D Bebbi Buebe laufen seit 2005 in der BSG und lachen generell sehr gerne, machen Scherze und nehmen alles rund um den Baselstab auf, sei es politisch oder auch gesellschaftlich. Und manchmal schauen sie auch zu unseren Nachbarn hinüber.

---

Väärs 2024

Mir Schwyzer lääbe d Demokratie
das muess bi de Schwoobe anderscht syy
Dr Scholz und sini Ampelemännli
sind in Wooret Hampelmännli
e jeede waiss, wo an ere Ampele stoht
ass by gääl und root – jo nüt mee goht

Kai Musical ständig weniger Mässe,
alles wo Lärm macht kasch vergässe.
Kai neie Aaloos naime dinne,
jo unseri Regierig — isch am spinne!
Derfür schloofsch z’Baasel guet –Juhee,
im Duvet vo dr Fischer …. Au Wädenswil am Zürisee

Im Schwyzer Fuessball gits neii Sache
sisch mee zem hyyle als zem lache.
dr neii Schotte Modus syg
Dr letschi Schrei — in dr Super League
Au dr FCB duet druff abfaare
und foht grad bi de Phünggt a spaare!

Wäg dr Artevyyfalt — gseen die Griene root
Adler und Bääre — sin bedroot
vo allne Arte hets z Baasel nimme gnue
D Art isch doot und dr Spärber zue
Miend sicher hit eier Bier no gniesse
well morn duet — au die Baiz — do schliesse !

D`Parksituation in Baasel Stadt
hämmer wiirgglig langsam satt!
Als Blatzhalter hänn mir do unschiniert
e Klimaglääber — engagiert
Mir frooge uns– denn no us Spass
ob är — au unters Auto pass

S Baumkonzääpt uff dr Brugg Dreiroose
isch fiir sy Zwääg — dodaal in d Hoose
me wuurdi gscheyter im grosse ganze
statt Bäumli — lieber Pflanze — pflanze
So kenntsch s Gliental deert — grad entzügge
wenn die — dr Hanf kenne sälber pflügge

Wemme E-Trotti fahrt – me wise sotti
Blockiert und brämst ,wärde alli Trotti
Wo jetzt nimm dur d Altstadt fahre sotte
Au in dr Freie — isch flitze verbotte
Gstoppt hets deert au dr Fässler Otti
Kabutt — sin jetzt — s Gebiss und s Trotti

In Verbräche isch Baasel — wyt an dr Spitze
jä unseri Regierig grootet ins Schwitze!
D`Eymaa verbietet nid alli Demonstratioone
deert würd sich e Schugger Ysatz loone
s Esthi Käller findets efang alles drnääbe
sie sueche Lyym zem sich an Sässel z`glääbe

Mir Schwyzer sinn efang z beduure
bi uns in Bärn regiere d‘ Buure !
Scho rägnets wieder Subvenzioone
Dr Gstangg im Stall duet sich so loone !
Bi de Schwoobe zwüsche de Traggtore
göhn Trychler und Hookekrüz verlore !

Jo z‘ Basel am mim Rhy do simmer drby
d‘ Stimmig kennt kuum besser sy !
Ains vo de siebe Zwärgli simmer gärn
no 50 Joor wieder in Bundesbärn !
Ai Froog blybt no die isch groos :
Wie wärde mirs Jura Schöfli loos ?

Väärs 2023

Bebbi-Buebe hän pausiert.

Väärs 2022

Miir drey dien vor dr Schyssi stoo
und wisse nid wo iine goo
Isch s Wyybli jetzt nid doch e Maa
Und was isch denn am Männli draa
Vor lutter Tschender bi ba bo
hänn miir s in d Hose laufe loo

E Schugger fluecht – jetzt hesch dr Drägg
Dä Tesla kunnt jo nid vom Flägg
Do z Basel wott me – s macht mi schyssyg
iiberal nur Tempo dryssyg
Dr Raiber ka so, ganz verstoole
Mit em Velo iiberhoole

S Baudep stellt die Kiibel uff
Die sinn nid scheen – das macht uns muff
Die sotte schyyns dr Abfall frässe
Doch kaasch dä Wunschdraum graad vergässe
Leider duets nid immer goo
Dr Eric Wääber isch no do

