimatisch uff aimool
in de Haimspiil d Fuessball-Nati buudelwool

Dr Frei dä kunnt dr Steffen goot dr Stocker kunnt
Au dr Akanji goot dr FCB dryybts bunt
S kunnt als Ersatz dr Carlo Janka fir vyyl Gäld
Jä dää isch Spitzeklass im hintre Mittelfäld

Obwool miir e Com puter gar nit bruuche dien
Nit uf Epfel us em Gsichtsbuech zwitschere mien
Hämmer drotzdäm sone Kischte kaufe miesse
Well sone Gloon duet Bitcoin in d Koläggte schiesse

Im Roothuus wott me goldigi Fallschirm verbiete
Drmit d Regierigsreet nit lieber d Änggel hiete
Irritiert froggt d Ackermaa: «Was soll daas Gschtirm?»
«Bi minre Fluugheechi bruuch ich doch kai so Schirm»

E Million verschängge und denn nimm draa dängge
Liege, schwindle und au s Rugggroot arg verrängge
Wenn dää no lang so wyter macht so dekadänt
Wird dr Wessels neggschtens FIFA-Bresidänt

En ICE duet z Baasel us de Schiine springe
Leggt dr Baanhof laam doch s Fligge wott nit glinge
E Fachmaa us em Oschte loot me drum aaraise
Dr Erdogan dää het Erfaarig mit entglaise

Bim Gipfeldräffe gits zem Desseer Fruchtbaschteete
Dr Kim Jong Un will umzverregge e Rageete
Dr Rajoy frisst d Crema Catalan elai
Und dr Macron bstellt e Vieille Prune ganz wie dehai

Unseri Nichte isch im Friefranzeesisch guet
So waiss sii dass es «La» nit «Le Lune» haisse duet
Dass «Solei» e «Le» het und kai «La» verdrait
Und dass me gar nit «Le Pen» sondern «La Peine» sait

Zem Fauteuil-Jubiläum kunnt e Geschänggli aa
«Mi Biirostuel. Mit beschte Griess, E. Ackermaa»
Doch s Rassers schiggen en zrugg hän nit lang gfaggled
Dr Grund isch sunneglaar jä well dää Sitz scho waggled

Uf em eerschte Sänder lauft Blocher TV
Uf em zwaite dritte vierte fimfte au
Uf em Säggs kunnt Baz TV das isch dr Hit
Dr Somm dää interviewt dr Blocher mee gits nit
Uf em Siibe wird e Kochduell serwiert
Ganz neidraal vom Albert Rösti moderiert
Uf em Acht gits Bauer ledig sucht die Dritt
Als Buuresingle macht dr Toni Brunner mit
Dr nyynti Sänder hät me gschiider ganz vermiide
Deert lauft Bauer gfunde und scho wiider gschiide
Uf em Zää dien d Schwyzer s neggscht Top-Model sueche
Us dr Garderoobe gheersch d Martullo flueche
Jä soone Brogramm wuurde miir nit welle gsee
Miir stimme «Nai» und luege halt Sven Epiney

Väärs 2017

S Runde muess ins Eggige hän sii als gsait
Dasch so ne primidivi Schwoobe-Schutt-Wyyshait
Sii die gilt syt neischtem au fiir d US Waale
Well d Amis maine s Eegglige miess ins Ovaale

Dr Biirgermaischter z Saint Louis het e Pool lo baue
Kauft e groosse Kaare, blöfft mit junge Fraue
Dää isch nid ebbe wägme Lottogwinn so froo
Dää het vom Wessels d BVB-Million bikoo

Dr Ammann duet zem d Landig no z perfeggtioniere
Mit dr dytsche Fuessballnati als dräniere
Fir dää Ussfallschritt het är esoo entdeggt
Guet kunnts nuur denn wenns im Schritt au richtig schmeggt

Di aigni Hoffnig die isch voll ins Wasser gheit
Dr Nobällbryys wird em Dylan Bob verleit
E Bryys fir Litraduur bekunnt äär – worum äggscht
Jä well äär nid kaa singe blybt halt nuur dr Thäggscht

