Väärs 2021
D Batallioonsglunggi hänn pausiert.
Väärs 2020
Mir hän dr lètscht e Spiili gspiilt s «Verrückte Labyrinth»
ständig suechsch e neie Wääg zem Dail hesch s Gfyyl me spinnt
Rächts und Linggs mool Ùnde Hinde s wiird aim schlächt derbyy
das kènnt au d Baustell Hagnau und dr Schänzlidùnnel syy
E Fòtti vo me schwarze Lòch syg iires groosse Zyyl
sy hänn gsuecht und gsuecht im wyte All mit Dùrlyychtobjeggtil
denn hänn sy nach langer suechi obbdimal verstèggt
im Baaselbieter Bòòrtmenee e riise Lòch enddèggt
Die Èldischt Daame vò Baryys die bruucht e frisches Gsicht
fyyr die hyttig Scheenhaitsmedizyyn kai groossi Gschicht
das bikùnnt me wider aane nur dr ainti Schògg blybt hògge
der Glèggner isch verbrènnt dä spiilt nimm an iirne Glògge
Der Justin und der Dustin sueche d Lia in der Halle
im Èèrport ganz verzwyyfled glyy fliegt s Flùùgi ab uf Malle
do kùnnt e Whats App i bii z spoot i mues e kly brèsiere
i ha nò miese ùff der Strooss fiirs Klima dèmonschtriere
In Eeschtryych ghèèrt der Klimaschutz schò lang in d Dradizioone
si syyge au d Erfinder gsii vò Klimaschutzakzioone
si sinn zwòòr nit diä hällschtä aber kènne kei Erbaarme
so isch der Ötzi us Brodescht scho d Glätscher go ùmaarme
Hindukùsh Neymar Ferrari Prada AMG
lalalala Jarak Gaba Gucci lelele
Bratan Aslak Maserati wär verstoot das nit
das isch jala nur dr neiischti Hitparade Hit
S Viirus vome Maarggebier ziet ùm die ganzi Äärde
d Angscht isch grooss mè drait e Laarve wägem aagstèggt wäärde
är isch iiberaal und Menschä lyyde gobelooni
China Ängland Franggryych nur in Ziiri leider nooni
Väärs 2019
D Batallioonsglunggi hänn pausiert.
Väärs 2018
I hògg doo in der Stùùbe blètzligg schittlets nùmme schyych
d Bilder feen aa zittere mym Schätzli gwaggle d Schlyych
das isch nid s groosse Beebe wo dùsse ùff uns waarted
nai s hèt dr Schwingerkeenig vo dr Goondle aabegschwaarted
Dènn schalt yych dr Fäärnsee aa und s kùnnt Sèniooreschwinge
dr ainti Bäppel duet dr ander ufe Boode ringe
doo seenyy in dr Nooùffnaam doo hèts mer aine gää
es liggt dr Fringer boode eebe ùnder em Constantää
Die ditschi Baan die bietet ginschtig Ùslandreise aa
kasch fir weenig Gäld e Byylljee bis ùf Hamburg haa
am Baanhof z Baasel hèts derfiir fill Schiine Glais und Waiche
nur dien nit alli Ziig uf dene Glais die Waiche braiche
Die vermùmmti Nora Illi hèt me z Eeschtryych verhafdet
gfolderet syyg sie wòòrde sie haigs nur gnapp vergrafdet
d Kinder seige ùmme Hòòr verhùngret in dr Nacht
die hätt ùs iirer Burka lieber Piiggniiggsèggli gmacht
MeToo wird vo dr Frauewält ùff Twitter celebriirt
me not isch syy am kleene sy hèt alles schò bròbiert
iires Dekooltee isch riisig dròtzdäm längt sy kaine aa
sy duet ùns wiirgglig laid die aarmi Merkel Angela
Myys Vòòrbild isch syt neiem dr franzeesisch Brèsidänt
au ich ha neierdings gärn alti Fraue in de Händ
jee ryffer dèschto bèsser e Rèliggt ùs alte Zyte
wie hèt schò d Urgrossmamme gsait ùf alte Kie lèèrsch ryte
Dr Kim Jong-Un dä isch fir wildi Psychospiil bikannt
waalloos schiesst är mit Atoomragete ùmmenand
grundsätzligg finde mir das schlimm und diens nit tolleriere
es sai denn är wiird us versee Ziiri uusradiere
Dr Lètschti hani s Mäggy Martullo-Blocher dròffe
mit Minijippe und blùtte Bai so isch sy ùmme glòffe
dr Aabligg vo de Schänggel isch firs Aug schò fascht schyggane
dò hilft kai Grèèm do muesch mit em Òrangschescheller aane
I bine glai schwaarz Schächteli stand in Birsfälde näbme Huus
die ganzi Strooss isch gschbeert wäg mir und kaine kunnt no druus
in Blätzbùms isch e Riisegschrei alli mache sich ins Heesli