Wyss gääge schwarz und schwarz gääge wyss
Uns reggt das uff – das riise Gschiss
Dr Wyss, dä saggt e schwarze ii
Das isch nyd neys, das ka so sii
Miir versteen en nid, dä Riisegrach
Miir zwai, miir spiile numme Schach

In jeedem Laade, s isch zem gryyne
kunnt me nur mit Masge iine
Uns schysst das a – miir dien s do saage
das eewig doofe masge draage
Doch hett s e Vordail naime duure
E so seesch au kei Ziircher Schnuure

D Boscht, jä die isch unter Drugg
D Briefboscht goot gewaltig zrugg
Spaare sott me wie no nie
Doch weiss me gaar nid wo und wie
Miir hätte e Tip wie d Boscht kennt briliere
Sälber bringge und zwei mool frangiere

Blaui Flägge – dr Grind verschlaage
Dä Demonschtrand duet sich beglaage
D Schugger sezze zwischdry
Als Mittel au e Drämmli i
Bi offne Diire dien die Liebe
Im Federer Dram dr Uffschlag iebe

Die EM – Sii das isch dr Brüller
Isch e digge Oobefüller
Ydaalie das hett s Renne gmacht
S wird ghuubt und gröölt, s wird glopft und glacht
Dr ainzig Drooscht, jä das isch z loobe
Hauptsach isch – es sinn nid d Schwoobe

Tarnti Flieger bstellt d Armee
Die wuurd me denn – schyyns – gaar nimm gsee
Tarnig sigg fir d Schwyz ganz wichtig
Basel findet das au richtig
Bym Bebbi macht sich d Boscht scho rar
In dr Hauptboscht isch si unsichtbar

Miir hänn vo uns e Helge gmacht
Dä zeigt uns do in voller Bracht
Oobe nyt und s Heesli glai
Ganz viil Hut und blutti Bai
Miir mechte so gäärn jupeidi
Dr neggschti scheeni Bätschler syy

Bisch du e Frau wo guet ka schryybe
Wo mänggmool au duet iiberdryybe
Hesch als Idee, wirglig krass
und macht dir s Frau sy richtig Spass
Bisch ab und zue e Rampesau
No bisch du unseri Quotefrau

Es froggt bi uns e Männli a
Eb äär mit uns bänggle ka
Äär sigg im Grund gnoo scho e Buur
Gaischtig eener e bizz stuur
Freyheitstraichler – Queruland
Ueli Muurer – Schwyzerland

Au miir sin gstande in dr Schlangge
In dr ganz ganz ganz ganz langge
Miir wisse, wenn sinn miir do
Wenn duets denn ändlig wyters go
Miir dien nid im dääglige Moorgestau stoo
Miir wuurde gäärn an Morgestraich goo

Väärs 2021

Dä Kynees kauft Fiirme uff
Doch hitte isch dä ganz schreeg druff
Die halbi Schwyz duet uns scho gheere
Aber das – das duet mi gruusig steere
ebbis fäält – jä das isch jääs
S Rezäpt vom Appizäller Käs

Wyss geege schwarz und schwarz geege wyss
Uns reggt das uff – das riise Gschiss
Dr Wyss, dä saggt e schwarze ii
Das isch nyt neis, das ka so sii
Miir versteen en nid, dä Riisegrach
Miir zwai, miir spiile numme Schach

Kaasch singge ooni z iiberdryybe
Kasch derzue no Väärsli schryybe
Kaasch Helge drille – und emmänd
Spiilsch du au no e Instrumänt
Denn bisch du s neggscht Joor jupeidi
Als Quotefrau bi uns derbii

Dr Haiggi dä isch ganz schokkiert
Äär meint – e Ufo haig parkiert
Zmitts uff em Märtblazz wuurd s jetzt stoo
Ganz elei, und ganz verloo
Mir glääre iin uff – Äär isch irritiert
E Elegtroautele hett do parkiert

Vom Donald Trump – däm guete Maa
Wänn miir au e Väärsli ha
Daag und Nacht hänn miir brobiert
Hänn laider ummesunscht studiert
Miir finde kai Ryym, s isch wie verhasst
Wo guet uff Lumpeseggel basst

