Grindig

D Verdrätter vo acht Schnitzelbängg hän am 18. Jänner 1921 im Glaibasler Wiirtshuus «Rääbhuus» die «Freie Schnitzelbängg» grindet. Zämmegfunde hän sich d Bängg: «D Metzger», «Alt Fidelio», «Alt Terrir», «d Zainefligger», «Alt Gundelfinge», «d Lumpesammler», «d Stiifelwiggser» und «d Rattefänger». Zem eerschte Bresidänt hän si dr Robert Russeberger gwäält.

In eme Grindigsfonds hän die acht Bängg je finf Frangge yyzaalt. Dodermit ischs Startkapital vo de Freie Schnitzelbangg 40 Frangge gsi. Als erschti Amtshandlig het me e Schryybe an dr Wirteverband uffgsetzt, das zem Zyyl gha het, d Bezaalig vo de Bängg an dr Fasnacht z reegle. Jeede Wirt sell 5 Frangge fir aimooligs Singe zaale. D Fasnacht 1921 (14. bis 16. Hoornig) isch dermit die eerscht Fasnacht als Verainigung «Freie Schnitzelbängg» gsi.

Routeblaan

D BSG, die zwaitältischti Bängglergsellschaft vo dr Basler Fasnacht, isch allewyyl am Mäntig- und am Mittwuchoobe in de Gaschthyyser vo dr Innestadt underwäggs.
Voor jeedere Fasnacht wird e Routeblaan erstellt. Deert wiird feschtghalte, welle Bangg wenn und wo singe duet. In de Joore vo 1970 bis hite hets groossi Umstellige bi de bsuechte Restaurants, Hotels und Cliquekäller gää. Friener hets no vyyli Quartierbaize uff em Brogramm gha. Hit so guet wie kaini mee. 1970 bsuecht d BSG no 32 Statioone im Glaibasel und 28 im Grossbasel. 1982 grad no insgesammt 25 verschiideni Lokal oder Cliquekäller. Woobi dr Transfer vo Phunggt 25 (Hotel International in dr Stainevorstadt) zue Phunggt 1 (Restaurant Rääbhuus) jewyyls per Taxi gmacht woorde isch.
2004 sins 31 Statioone, woobi im Theater Fauteuil drei und im Radisson (ehem. Hotel International) zwai Sääl bedient woorde sinn.