Iiwandre joo Iiwandre nai – s kunnt kain me druss
Die wandre ii, denn duure und denn wiider uss
De Flichtling iiri Zyyl die liige z Dytschland oobe
Au dääne hets doo in dr Schwyz woorschynts zvyyl Schwoobe

Bimne Staatsbsuech duet dr Schneider-Ammann schnuure
Woort fir Woort kämpft äär sich duur sii Thäggschtli duure
Im zwaite Satz verschluggt är sich – muess nei aafange
Doch Sii do isch dä Staatsgascht lengschtens wiider gange

Äär duet erbaarmigsloos uf glaini Kinder schiesse
Und no vyyl schlimmer: als nid no de Reegle griesse
So ain gheerti ussgschafft und zwoor zimmlig schnäll
So ne Extremischt Sii wie dää Wilhelm Täll

Sii mer sait dr Putin haig ganz unschiniert
Dr US Waalkampf fir dr Trump manipuliert
Bim knappe Waalusgang do z Baasel simmer froo
Dass dr Putin nid uff d Heidi Mück duet sto

S isch e Zaiche wenn mes ganz korräggt verstoot
Dr letschti Ami uf em Moond Sii dää isch doot
Miir zwai hänn gaar nid lang iiberleege miesse
Wäär die als näggschte sotte uff e Moond go schiesse

S Gezeeter Holdrijo isch linggs und rächts enoorm
Wäg dääre bleede Unternäämensstyyrrefoorm
Ych ha nai gstimmt – Sii daas saagi unschiniert
Als Katolygg stimm ych doch nid fiir reformiert

S duet s Gricht fiir Menscherächt em Eymann voll zuestimme
Au Muslimas mien in Baasel leere schwimme
S macht jo wirgglig gaar kai Sinn – ych kaas verstoo
Mit dr Burka nuur zem Sinnele in d Baadi zgoo

Frauequoote finde vyyli unbequeem
Wie Sii gseen wuurd daas fiir uns au zem Probleem
Doch sit Transgender und so Gspässli bruuchts nuur weeni
Und dr Brueder Detlef wird – schnipp schnapp – zer Schweschter Vreeni

Dr Köppel sitzt im Parlamänt – s isch nid zverstoo
Kuum vereidigt het dää d Hoose aabegloo
Vo scharf rächts het äär d Somaruga fiis aagriffe
Doo gits nuur ains, s isch sunneglaar – miir geen go schiffe

Väärs 2016

Syyrer, Eritreer und andri aarmi Sieche
Wänn nach Euroopa doch sii lande bi de Grieche
Bi uns hets Blatz “Welcome” maint d Angi ooni Gyz
He joo die halbe Schwoobe sin jo in dr Schwyz

Lut WHO bekunnsch vo Wyyrscht schyynts hyffig Gräbs
Die Folg seig wirgglig draagisch niemer iiberläbs
Vo hoocher Stäärblichkait isch s Baaselbiet bedroot
Well deert d Regierig jo us luter Wyyrscht bestoot

Wos FBI baar FIFA-Fresch verhafte duet
Hämmer dänggt dr FIFA giengis bald nym guet
Drnoo hän sii dr Blatter Sepp au suschpendiert
Miir findes schaad well d Gschäfter laufe jo wie gschmiert

S hän z Keln baar Thyppe dr aaraabisch Frielig gspyyrt
Und iiri Doope under Maitli-BH gstyyrt
Dr Donald Trump wuurd wool in sinre Dimmi saage
D
ie sin jo sälber schuld wenn sii e BH draage

Dr Brüüno us em Elsass isch e liebe Siech
Kai Schwoob, kai Ungaar und au ganz bestimmt kai Griech
Än ächte Waggis wo no wie ne Roorspatz fluecht
Wenn äär am Moorge z Baasel als e Phaarkblatz suecht

Wäg dr Hitz sin miir go schwimme mit de Flosse
Und hän am Ryy in Rue e feins Znachtässe gnosse
Do bstellt e Schwoob voll integriert am Nääbedisch
E Uelibier und sii zem Znacht e Wiggelfisch

Sächzää Joor fir e Schettino daas isch haart
In dr Zälle e Mafioso mit me Baart
Dää froggt soffoort – me hätt sichs jo kenne dängge
“Capitano spiile miir Schiffliversängge?”