D Ackermaa die isch nimm do
Wie sell das denn jetzt wyters goo
Dr Wessels jo dä wott au nimm
Jeemers nai – wie isch das schlimm
Wenn das so wyters goot persee
Hänn miir bald kaini Sujet mee

Miir hänn vo uns e Helge gmacht
Dä zeigt uns do in voller Bracht
Oobe nyt und s Heesli glai
Ganz viil Hutt und blutti Bai
So griege miir – jä jeedi Wett
E Rose vo dr Bätschlerett

Jeede Daag zer volle Schtund
wart ych bis dr Beschtler kunnt
Dä kunnt und goot – grad wie dr Blizz
Doch keit äär nid in Kaschteschlizz
Är lacht und seit uns ganz verschtoole
Iir kenne d Boscht im Migros hoole

Sott ebber vo Iine uff s Hyysli miesse
No diend glii goo, jo nid dryy schiesse
Bevor uff d Schissle hogge muesch
Wäär s guet, wenn d vorhäär frooge duesch
Äxgyysi – si – jä ka yych s riskiere
Oder losst graad e Bagger das Huus do fibriere

Dr Änggelbärger, dä guet Maa
Isch syt neyschtem ganz aarm dra
Si Hose die isch ganz verrisse
Dr Kittel alt und total gschlisse
Äär meint – i bi jetzt ganz verschosse
D Glaiderlääde die hänn gschlosse

Väärs 2020

D Mamme kunnt am Moorge hai
E Loch im Kopf – E Schlänz im Bai
Bisch du denn iiberfalle woorde
Vo Raiber oder wilde Hoorde
Nai meint sii, ganz duuch und lacht
Miir hänn e Friidensdemo gmacht

Bi dämm Väärs, do vergoot eych s Lache
Denn iir sottet jetz mitmache
Hooled Luft – und denn aahalte
Alles jetzte dinne bhalte
Atemloos mien iir jetzt sii – denn nur so sinn iir derbii
Jetzt e Schnuuf – das isch fadaal, s Co2 wäär nimm neidraal

Duesch Drämmli und au Wello faare
Kaasch e wengg franzeesch barlaare
Findsch Missverständniss schambaar schaad
Hesch e Ussreed graad baraad
Kasch an Ort und Stell scheen drampe
Dernoo hesch d Stell vom Wessels Hampe

Dr Sepp, mi beschte Frind uff Äärde
Hett brutali Darmbeschwäärde
Im Spittel gits e Griisesizzig
Dr Doggter findet das nid wizzig
Ganz schnäll handle, das muess sii – Denn nur so sinn miir derbii
Jetzt e Furz – das isch fadaal – S Co2 wäär nimm neidraal

Die Luppe do – wäär hätt das dänggt
Hänn miir im Mylidäär verschänggt
Mit dääre ka me glaini Sache
Blezzlig viil viil greeser mache
E so breicht denn, ganz ooni Drugg
D Patrouille Suisse au Langgebrugg

In Basel dien si Grääbe graabe
Si graabe als wie wyter aabe
Ojee – BVBee

Hensel und Gretel die dräffe sich im Wald
Es isch so dunggel und au no gruusig kalt
Dr Hensel wott e Fiirli mache s Gretel schloot Alarm
Nai nai nai, das deerf nid sii – so sinn miir jo nimm derbii
Joo kei Fiir – das isch fadaal, s Co2 wäär nimm neidraal

S Betty Fischer hett uns byychtet
Am Morgestraich hett s Fänschter glyychtet
Miir hänn uns grad ans Hiirni glänggt
und hänn denn gfroggt, was hesch do dänggt
Sii meint ganz duuch – I kaa s nid begryffe
Dr Wattewyyl sait – Schalt s Liecht i du Pfyffe

Dää Muuni do, dä hett kei Rue
Dää mecht e Spässli mit dr Kue
Iine stäche mecht äär ganz
Doch die Kue lipft nur dr Schwanz
Digge loss es aifach sii – sunscht sinn miir jo nimm derbii
Jetzt e Schiss – das isch fadaal – s Co2 wäär nimm neidraal

