Die beiden Narren kennen sich von den Fussballspielen der Söhne. Neben dem Platz entdeckten sie den gemeinsamen Wunsch, «Väärs z singe» und beschlossen, am 15. April 2022: «Mir sin d Hoofnarre!» Seitdem sind sie auf einer Entdeckungsreise und halten dem Publikum (und sich selbst) den Spiegel vor: «E Hoofnarr kan euch vyyl verzelle – mänggmool deerf er näärve. Und wenn de wottsch, kasch gäärn emool e Bligg in Spiegel wäärfe.»
Väärs 2025
Bym Tierschutz gits e Regle, wieviel Platz e Dier mues ha.
E so passt d Stadt für d Klimaziel pro Kopf dr Wohnruum aa.
Um CO-Zwei ispaare z kenne, würde mir s begriesse,
bi Hagnau d Strosse z sperre und für d Schwobe d Gränze z schliesse!
„Nid Exit, au nid Dignitas“, maint my Fründ, „kaasch au,
mit dere Sarco-Chischte stärbe, drum sag ich dir jetz tschau!“
Doch kuum ewägg, isch dä zrugg, maint es isch nid schlau.
Au dörte hoggsch, wenn de ufe willsch, die ganzi Zyt im Stau!
Bym erschte Träffe vo de Herre Putin, Trump und Co,
spielt me “Schiffli versängge“, nach em Motto: „Wär goht z erscht Ko!
Do meint dr Trump: „Ych lieb das Spiel, do mues me nid vyyl dängge.
Nur dumm, dass sich die cheibe Schwobe sälber tüen versängge!
Dr Rööschti maint zur Amhärd: Viola, los mol bitte zue!
Die dumme Wölf, die sind e Bloog, die löön uns nie in Rueh!
Denn plötzlich ai Tumult, e Riese-Grach, es duet scho wee.
Dr erschti Wolf isch gschosse – Thomas Aeschi vor SVPee!
Die Schoggi do us Dubai–hän sii die scho mol brobiert?
Mir hän äggstra für die Fasnacht e neui Variante rezeptiert!
Mit Räpplistaub, Mimoosebliete–bim Briis kasch au nit motze.
Und s beschte isch–isst e Ziircher aini, muess är grad go…
– 8 us dr Mitti-Partei sueche e Bundesroot,
dr ainti, dä isch z alt, drum kunnt für ihn das Ämtli z spoot!
– 7 us dr Mitti-Partei, es isch e grosse Fruscht,
die ainti maint: „Ich ha eifach uf s VBS kei Luscht!“
– 6 us dr Mitti-Partei, die kömme niene aane,
dr ainti maint: „Nai dangge, ich will s Läbe andersch plaane!“
– 5 us dr Mitti-Partei, guete Root wird langsam tüür,
dr ainti maint: „Es tuet mir leid, ich gspüür kei inners Füür!“
– 4 us dr Mitti-Partei bekömme Angst und Trääne fliesse.
Do maint dr näggschti: „Ich gang hei, dört ka ich d Kinder gniesse.“
– 3 us dr Mitti-Partei möchte s Gsicht no waare.
Und scho heee! Du glaubsch es nid, gheit dr näggschti ab em Kaare!
– 2 sind no übrig bliibe, e Pfischter und e Ritter.
Das basst! Nid nur ir Mitti, au im VBS laufts schitter!
Ins Dütsche chli go böschtele, uf em Ruggwäg schtoosch am Zoll.
Das Triibe dört koscht nid nur Närve, nai, es isch nid toll!
Und d Granggekasse-Prämie bringe huffe unter Drugg.
Aber mir löhn Euch jo niid im Stich – mir singe au unter dr Brugg!
Sig, wie d wottsch! Haisst s Sujet–bim FCB schiins au!
Denn sit dr Haimkehr füült sich unser Xherdan wie ne Frau.
Das kenn är suscht vo niene, denn vor jedem Match wuurd dää,
nid wüsse, weeles Liibli mit wellem Muschter är söll nää!
E nöis Goschtüm mit edlem Stoff, lueget uns zwei Buebe aa.
Unsri Schnidere het alles gää, mir sin agleit, o, la, laa!
Und zahlt hän mir’s, du glaubsch es nid, das isch dr Supergau!
Dank em Schwiizervolk, em Vater syner–13 AHV!
Sit nöischtem hän mir e Landroots-Stuehl dehai, o wie schöön!
Unter uns, das ganz günschtig, ooni Grüsch und Nääbetön.
Doch s Fazit nach eim Monet sitze i däm Exemplaar:
Zum Dängge isch dä nüt, doch schloofe kaa me wunderbaar!