derbyy binyych em Shiva Mike sy Uusgangs Puuderdeesli
Väärs 2017
Ùnsere Baschi hèt doch lètscht Jòòr fir e Brèsi kandidiert
är hèt Vollgaas gää sich sogar im Baadheesli bresendiert
mir gänd dir ùnseri Stimme velicht längts denn Nèggschtmool gnapp
aber Baschi bitte bitte zie di niemee ab
Im PharmaFirmeShoppingFieber do ziet China iibers Land
waartets ab glyy hänn diä au no ùnseri Faasnacht in dr Hand
dènn gits Drache statt de Wääge Frieligsròlle anstatt Waaie
und Binggis mieste in de Käller d Gòschdyym zämme naaie
Kènne dir dr Slogan vo dr Schuggerei am Ryy
kai Batman, kai Transformer, jä kai Spiderman muesch syy
an de Usflyg kasch de Schuggermyysli d Uniform abzie
denn wird Gsoffe Gsùnge Gfùmlet aber filme das sottsch nie
Mit der Hand in de Hoose stoot der Jogi näbem Raase
denn ziet är sy uuse hèbt sy gnisslig ùnder d Naase
z Baasel vorem Fäärnsee sichtlig giggerig und erreggt
sait dr Minou Ui an däärä Hand hätt ich jetzt au gärn gschmèggt
Vò Erdogan und Böhmermann do halte mir uns färn
jä Satirä iber frèmdi Länder hèèrt me nit so gärn
drùm leen mir ùns zensierä und ergään uns däne Fiirschte
und singe nit vò Brèsidänte und vom Gaissebiirschte
Dr lètschti Bachelor isch è riise Fään vom ùmmeschmuuse
är knabbered und schlabbered und schläggt an syne Muuse
doch bi dere ùsem Muotatal do wird är blaich und kalt
wie saage d Wätterschmöcker «chli stinke muesses halt»
Dr Canepa und dr Heusler sitze ùf em Jungfraujoch
dringge zämme waarme Thee und luege aabe in das Loch
doo bikùnnt dr Heussler Schiss und ihn verloot dr Muet
dr Zircher sait em hèb kai Angscht abstyyge kanni guet
Stèll der d Angi Merkel ùf ere Briefmaargge vòòr
es wär kai scheenä Aabligg wäg däm Gsicht und dene Hòòr
und käämt au ùnseri Bòscht wääg iire zwai Daag friener aa
bruuche kènsch die Margge nit do schläggt doch kaine draa
Lètscht Jòòr hänn die Tschihadfrinde allibòt èppis gsprängt
kai Wùche isch vergange wò me nit an Derror dänggt
ich ha gsait jètzt muesi handle und i ka nit lènger waarte
und stèll mer us Brodèscht e Raasespränger in my Gaarte
Welcome doo in Baasel sait dr Schoffèèr bitzeli glallt
in the first sidesee Durischte Bus i hope dass iine gfallt
denn bini uuse gflichdet und bi lieber z Fuess dùr d Stadt
woon er sait i am your city guide i’m Karli Odermatt
Es hògge e baar Nazis uf èm Laiefääridègg
ùfaimool do dringgt Wasser yy das Schiffli hèt ä Lègg
alli Nazis die geen ùnder ùsser aine und das stimmt
jä wär hätts dänggt dass unsere Eric Weber so guet schwimmt
Ich ha syt em lètschte Jòòr e Pokemonphobyy
die glaine faarbige Dinger mien doch Gòpfriidstùtz nit syy
doch blètzlig seeni au so ains sone rosa flauschigs Binteli
dènn mèèrggi s isch kai Pokemon s isch em Shiva Mike syys Hindeli
Väärs 2016
Dr Blatter und dr Platini die gniesse ihri Ränte
Dr Sepp boort in dr Naase und dr Mischel fietered Änte
Doch dr Beeg dä kunnt nit uuse und d Änte frässe nit die fräche
Do gseesch zu was die fähig sin wenn sy nit Bestäche
Dr Fritzli dä hät in dr Schuel vor d Tiire miesse stoh,
är het usversehe in dr stund e Firzli zische loh
Dr Lehrer dä isch gschockt do seit dr Fritzli frech und lacht
I ka d Abgas halt nit so verfelsche, wie das VW macht
I ha my Lääbe lang nur gsoffe mini Organ die sin zersteert
Dr herr Doggter. isch ab myyne Lääberewäärt grad gar empeert
Rettig noot wemmen die nei VW-Bille nimmt
D Realidät isch scheisse aber s Theschtergääbnis stimmt
Dr Obama luegt per Hellsehapp was ihm sy Zuekunft bringt
er erfaart das uf ei Glapf sy ganzi Wirtschaft nimmi hinggt
zem Spass wott är no wisse was koschtet e BigMac in 10 Joor?