D SBB hett iiber Nacht
Ganz e neye Faarblaan gmacht
Bisch z spoot – hesch Bäch, de fluechsch bisch baff
Me haltet nimm in jeedem Kaff
Uns Bebbi kennt s nid besser goo
E so duesch nie uff Ziiri koo

Dä Kynees kauf Fiirme uff
Doch hitte isch dä ganz schreeg druff
Die halbi Schwyz duet uns scho gheere
Aber das – das duet mi gruusig steere
ebbis fäält – jä das isch jääs
S Rezäpt vom Appizäller Käs

Am Fluugblazz duet me Schlangge stoo
Alles dicht – nit duet me goo
Dä Zustand dunggt eim zerscht fatal
Doch isch s im Grund gnoo ganz normal
D Waggis dien an d Schwyzer dängge
Und dr Fluugverkeer beschrängge

Au d Fasnacht die wird langgsam grien
Me will uns saage, was miir mien
Dä grieni Waansinn macht uns muff
Drumm heere miir jetzt sofort uff
Miir leen d Fasnacht so lo sii – Iir sinn alli jetzt derbii
Miir leen d Fasnacht wie si isch – grien das isch bi uns vom Disch
Atemlos geen miir duur d Nacht – Spass hett s mit eych alle gmacht
Gniessed die drey scheenschte Dääg – blyybet gsund und blyybet zwääg

Väärs 2019

Im Joggeli isch s Liecht ewägg
S isch dunggel – oh jetz hesch dr Drägg
Alli sinn ganz konschterniert
Waas zem Deifel isch basiert?
Miir zaige de Ziircher, und daas isch kei Saich
Wie s isch bi uns am Moorgestraich

Im Joggeli doo hesch dr Drägg
Isch allewyyl no s Liecht ewägg
Fir s Spiil, do isch das dänggbaar schlächt
Im FC Basel kunnts graad rächt
Im Momänt, so heert me verlutte
Wuurd me lieber im dunggle schutte

Negro Rhygass deerfs nimm gee
D Mohrekepf sinn au passee
Schyssdräggziili s isch dr Waan
Heisst ganz ney jetzt WC Baan
Miir drei miir dien nid iberdryybe
Aber d Bebbi Buebe die dien blyybe

Die Veloschugger die sinn wichtig
Denn z Basel isch nur s Velo richtig
Drumm seesch die als im Sattel sizze,
Drampe – stööne und au schwizze
Si hänn au strammi diggi Waade
Die bruuchts zem dä ney Tesla z laade

D Määrtfrau Selma hett uns brichtet
Sii haigi graad e UFO gsichtet
S Ruumschiff wuurd am Määrtblatz stoo
D Diire off, und ganz verloo
Mir glääre si uff – Sii isch irritiert
D Schugger hänn dr Tesla parkiert

Am Spaledoor e riise Stau
E Waggis dä macht scho Radau
E Schooffeer wo nimm wyters weiss
Die neuen Busse sind ein Scheiss
Und d Leitstell meint – Sii hänn kei Schaade
Me miesti nur dr Akku laade

S Gligg, daas hett uns ganz verloo
Kei Frau mecht mit uns zämme goo
Jä uns isch wiirgligg nimm zem lache
Miir wisse nimmi wo abmache
Miir dien grad e Beschwäärde schriibe
Dr Dräffpunggt Barfi dä muess bliibe

Dr Ryystäärn dää isch jetze doo
Dr Lällekeenig dää muess goo
Ins Schwoobeland – das isch nid schlächt
Fir ai mool finde miir daas rächt
Jetzt ka dä dääne Kölner Jegge
Gnussvoll d Zungge uuse stregge

Duesch du die neii Pämpers nää?
Duesch du s Fläschli au scho gää?
Nai, bi miir gits ab dr Bruscht
Hesch am Daag als au e Fruscht?
So deents, jä de hesch gaar kei Waal
Syt neyschtem au im Groosrootssaal