Im Minchner Baanhoof lauf yych ere Gruppe nooch
Verstand kai Woort waas reede die denn fiir e Sprooch
zägg e Stämpel und e bitz e mulmigs Gfyyl
Sii jetz hani bi de Schwoobe au Asyyl

Müller, Darbellay die leege s Zepter niider
Au dr Guy Morin gseen miir scho glii nie wiider
S goot au dr Brunner wo als maint äär siig dr Greeschti
Drbii ersetze sii das Wyyrschtli duur e Reeschti

Wenn mii glaini Nichte schreit und däubelet
Haut und schloot und gratzt und bysst und stämpfelet
Froog yych wasch daas fiir e Spiil daas primidiive
Doo maint sii s haisst Duurchsetzigsinitiatiive

Änglisch Franz und Politigg ir dritte Glass
Bi minre Nichte deent denn s Resultaat voll krass
“Gopf mi Huus isch uff em Hiigel” haisst fiir sii
Iibersetzt: “Putin Barack sur Hillary”

Kuum isch d Widmer-Schlümpfin zrugg dehaim in Chuur
Wäält me z Bäärn die ney scheenscht Bundeshuus-Frisuur
Au d Dochter Blocher mischt doo mit sii macht sich scheen
Doch sii gwinnt nit denn die het d Hoor jo uf de Zeen

Die zwaiti Gotthardreere muess me zwingend baue
Damit sich d Schwoobe voor em Dunnel nimm dien staue
Und wenn sii dinn sin diemer voorne hinde schliesse
Denn kaa me d Ooschtre im Tessiin mool wiider gniesse

Und die baide agtuelle Schlussoobe-Väärs:

Bssss dr Phaapscht duets schyynts syt neyschtem nimm verbiete
Bssss d Kathoole derfe jetz bim Sex verhiete
Bssss was losst dr Phaapscht vo däm Verbot abrugge
S isch nid Iisicht nid Vernunft, s isch – bssss – e Mugge

In Sachse dien sich Lyt voor ZFlichtlingsbüs ufbaue
«Mir sin s Volgg» hän sii denn voller Inbrunscht gschraue
Als gueti Schwyyzer frooge mir uns wirgglig ächt
Stimmts wenn d SVP sait s Volgg haig immer rächt

Väärs 2015

D Mirka loot dr Roger bim Sex als nimm loo gwääre
Us Angscht sii miesi noone Doppelpagg gebääre
Nuur voor em «Davis Cup» deerf äär im Näscht bitz mee
Jä hänn diir gmaint dää haig vom Tennis Ruggewee?

Geschtert schänggt mer e Bueb die Zaichnig doo
Kurz druff isch dr Sousa go bätte koo
Ganz verstuunt luegt äär daas Gekaafel aa
Und froggt vo woo ych siini Taggtiggdaafle haa

Dr Vladimir Putin keifft sii Weelloomech aa
An siim Weeloo seig ää z kuurze Ständer draa
Doch dää maint nur segg äär sell sich wiider fasse
Soone Geppel miess joo au zem Heerli basse

Dr alt spanisch Keenig sufft ain ibere Duurscht
Ganz beschwipst lallt äär: «Concita, noone Wuurscht»
Us dr Kuchi deents mit Kopfstimm fyyn und zaart
«Wotsch e blutti oder aini mitme Baart?»