Fir e Menu zaalsch e 20er aber Rubell stells dr vor
Unseri Schugger händ sich yber iire Komandant beschweert
Är syyg e kli z wyt wägg und macht au sunscht alles verkeert
Dr Lips dä maint das stimmt doch nit das waiss är ganz genau,
Doch das Hächle vo däm Ziircher verstoot doch do kai Sau
Schwarzi Umhäng wyssi Gsichter d Auge voller Gier
Wänn die drei mir an Graage oder sin das gaar Vampir?
Doch wo si vor mir steen do wyycht my Angscht und ich sees yy
Das sin nur drei so Gleen vo dere Scientology
Si reede ohni Phunggt und Komma sinnloos uf uns yy
Jä stell dr vor wie das fir die dr ganzi Daag muess syy
Dä Bleedsinn wo sy uuse leen dä wird mer langsam zvyyl
Aber lieber loosi dene zue als em Vo Wattewyyl
Z Gossau hänn si d Schwizerhemmli us dr Schuel verbannt
Es gränzi an Rasissmus und wiirft schlächt Liecht uf unser Land
Jetzt stell dr vor wo aane das no fyyrt mir wänns besinge
Wenn das so wyter goot darfsch nur no in dr Burka schwinge
Wäre d Swiss Indoors e Grieg wär dr Roger e Armee
Raonic und Isner wäre e Kommando ybersee
Dr Nadal wär e Bombe dr Nischikori e Samurai
Und dr glaini Stan wurd nach em eerschte Schuss scho brielend hai
E Uggrainer Myysli isch uf Basel aabekoo
Ins Byyro fir d Bewilligung ik wolle schaffe do
Dr Beamti säit den kei Brobleem doch Miggi jetzt muesch loose
Hit Oobe kunnsch bi mir verbyy und duesch mer Aine zaale.
Und wo er denn vor Gricht stoot do sait dä Flooner ganz verdutzt
Es duet mer laid es isch nid rächt i has Syschdeem uusgnutzt
Aber ains das isch mer wichtig jo das wuurdi gäärn ergänze
D Arslan isch nie bi mer gsii au i ha mini Gränze
Mit däm Innstadtkonzäbt waisch nimmi wode kasch duure faare
Linggs isches verbotte Rächts deerfsch nid dure mitem kaare
Mir reiche doodermit e Pedition bi dr Regierig yy
Wessels faar doch emoll Auto denn seesch di Fääler yy
Es kemme Flichtling uf uns zuä und in Bäärn do gits kei rue
Die Lingge wänn se yyneloo die Rächte d Gränze zue
D baasler Leesig wär mir leen se woone z Ziiri unde
Und Ziircher schigge mer ufs Mittelmeer deert syn sy schnäll verschwunde
Wenn di Daag mit Mais aafoot und dr Bus kunnt au no zspoot
Wenn di Frau und dini Frinde und di alles Gligg verloot
Nimmsch d ID usem Boorpmenee und denn waisch Gottloob
Alles ka vor d Hind aber du bisch Gott sai dangg kei Schwoob
Am Määntig steen mer umme und Zyschtig mache mer nyt
Well am Mittwuch immer no kai Hooche Awyysige git
Und eso goot d Conex z änd und die Iebig isch bestande
Und mir sin zwai Wuche lang nuur nutzloos ummegstande
Die neegschti Staffle Bachelor die stoot glyy wider aa
Si sinn no uf dr suechi nach em neeggschte Wundermaa
Er soll nit vill in dr Biire ha und männligg soll er syy
Do gits no aine do basst d Martullo Blocher super dryy
Mir hän ufem Wääg in Dienscht im Zuug die Faane gschwänggt
Dr Ueli froggt uns was das soll was hän der eych do dänggt
E Skandaal syygs und vor Wuet do kunnt er grad e kli ins schwitze
Drbyy hän mir nur welle d Schwizernati understyytze
Sie hän die neie dreii D Drugger massetaugligg gmacht
Das revoluzioniert d Mediziin grad iiber Nacht
Dr Mamme e nei Handglängg em Babbe machsch e neie Rugge
Und em Eric Weber kennsch emoll e Hirni lo usdrugge
I bii e glais schwarz Kefferli, stand bim Theater uf dr Stroos
Die ganzi Stadt isch gspeerrt wäge mir, und Kaos das isch grooss
E Derrordäsche Bombesagg vo dr Isis selli syy
Derbyy bin ich em Shiva Mike sis Schminggikefferli
Die ganzi Wält, die fyyrchtet sich vor dene Tschihad Frynde
Die wo in urbanem Umfäld gärn e Bombegyrtel zinde
Die kentsch no bruche in dr Schwyz, wer hätt das dänggt?
Mit ihrer Hilf do wär am Gotthard die zweiti Reehre schnäller gsprängt.