Dr FC Basel fyyrt e Fescht
Mit e huffe tolle Gescht
Mit derbyy d Vanessa Hotti
Doch die Frau kocht uff em Fotti
I schutt jo bi Basel – i loss mir s nid biete
I verkauf keini Gwinn – bi mir gits nur Niete

Miir moole unseri Stadt am Ryy
Denn miir sinn stolz e Bebbi z syy
Iich zeichne s scheene Basler Wappe
Äär – uff em Ryy e scheene Schlappe
Und iich mool do e schwarze Flägg
D MUBA Basel isch ewägg

E Aschtronaut vom Wältruum oobe
Littet uns drey a – gescht zoobe
Z vyyl Yyse gääbs in Basel unde
Im Wältall haig äär no keins gfunde
Die Mietvelo die wuurdsch persee
An jedem Egge z Basel gsee

S Konto gläärt und d Spaarsau gschlisse
Dämm Bebbi do goots ganz verschisse
Äär muess no e Gredit uffnää
Mir frooge nooch, was das sell gää
Äär seit ganz schyych, iin duets scheniere
S isch fir d Karte zem Parkiere

Die Droone do, so duet me heere
Wuurd dr Verkeer vo Fluugziyyg steere
Miir hänn e Fanggnezz instaliert
E Abschussaalaag no montiert
Sunscht duet das Dingg – miir mien uns weere
Dr Verkeer im Bett no steere

Wotsch in dr Stadt e Parkblazz ha
fanggt dr Stress so richtig a
Bi jeedem freye, s isch zem gryyne
faart e Schwoob grad vorhäär iine
Hesch no finf Stund ändlig eine
stellt sich uuse, s isch e keine
D Ränder seet me ganz verbliche
dr Wessels hett dä jetzt grad gstriche
Skandal in unsere Stadt, Skandal es isch nid glatt, Skandal – Skandal in Basel
Jetzt schissts di a jä nundefaane
de stellsch dr Kaare drozdämm aane
Di Frau isch froo – si duets begriesse
si hätt scho langg uff s Hyysli miesse
Blezzlig haut s di uss de Sogge
S Drämmli lyttet mit dr Glogge
s giggst und knallt, jetzt hesch dr Drägg
d Autidiire isch ewägg
Skandal………
D Buess die gits vom Schuggermyysli
jetzt bisch du ganz uss em Hyysli
iiri Nummere muess i haa, i iyt grad em Dienschtscheff aa.
079 hett si gseit du bisch e so fräch hett si gseit
das isch bäch hett si gseit das isch bäch
079 hett si gseit, aber das nuzzt dir nüd hett si gseit
zaale muesch hett si gseit zaale muesch.
Skandal …….

Väärs 2018

Wenn iich uff das Dramm noo St. Louis waart
und waart und waart und waart und waart
No froog iich mi e ganzi Schtund
Worum das Drämmli denn n id kunnt
Dr Grund sinn d Waggis – s macht uns muff
Die laade unser Sperrguet uff

Mir hänn e Faart mit em Dampfzuug gmacht
Es raucht und dampft, es isch e bracht
Doch blezzlig duet gar nid me goo
Dä Zug blyybt grad vor Basel schtoo
D Faart isch z Änd – ganz ooni Gfasel
Rauchverbot im Bahnhof Basel

Was ych jetzt saag – jä das bruucht muet
I find dä Wessels Hampe guet
In St. Louis hänn mir dä aadroffe
hänn s luschtig ka und hänn au gsoffe
zem schluss schänggt uns dä pausegloon
per Handschlaag grad so ei Millioon

Dä Buesezeedel isch zem schreye
Mit däm QR Cood – däm neye
I heeb mi Händy richtig dra
Doch zeigs e falschi Zaal mir a
Finfenynzig, satt und stramm
Em Baschi Dürr si Wöschprogramm

Das scheene Waldebuurger Bäänli
Hett e ganz glai Greesewäänli
D Schiine duet me s isch zem lache
jezzte viel viel braiter mache
Neggschtens blocht – jä das muesch see
Uff Waldeburg dr TeScheWe

Mir hälfe eych diskret bim stäärbe.
So dien d Stäärbehälfer wäärbe
Iir mien uns eifach mache loo
und eins zwei drei , bisch nimme do
Au d Boscht isch Kund, mir finde s schlimm
E mänggi Boschtstell gits scho nimm