Am ne Gottharddunnel Fescht bin yych bim ässe
Näb dr Bundesreetin Doris Leuthard gsässe
S goot uff kai Kuehut wievyyl die duet schneere
Jä kai Wunder wott die Frau e zwaiti Reere

Wo dr Putin no dr Raame nei wott spritze
Froggt dr Mech fiir waas äär sii Geppel dääg benitze
S kunnt denn uss – e Phenomeen woos ebbe git
S scheenschte Weeloo aaber faare kaa är nit

Nuur well me zwai Kanteen hät welle fuusioniere
Miesst me hitzedaags dr Kopf nid graad verliere
Doch wenn yych die Rampass-Fundis als due gheere
Duet mii s Baaselbieter Nai gar nimme steere

Wäg däm neie Eurokuurs gheersch d Schwyzer flueche
Drum soll me schyynts Feerie in dr Schwyz bueche
Denn bliib y halt dehaim und loss miis ebbis koschte
Und gang drfiir denn mit em Achter z Weil goo poschte

Mmm pff uhh fff mmm hhh ouu mmm fff uhh hhh
Uhh mmm pff hhh fff mmm ouu fff uhh mmm hhh
Kai Sau verstoot waas dr Heusler uuseloot
S isch mer glyych denn d Hauptsach isch dr Murat goot

Dr Murat drifft dr Putin uff em roote Blatz
Bim iebe weeloofaare – s haut en uff e Latz
Äär rieft: «Faar wie d Mamme Dreiraad, dasch bequeem»
«Und miir Yakins hän mit Ständer kai Brobleem»

Kuum ballere z Baryys baar Hooli drii
Will die ganz Wält bletzlig au dr Charlie sii
Numme d Amis dien soo hyychle ganz usschliesse
Syt Vietnam dien sii uff e Charlie als Find schiesse

Em Bobadilla sii Drääner hätti nyt drgeege
Wenn dr Raul sii Aarsch uffs Spiilfäld wuurd beweege
Doch dää luegt nur druurig und boort in dr Naase
Und maint denn «Dr Richter sait yych nieme raase»

Mi Nichte maint – die isch im Friefranzeesisch guet
Dass me s «P» au «p» und s «T» «t» saage duet
Aaber s «u» wird zem ne «ü» [y] und «in» zue «in» [ɛ͂]
Drum haissts anstatt Putin aigedlig

Väärs 2014

Wo Greenpeace im Joggeli e Blakaat duet aabeloo
Froggt dr Murat die baide Dääge was druff wuurd stoo
Do gseet me ze was Protäscht kaa fiere
Die dien hit no «Gazprom» buechstabiere

Dr Steinbrügg het um s Kanzleramt gstritte
Sich derbyy mit synere Kavallerii verritte
so duets aim hooch zue Ross ergoo
Wenn s Regimänt us aim Eesel duet bestoo

Nomen est omen – äär ka nyt drfiir
em Baschi si Bilanz isch e weeneli diir
Numme bim Wäsche gheert äär ze de Beschte
Drum het äär bim Speeseskandaal e wyssi Weschte

Als Hotelier muesch iebe Näschter zelle
Als Baizer hesch e Priefig im Rieblischelle
Und wenn de e Bordell wotsch fiere
Muesch in Ziiri d Bolizeischuel absolviere

S Anschi Merkel macht sich bim Langlaufe wee
Reegigsloos ligt sii näb dr Löipe im Schnee
Waas zien miir doo druss fiir e Schluss
Au im Winter findsch ab und zue e Nuss

Wo dr Conti d Kööle uff syyne Konti zellt
Dunggt s iin dä Uuszuug haig d Coop-Bangg zuegstellt
Liebe Carlo – d Leesig liggt uff dr Hand
Ä Wäggsel in Regierigsroot vo Baaselland

D Sitzwaal het bi de Drämmli groosses Gwicht
Holz, Kunschtstoff oder Speziaalbelaag geege Gicht
Als neyschts – das wunderet kai bitz
fiert d BVB au Schleidersitz

Die hundertschti Sändig – dasch e Geburtsdaag – e graade
Als Gschängg duet dr Schawinsky sich sälber yylaade
Fir uns isch daas kai Grund zem sich beklaage
Fir aimool het au dr Gascht ebbis kenne saage