All Joor schloot – sii – das macht uns muff
D Granggekasse schuurig uff
Dr Kaffi, s Bier dr Minzetee
Koschtet all Joor au viel mee
Nur abschloo duet, graad wie e Wolf
Dr Constantin dr Fringer Rolf

Im Baselbiet, jä ganz wyt unde
Hett me dr Stadtentwiggler gfunde
E Hienerschtall im Roothuushoof
Im Joggeli e Häärde Schoof
Mir finde do, dä Lukas Ott
Eigentlig no richtig flott

Im Presidialdepartemänt
Sinn Schtrateege seer bresänt
Die dien Projäggtli flissig blaane
Aber nyd isch fertig nundefaane
Frau Ackermaa – do d Schtrategii
Leen si s mit däm Ämtli sii

Sit d Fasnacht zem Wältkulturerb gheert
Hänn mir drey flyssig Sprooche gleert
Latti – Griechisch und Albanisch
Tirkisch – Ängglisch und au Spaanisch
Dr Zeedel sii – s isch iiberdriibe
wird jetzt in fufzää Sprooche gschriibe

Vo Rastschadt bis uff Nizza aabe
Wänn d Schwoobe au e Dunnel graabe
D Schiine vo dr Dytsche Baan
Gänn nooche bi däm Greesewaan
Die wänn doch nur fir iire Kaare
D Autobaanvignette spaare

Langväärs
Die mittleri Brugg, sii s hett uns gschteert
Isch fir dr ÖV total gschpeert
Drey Schtund bruuchsch jetzt – jä das isch woor
Vom Clarablatz zem Spaledoor
Wotsch iiber d Brugg ganz gmiedlig laufe
muesch e Ritterrischtig kaufe
D Velofaarer kenne nyt
bloche voll duur all die Lyt
Skandal , Skandal in unserer Stadt
Skandal , Skandal es isch nid glatt
Skandal , Skandal – Skandal in Basel

D Frau Sarasin isch ganz empeert
D Drämmli faare ganz verkeert
Zem Kaffikränzli oh herjee
Weiss si nimm weeles Drämmli nee
S Fufzää faart uff Rieche uuse
S Zwei diräggt uff Bale Mulhouse
Bis s Drämmli kunnt – das mit dr Acht
Hesch zwei mool scho in d Hoose gmacht
Skandal….
Im Momänt heerscht jetzte Rue
D Grääbe die sinn wiider zue
Aber d Drämli bliibe als no schto
wiso duet das nid vorwäärts go

Liebi Faargescht, do isch d Leitschtell vo dr BVB
Leider hänn mir uff em ganze Netz e Stromussfall
Lööse si doch bitte iir Billjee, au wenn si im Momänt nid kenne faare
Mir mien fir die neggscht Million fir e Baubrojäggt schpaare
Viile Dangg, iiri BVB
Skandal….

Väärs 2017

Huanho – Niining – Bingaau
Clian chua gue – xin jen chaau
Die Woort selle e Waarnig syy
Fir jeedi China Dynaschti
D Kyneese sii das macht uns muff
Kaufe schwyzer Fiirme uff
Drumm stoot do druff ganz elegant
D Fasnacht blybt in Basler Hand

Mir sueche voorne – sueche hinde
Laider dien mir do nid finde
Im Handy duet au nid erschyyne
Mir drey sinn muff – es isch zem gryyne
Mir finde si nid – mir sinn fruschtriert
E Boschtstell wo no exischtiert

An dr EM hebt my Schatz mir d Hand
Loos digge – mach mir jo kei Schand
Kasch fiidleblutt duur d Freye springge
Kasch uff dr Fääri Liedli singge
Kasch dr Noochbere ins Fuudi bisse
Aber loss dr s Lyybli nie verrisse

Mi Hund muess ab und zue uff d Gass
Sit neyschtem macht ihm das au Spass
Nur hett äär noonig ganz begriffe
Das äär nid sott uff s Drottwaar schiffe
I saag iim zää mool jeemer nai
Mach dääre Gritte nid ans Bai

Vom FCZ hänn mir vernoo
Äär mecht ganz gäärn an d Fasnacht koo
Bedängge hett s ganz grossi gää
Wuurde die uns z Basel nää
Kemmed nur iir miend begryffe
In Basel sinn iir numme Pfyffe

Die bescht Armee uff dääre Wält
Koschtet uns e huffe Gäld
Vom Parmelin hänn mir erfaare,
Bim Sprängstoff mecht är richtig schpaare
Ganz ginschtig hett är ain uffdriibe
Samsung Galaxy Note siibe

Coop und Migros dien sich wandle
Mit Goldminze dien si handle
Fir beidi liggt e huffe dinn
Uff Ändi Joor e fette Gwinn
Als Biezer muesch das leider schlugge
Finf Rappe koschtet jetzt e Gugge

Mir sinn im Zug uff Ziiri ghoggt
Do hett dr Kondiggteer uns schoggt
Dr Swiss Pass zeige schreyt dä hässig
Das isch normal das isch nid gspässig
Jetzt wisse mir s isch nid verkeert
Das Ziiri halt zem Ussland gheert

D Basler Schugger juubiliere
Si dien zweihundert Jeerle fyyre
Ou jetzt weiss i grad nimm wyter
Äxgysi si s isch nid so schlimm
Mi Coppin weiss dr Täggscht halt nimm
Är hett kei Lugge, vom z viel feschte
Dä duet do nur dr Blackout teschte

Wenn ych die Sach so rächt betracht
Und dra studier bi Daag und Nacht
Wenn i iiberlegg so hii und häär
Und dängg wie s wäär – wenn s anderscht wäär
No wuurd – mir dien eych s do verzelle
E Handschlag au no ebbis zelle

FDP, CVP – LDP und SVP
BDP, GLP jeemer nei was sellsch do nee
Miir liide amme vor de Waale
Immer riisegrossi Quaale
die bescht Gruppierig das muesch gsee
isch halt eifach d BSG

Um d Fasnacht do stoots ganz ganz schytter
S Glyggestäärbe das goot wyter
S fäält iiberal an Material
Die Entwigglig isch fatal
Wotsch Note kaufe bisch verschosse
Dr Musig Hug blybt laider gschlosse

S Vreni die kunnt z spoot in d Schuel
Lyyslig hoggt si uff e Stuel
Zää Pokemoons die han i gfangge
Drum isch s e weeni lengger gangge
Dr Lehrer jo dä toobt vor Wuet
Well s Vreni viel mee finde dueet

Die bescht Armee uff dääre Wält
Koschtet uns e huffe Gäld
Flieger Flab und EDV
E Pischte Radar bruuchtis au
Und ney, s gits niene uff dr Wält
E Schwyzer Duurnschue fir ins Fäld

Väärs 2016

D Bebbi-Buebe hän pausiert.

Väärs 2015

Dr Bebbi Sagg gheert uff e Boode
Nai – in d Mulde, das isch Moode
Es wird im Groossroot diskutiert
Wo me dä Sagg denn jetzt blatziert
Mir hätte e Leesig, wo sicher wuurd glingge
Määrggli druff – und Boscht sells fuurt bringe

Die neyi Linie di nach Weil
Die finde mir so richtig geil
Uff Holzsitz im e Flexity
Faarsch am Zellner grad verbyy
S Beschte kunnt grad nach dr Brugg
D Wändeschlaufe wieder zrugg

Mir drei hänn dräumt, s isch richtig gspunne
D Schwyz hett d Fuessball WM gwunne
D Fäns dien juuble, goorbse , schreie
S het Lyt vom Seibi bis an d Freye
Jetzt wach i uff, e Draum wird woor
Nei digge nei
Die steen jo vor em Apple Store

Hinter Haag und Abspeergitter
Seesch si stoo im Blitzliechtgwitter
Eedli Dame, Männer mit Huet
Die finde sich no sälber guet
Mir meine nid die vo dr OSZE
Mir schwäzze vom Faasnachtskomytee