Dr Hakan hoggt bim Bobadilla im Kaare
E IQ vo jee 60 – scho dien si 120 faare
Wo s denn blitzt finde s die baide no digg
Aimool im Lääbe e hälle Augebligg

Miir zwai hän uns sälber iibertroffe
Sin s eerscht Mool dr Stadtlauf gloffe
Vyyl z spoot hän miir erkennt
das me deert nid lauft sondern rennt

Dr Tschoggowitsch het dr Boris engagiert
Voorhand, Rugghand und d Beggerrolle dräniert
Au em Bobbeli syy Uffgoob die isch glaar
äär macht im Bääseschrangg Inventaar

«Nur well yych s Camilla lieb» – duet dr Charles steene
«Wänn si mii in Ängland nid zem Keenig kreene»
«In Ameerikaa wär yych als Bresidänt geboore
dangg myyne Sateliteschissle-Oore»

Dasch dr aller-aller-aller-allerletscht
aller-aller-aller-allerletscht
obwool – ganz doot isch äär nooni –
dr allerletscht Väärs zem Berlusconi

Väärs 2013

In dr Määrthalle duet ain sy Nootdurft verrichte
Doch s Schuggermyysli duet uff e Buess verzichte
Ganz verschmitzt het sii drnoo glacht
«Äntlig ain wo doo e Gschäft macht»

Dr Eric Wääber schtiirmt, jä Sii daas goot
us dr Untersuechigshaft diräggt in groosse Root
«Wo soll i sitze», froggt äär deert gschoggt
well ganz rächts usse scho dr Freener hoggt

Waas ych bim beschte Wille nid verschtand
Dr Bresidänt vo Franggryych haisst Holland
Jää doo saage miir zwai: «Gottloob»
Haisst dr Guy «Morin» und nid «Schwoob»

Miir dien Edelschtai raube und Auti gnagge
Omis beschtääle und Banggomaate hagge
Denn e Gfängnisschtroof liggt fir uns allewyyl drinn
Bim Wooghoof simmer schnäller wiider duss als dinn

Dr Pontifex isch de neie Meedie erlääge
Und twitteret sit neischtem sy Sääge
Im Gegesatz zem Jöstin Biiber
Folge em Phaapscht nid numme Wyyber

Em Mörgeli siini Lyyche dien im Käller verwääse
Äär het iine allwääg s Barteibrogramm verlääse
Jetz goot äär – dää het dr Broote groche
Z Baasel an dr Uni go vegetarisch koche

Firs 20 Minute hämmer no 10 inveschtiert
Im Bligg am Oobe schtoot was am Moorge nid intressiert
Was d Baz so schrybd isch rächts drnääbe
Ooni Daageswuche kennte miir au lääbe
D BZ het glyych vyyl voornedruff wie innedrinn
Dr Baaslerschtaab isch traditionell redaggtionell
e weeneli dinn
Drum fraie miir uns wenn s haisst «daas kaame grille»
Denn dien die Zytige doch no e Zwägg erfille

Dr Herzog und dr de Meuron frooge d Herzog und dr Morin
«Wämmer zämme e Cüpli nää?»
Wägem Schpaardrugg hets Eeveli abgleent
Au dr Morin, wills fir iin noch Schaffe deent

S Vreni Schneider stellt z Elm dr Helm in Egge
und duet iir Thalänt in e Gsangskarriere stegge
Bi uns in Baasel wuurds dergeege ebbis bringe
Wenn dr Christoph Eymaa äntlig dääti singe

Eyri Kinder lääse denn emool im Gschichtsbuech
Vom abverheyte Beersegang vom Gsichtsbuech
Deert frogt sich d Angi Merkel: «Nundesiech»
«Isch dää Zuggerbäärg aigedlig e Griech?»