Kiirzlig, si, das het mi beriert
Wird e Schiidsrichter diräggt vom Fuessballblatz gfiert
Dä schreit ummenand, doch alles nuzzt nyd
Es fiere iin ab zää Sicherheitslyt
Mir hänn eine gfroggt, was isch do basiert
Do seit dä Schpreier uff em Blatz, das wird nid tolleriert

Kasch singge, ooni z iiberdriibe
Kasch derzue no Väärsli schriibe
Kasch Helge drille und emmänd
Schpiilsch du au no e Inschtrumänt
Denn bisch du s neggscht Joor jupeidi
Als Quotefrau bi uns derbii

Mir mien eich das jetzt do grad saage
Das Ässe schloot uns uff e Maage
Bulee wo uss Ungarn kunnt
Rind vom Ross und Salami vom Hund
Mir gänn mir eich drumm e ghaime Root
S Bescht isch s Basler Maagebrot

Dr Auderset het kiirzlig znacht
E Tescht mit ere Sexbox gmacht
Är heert deert inn zwei luthals steene
Und stellt sich vor, wie die sich verweene
Derno luegt är ganz diskret duur d Fuege
Und gseet : Die dien e Tennismatsch luege

Kasch singge ooni z iiberdriibe
Kasch derzue no Väärsli schriibe
Kasch Helge drille, und emmänd
Spiilsch du au no e Inschtrumänt
Denn bisch du s neggscht Joor, jupeidi
Als Quotefrau bi uns derbii

Mir Buebe mir sinn ganz arm dra
Mir sotte viel mee Saggäld ha
Es koschtet s Redbull, s Kino, s Händy
Glaider und mi Frindin, d Sändi
S diirschte isch, s isch gaar nid glatt
Dr Rollerparkblatz in dr Stadt

D Basler Fasnacht, s scheenscht uff Äärde
Sell Kulturguet Wältwyyt wäärde
D UNESCO git dä Vorschlaag i
Dr Böög isch leider nid derbii
Und vor Nyyd, jä das isch guet
Blatze d Ziircher fascht vor Wuet

Mir hänn vo uns e Fotti gmacht
Es zeigt uns drei in voller Bracht
Oobe nyt – e Stringg e glaine
Nai s isch nid das wo iir jetzt maine
Mir hänn doch nur , mir glatte Gselle
Ins Dschunggelcämp vom Fäärnsee welle

Dr Dalai Lama, dä guet Maa
Luegt kiirzlig Basel ganz guet aa
S sigg scheen und still in unserer Stadt
Zem meditiere richtig glatt
Am rueigschte siggs, äär findets wizzig
Im Roothuus an dr Groosrootssitzig

Die Schruube doo, die hänn miir gfunde
Im Spittel im e Käller unde
Deert wo die fäält, das isch e Schogger
Hett sicher ein e Schruube logger
Die Schruube gheert, sottsch nid druff drammpe
Zem Hiftglängg, däm vom Wessels Hampe

Väärs 2014

In Basel stinggts Joor uss Joor i
E weeneli als no Kemyy
Au d Abgass stingge uss em Kaare
Es schmeggt au – wenn i ein loss faare
Am meischte stinggts – jä mir seen rot
Im BVB Verwaltigsroot

Vom Ghaimdienscht dien mir vier vernää
Es haig e glaini Panne gää
Ein transleitet unseri Väärs
Hett gmaint, ai lugging, und das wäärs
Doch het e Problem är bikoo
Denn – Baseldytsch är not verstoo

Sii, das wäär so richtig toll
Super und au wundervoll
Romantisch und spektakuläär
Mega geil, scho fascht vulgäär
Ganz sympatisch und au nätt
Wenn s z Basel e kei Baustell hätt

In d Stadt kasch neggschtens nimmi faare
Unerwinscht isch deert di Kaare
Uns vier, uns macht das schuurig muff
Jä si, das reggt uns richtig uff
Im Wessels mien mir ganz glaar saage
Kei Fasnacht, ooni Waggiswaage

Dr Diräggter vo dr BVB
Kasch halber blutt im Händy gsee
Är haigi Sex vo Fraue welle
So duet me s ummenand verzelle
Das isch nid so – dä isch nid verdoorbe
Dä het fir dr neggschti Bätscheler gwoorbe