Z Italie sin sid neischtem d Maitli ranzig
Em Berlusconi sy Verlobti isch scho achtezwanzig
«Nei blyyb i treu» het äär doo gsait
jetz schtygt deert unde d Juugedaarbedsloosigkait

Dr Gass, dr Suter und dr Somm mache e Wett
Wäär vo iine am maischte Mischt baut het
In däm Renne wird dr Hampe Gass denn viert
Will äär aimol mee kai Finger riert

Väärs 2012

Fiir ä Inveschtment vomene gnappe Millieenli
Macht dr Sutter bi dr Baz e Joor lang s Gleenli
Doch wo är d Aggzie dr Basler Bevelggerig wott gää
Maint dr Blocher “ych bi s Volgg” und duet se sälber nää

Uff Facebook sin mer Aafangs 20, sexy und nid bunde
Frindschaftsaafrooge bestäätige mer unumwunde
Doch die vom Phaapscht hän mir abgsait
Noo mee Schwoobe hätte mir nimm vertrait

Wo dr Berlusconi s zwaihundertsiibenesibzigschte Misstrauensvotum nimme iberstoot
Gseet är alt uss und isch poliddisch doot
Jää was machsch wenn d ybers Datum bisch
Goosch in e Metzg vom COOP – denn wirgsch wiider frisch

Im Voorfäld vo de Waale frooge die Griene dr Morin
“Kenne miir dii als Kandidat fiir e Bundesroot nää”
Dr Gy sait “jää” – doch miir gseens nit
Wills im Bundesroot kai Amt ooni Uffgoob git

In dr Schwyz isch jeedi Glainigkait normiert
S isch bekanntlig alles gesetzlig definiert
Greeglet isch au d Greesi vo Waalblakaat
Mitere Usnaam fir e Baader – dää het kai Format

Nooc dr UBS-Affääre gseet dr Griibel root und goot
Drwyyl dr Villiger vyyl williger vor d Bräss aane stoot
Är syg enddyscht und e weeneli druurig au
Immerhin suecht dää d Schuld nid bi sinere Frau

Im Zolli, by de Laie, gedrau ich mi kuum duure
Denn zude Niilpfäärd die hän no die greesser Schnuure
Doch wotsch e abgrunddieffe Helleschlund gsee
Stell di Fäärnsee aa, deert kunnt dr Schawinsky Roger

Mir din voll uff Kurs und mache Gwinn
D Väärsli Pipeline isch gfillt, d Schtradegyy macht Sinn
In dääre Laag hän mir d Novartis als Voorbild gnoo
Mir spaare d Faarb und hän dr helgedrääger entloo

Wäär dr Christoph B us H im Bundesroot beerbe wet
Isch dr Bruno Z us Z wo d SVP uffgstellt het
Nur bim Erbe gits a glai Brobleem und das isch nid egaal
Dr Zuppiger kaas guet aber nid legaal

Tschagajew, Putin und Blatter sitze zämme imne Boot
Wo s langsam uff e Wasserfall zue goot
Schnäll wääle si e Kapitän wo dr Kuurs sett bestimme
Es gwinnt dr Blatter bi zwai Enthaltige mit 24 Stimme

Säggs Wuche Feerie fiir e jeede – jää daas deent guet
Will das alli Arbetnäämer glyych behandle duet
Die Initiative wuurd d Wirtschaft nid ins Chaos stirze
und de Leerer kennt me ändlig d Feerie kirze

Dr Brunner frogt in Bundesbärn dr Frehner gequäält
“Wisoo hän si dii nid in Ständeroot iinegwäält”
“I begryffs au nid, i haa doch studiert”
Do maint dr Brunner: “Daasch mer au scho basiert”

Wo dä pfaarer diir d Drauig so e hoochi Rächnig schiggt
Isch dr Boris Begger e weeneli ustiggt
dr Bobeli dä maints nid bees sondern konschtrugtiv
Bi däm Bryys isch normalerwyys d Schaidig inklusiv

Via Miriam schnappt äär d Läggerli uns wägg
Via Rahel ziet äär d Baz in Drägg
Jää was kennt dr Christoph uns jetzt no nee
Zemene richtige Verlierer basst dr EHC